काठमाडौं । नेपाल ललितकला प्रज्ञा प्रतिष्ठानको हालै सम्पन्न १५औं प्राज्ञसभाले विभिन्न नीतिगत तथा कार्यक्रमिक योजना तय गर्दै सातै प्रदेशमा कार्यक्रम गर्ने भएको छ । प्रतिष्ठानले छायाँमा परेका कला, स्थान र प्रतिभालाई प्राथमिकता दिएर रैथाने लोक समुदायगत संस्कृति तथा भौगोलिक-प्राकृतिक पर्यावरणको विषयवस्तुलाई उठाउने जनाएको छ ।
यसका लागि सातै प्रदेशमा प्रदेश समन्वय समिति बनाइएको प्रतिष्ठानले जानकारी गराएको छ । यसै वर्षदेखि प्रादेशिक प्रदर्शनी सुरु गर्न लागिएको र राष्ट्रिय ललितकला प्रदर्शनी-२०८० मा सिर्जनावृत्ति प्राप्त गरेका कलाकारको प्रतिष्ठान दिवसको अवसर पारेर वैशाख २ गते प्रदर्शनी गरिने भएको छ । कलाका लागि उचित भौतिक पूर्वाधार र बजेट अभाव तथा नेपाली कला र कलाकारको तथ्य तथ्यांकको अभाव रहे पनि प्रतिष्ठानले ललितकला क्षेत्रको श्रीवृद्धिका लागि योजनाबद्ध ढंगले काम गरिरहेको दाबी गरेको छ ।
प्रतिष्ठानले बढ्दो तापक्रमले हिमालमा पारिरहेको प्रभावको पक्षमा केन्द्रित रहेर ‘हिमालको रहस्य’ विषयमा कला प्रदर्शनी गर्न पनि लागेको छ । प्रतिष्ठानद्वारा जारी विज्ञप्ति अनुसार संविधान र लोकतन्त्रको मूलभावमा रही गणतन्त्रको प्रतीक/स्तम्भको नमुना (म्याकेट) प्रतियोगिता गर्ने, महिला/दलित/जनजाति/पछाडि पारिएका वा सुविधाविहीनलगायत जनसमुदाय आदिको जागरणसम्बन्धी कार्यक्रम, शहीद दिवसको अवसर पारेर कला प्रदर्शनी आदि कार्यक्रम हुनेछ ।
प्रतिष्ठानले यसै वर्षबाट लुम्बिनी प्रदेशको दाङस्थित गढवा गाउँपालिकामा सेरामिक्स हब र वागमती प्रदेशको रामेछापस्थित सुनापति गाउँपालिकामा थांका कला हब बनाउने कार्यलाई अगाडि बढाएको जनाएको छ ।
प्रतिष्ठानका सदस्यसचिव देवेन्द्र थुम्केलीका अनुसार हबको सम्भाव्यता अध्ययनको कार्य अन्तिम चरणमा पुगेको छ । यसैगरी रेनोभेसन÷कन्जर्भेसन प्रशिक्षण, सिन्धुली कमलामाईस्थित कलाघर र पर्वत कुश्मास्थित शताब्दीघरसँग मिलेर कलासम्बन्धी कार्यक्रमसमेत गरिने जनाइएको छ ।
विज्ञप्तिमा प्रतिष्ठानका अनुसन्धान, लेखन तथा प्रकाशन विभाग, कला प्रवद्र्धन विभाग, लोककला विभाग, हस्तकला विभाग, मूर्तिकला विभाग, समसामयिक चित्रकला विभाग, परम्परागत चित्रकला विभाग, वास्तुकला तथा अन्य सिर्जनात्मक (बहुआयामिक) कला विभाग र राष्ट्रिय तथा अन्तर्राष्ट्रिय समन्यव विभागका विभागीय कार्यक्रमअन्तर्गत अन्तर्राष्ट्रिय तथा देशैभर कार्यशाला, कला प्रदर्शनी, गोष्ठी, खोज अनुसन्धानका कार्य अगाडि बढाइने उल्लेख छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच