काठमाडौं । नेपाली कांग्रेसले चौथोपटक महासमिति बैठक सारेको छ । शुक्रबार बसेको पार्टी केन्द्रीय कार्यसम्पादन समितिको बैठकले महासमिति बैठक फागुन ७ देखि १० सम्म गर्ने निर्णय गरेको हो । त्यसअघि कांग्रेसले पुस १६ देखि १९ गतेका लागि महासमिति बैठक बोलाएको थियो । यही समयमा राष्ट्रियसभा चुनाव पनि हुने भएकाले बैठक सार्ने निर्णय भएको पार्टीका पूर्व-उपसभापति एवं नेता विमलेन्द्र निधिले जानकारी दिनुभयो । कांग्रेसको महासमिति बैठकको मिति सरेको यो चौथोपटक हो । यसअघि कांग्रेसले मंसिर १३ गतेदेखि १५ गतेसम्म महासमिति बैठक बस्ने निर्णय गरेको थियो । त्यो बैठक कांग्रेसले दुई सातापछि सारेर मंसिर २९ तथा पुस १ र २ गते गर्ने निर्णय गरेको थियो । त्यसपछि फेरि बैठक सारेर पुस १६ गतेदेखि १९ गतेका लागि तय गरिएको थियो । राष्ट्रियसभा निर्वाचन र जाडो मौसमलाई कारण देखाउँदै कांग्रेसले चौथोपटक महासमिति बैठक सारेर फागुन ७ देखि १० सम्म गर्ने निर्णय लिएको छ ।
पुस १२ गते केन्द्रीय समिति बैठक आहृवान
नेपाली कांग्रेसले पुस १२ गतेदेखि केन्द्रीय समिति बैठक बोलाएको छ । शुक्रबार बसेको केन्द्रीय कार्यसम्पादन समितिको बैठकले पुस १२ गतेदेखि केन्द्रीय समिति बैठक बोलाउने निर्णय गरेको सहमहामन्त्री भीष्मराज आङ्दम्बेले जानकारी दिनुभयो । केन्द्रीय समिति बैठकमा आसन्न राष्ट्रियसभा चुनावका लागि उम्मेदवार चयन तथा महासमिति बैठकका एजेण्डाबारे छलफल हुनेछ । यस्तै, बैठकमा राष्ट्रियसभा चुनावको लागि अरू दलहरूसँगको गठबन्धनलगायत विषयमा छलफल हुने कांग्रेसले जनाएको छ । आगामी फागुन २० गते राष्ट्रियसभाका २० जना सांसद बिदा हुँदै छन् । रिक्त हुने पदका लागि एक महिनाअगावै माघ ११ गते चुनाव हुँदै छ । फागुन २० गते कार्यकाल सकिनेमा नेकपा एमालेका आठ, नेपाली कांग्रेसका चार, माओवादी केन्द्रका तीन, एकीकृत समाजवादीका दुई, जनता समाजवादी पार्टीका एक र स्वतन्त्र एक राष्ट्रपतिद्वारा मनोनीत एकजना छन् ।
टिकट वितरणको जिम्मा सभापति देउवालाई
नेपाली कांग्रेसले आगामी माघ ११ गते हुने राष्ट्रियसभा सदस्य निर्वाचनका लागि दल दर्ता गर्ने निर्णय गरेको छ । शुक्रवार बसेको पार्टीको केन्द्रीय कार्यसम्पादन समितिको बैठकले निर्वाचन आयोगमा दल दर्ताका गर्न कांग्रेस केन्द्रीय कार्यालयका मुख्यसचिव कृष्णप्रसाद पौडेललाई जिम्मेवारी दिएको हो । त्यस्तै, बैठकले राष्ट्रियसभा सदस्य निर्वाचनका लागि टिकट वितरण गर्न सभापति शेरबहादुर देउवालाई अधिकार प्रत्यायोजन गरेको छ । बैठकले गठबन्धनमा कुरा गरेर सिट बाँडफाँट टुंग्याउन पनि सभापति शेरबहादुर देउवालाई नै जिम्मेवारी दिएको छ । निर्वाचन आयोगको निर्वाचन कार्यतालिकाअनुसार राष्ट्रियसभा निर्वाचनका लागि दल दर्ता गर्ने अन्तिम समय मंसिर २९ गतेसम्म हो । कार्यसम्पादन समितिको बैठकमा जाजरकोट भूकम्प र समसामयिक राजनीतिक विषयमा छलफल भएको छ ।
भूकम्पपीडितलाई सरकारबाट घोषणा गरिएको ५० हजार रुपैयाँ दिन अझै नसकेको बारे सरकारको ध्यानार्षण गराउने र अस्थायी टहरा निर्माणका लागि सरकारलाई दबाब दिने निर्णय पनि बैठकले गरेको छ । बैठकका निर्णयबारे जानकारी दिँदै प्रचार विभाग प्रुमख मीनबहादुर विश्वकर्माले भन्नुभयो, ‘राष्ट्रियसभाको निर्वाचन आएको हुनाले महासमितिको बैठकलाई केही पर सार्ने फागुन ७ देखि १० गतेसम्म गोदावरीकै हलमा गर्ने निर्णय गरेको छ । त्यसैसँग जोडिएका विषयमा राष्ट्रियसभाको निर्वाचनमा पार्टीको तर्फबाट भाग लिनका लागि दल दर्ता गर्ने निर्णय गरेको छ । उम्मेदवार बनाउँदा हस्ताक्षर सभापति शेरबहादुर देउवाको चल्ने भन्ने निर्णय भएको छ । यसको सम्पूर्ण व्यवस्थापन गर्नका लागि पार्टीका मुख्यसचिव कृष्णप्रसाद पौडेललाई तोक्ने निर्णय भएको छ । केन्द्रीय कार्यसमितिको बैठक अर्को पुस १२ गते बस्दै छौँ । विधानका केही व्यवस्थाहरू महासमितिमा सिफारिस गर्नुपर्ने हुन्छ ।’ नेता विश्वकर्माले बारामा शिक्षकहरूको शान्तिपूर्ण धर्नामा भएको घटनाको भ्रत्र्सना गर्ने, तत्काल दोषीमाथि कारबाही गर्न र मृतकका परिवारलाई क्षतिपूर्ति तथा घाइतेलाई निःशुल्क उच्चस्तरीय स्वास्थ्योपचार गर्नका लागि माग गर्ने निर्णय पनि भएको जानकारी दिनुभयो ।
उम्मेदवार सिफारिस गर्न प्रदेशलाई निर्देशन
नेपाली कांग्रेसले आसन्न राष्ट्रियसभा चुनावका लागि सत्ता गठबन्धनमा कम्तीमा १० सिट दाबी गर्ने भएको छ । शुक्रबार बसेको केन्द्रीय कार्यसम्पादन समितिको बैठकले कम्तीमा पनि १० सिट दाबी गर्ने निर्णय गरेको हो । माघ ११ गते राष्ट्रियसभाको निर्वाचन हुँदै छ । सरकारको सिफारिसमा राष्ट्रपतिबाट मनोनीत भएका एक र १९ जना निर्वाचित सदस्यको फागुन २० गते पदावधि सकिँदै छ । त्यसका लागि कांग्रेसले सातै प्रदेश कार्यसमितिलाई आकांक्षीहरूको नाम सिफारिस गर्न निर्देशन दिएको केन्द्रीय सदस्य आनन्द ढुंगानाले जानकारी दिनुभयो । एक प्रदेशले तीनजना आकांक्षीहरूको नाम सिफारिस गर्न भनिएको छ । प्रचार विभाग प्रमुख मीन विश्वकर्माका अनुसार प्रदेशले सात दिनभित्र उम्मेदवार सिफारिस गर्नुपर्छ । उम्मेदवार कस्तालाई सिफारिस गर्ने मापदण्डसहित केन्द्रीय कार्यालयले पत्राचार गर्ने पनि उहाँले जानकारी दिनुभयो ।
कांग्रेसका मन्त्रीको काममा प्रश्न उठाउने ठाउँ छैन : डा.महत
अर्थमन्त्रीसमेत रहनुभएका नेपाली कांग्रेसका प्रवक्ता डा.प्रकाशशरण महतले पार्टीका तर्फबाट सहभागी मन्त्रीहरूको कामबारे कसैले प्रश्न उठाउने ठाउँ नरहेको दाबी गर्नुभएको छ । प्रधानमन्त्री पुष्पकमल दाहाल ‘प्रचण्ड’ले कांग्रेसका मन्त्रीले काम गरेनन् भनेको आफूले कतै नसुनेको दाबी गर्दै शुक्रबार पार्टीको कार्यसम्पादन समितिको बैठकपछि डा.महतले भन्नुभयो, ‘पार्टीको तर्फबाट सरकारमा गएका छौँ । प्राथमिकताका साथ काम गरेका छौँ । काममा प्रश्न उठाउने ठाउँ छैन । प्रधानमन्त्रीसँग हाम्रो नियमित समीक्षा भइराख्छ । मलाई थाहा छैन नेपाली कांग्रेसका मन्त्रीले काम गरेनन् भनेको मैले कहीँ सुनेको छैन ।’ मुलकको अर्थतन्त्र सुधार भइरहेको जिकिर गर्नुभएका अर्थमन्त्री महतले घरजग्गा कारोबार र पर्यटन बढेको भन्दै अर्थतन्त्रले लय समातेको दाबी गर्नुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच