‘वर्तमान राजनीतिक व्यवस्था रक्षा गर्नका लागि जनता जे गर्न पनि तयार छन्’

काठमाडौं । नेकपा एमालेले मध्यपहाडी (पुष्पलाल) लोकमार्ग केन्द्रित आफ्नो ‘समृद्धिका लागि संकल्प यात्रा’को उपलब्धि सार्वजनिक गरेको छ । बैतडीको झुलाघाटबाट गएको मंसिर १४ गते सुरु भएको संकल्प यात्रा यही पुस १ गते पाँचथरको चिवाभञ्ज्याङमा पुगेर समापन भएको थियो । केन्द्रीय कार्यालय च्यासलमा आइतबार आयोजित पत्रकार सम्मेलनमा एमालेले यात्राले पार्टी, कार्यकर्ता र स्थानीय नागरिकमा उत्साह देखिनुका साथै विकास, समृद्धि तथा राष्ट्रियतालाई जोड्न महत्वपूर्ण उपलब्धि हासिल गरेको जनाएको छ ।

पार्टीका अध्यक्ष केपी शर्मा ओलीले यात्रा असाधारण र अविस्मरणीय भएको बताउँदै मध्यपहाडी क्षेत्रको विकास र समृद्धिमा प्राथमिकता दिन सरकारसँग माग गर्नुभयो । वर्तमान राजनीतिक व्यवस्था रक्षा गर्नका लागि जनता तयार रहेको बताउनुभएको छ । अध्यक्ष ओलीले परिवर्तनका पक्षधर राजनीतिक दलहरूले आफ्नो सिद्धान्त र व्यवस्थाको रक्षाका लागि दह्रोसँग उभिनुपर्ने पनि धारणा राख्नुभएको हो । ओलीले जनताले पश्चगामी भाष्य अस्वीकार गर्ने बताउनुभयो । ‘लोकतन्त्रप्रति जनताको असाधारण विश्वास छ । लोकतान्त्रिक गणतन्त्रको रक्षाका निम्ति जनता जे गर्न पनि तयार छ,’ उहाँले भन्नुभयो ।

जनताले गलत राजनीतिक भाष्यलाई अस्वीकार गरेको पनि ओलीको भनाइ छ । उहाँले अहिले पनि राणा शासन ठिक भन्ने व्यक्तिहरू भेटिए भन्दैमा त्यो व्यवस्था सही हो भनेर लाग्न नसकिने स्पष्ट पार्नुभयो । ‘अहिलेसम्म पनि कोही-कोही मान्छेहरू राणा शासन नै राम्रो थियो भन्ने भेटिन्छन् । कोही-कोही पञ्चायत राम्रो थियो भन्ने भेटिन्छन्,’ उहाँले भन्नुभयो, ‘कोही-कोही राजतन्त्र फर्काउँछौँ, यो अवधिभित्र राजतन्त्र फर्काउँछौँ भन्छन् । तर यो संकल्प यात्राले राजनीतिक रूपमा गलत भाष्यहरूलाई अस्वीकार गरेको छ । तिनलाई निरर्थक र असान्दर्भिक बनाइदिएको छ ।’ अध्यक्ष ओलीले एमालेको संकल्प यात्राले सामाजिक सद्भाव, राष्ट्रिय एकता बिथोल्नका लागि गरिएका प्रयासलाई अस्वीकार गरिदिएको बताउनुभयो । उहाँले व्यवस्थाका पक्षमा जनता स्पष्ट रहेको भन्दै राजनीतिक दलहरूले दह्रो खुट्टा टेक्नुपर्ने स्पष्ट पार्नुभयो ।

‘सम्बन्ध स्थानीय, सन्देश राष्ट्रिय’को मर्म एवं भावनाअनुरूप यो अभियानका क्रममा जनसभा, जनभेला तथा भेटघाट, कलेज तथा विद्यालयका विद्यार्थीसँग छलफल भएको पार्टीले जनाएको छ । साथै एमालेले स्थानीय किसानसँग अन्तरक्रिया, कृषि वैज्ञानिकसँग संवाद, विकासका कामको अवलोकन र नमुना काम गरिरहेका उद्यमीसँग भेटघाट, ऐतिहासिक, धार्मिक र सांस्कृतिक स्थलको अवलोकन, नागरिकका अनुभूति, गुनासो र सुझाव संकलन गरेको छ । अभियानका क्रममा पहाडबाट भइरहेको तीव्र बसाइँसराइको पहिचान र समाधानको खोजी, सामाजिक सद्भाव र राष्ट्रिय एकताको प्रवद्र्धनमा सहयोग, मध्यपहाडको आर्थिक, सामाजिक, सांस्कृतिक, धार्मिक अवस्था तथा उद्योग, पर्यटन लगायतका सम्भावना बुझ्न सहयोग मिलेको एमालेका महासचिव शंकर पोखरेलले बताउनुभयो । संकल्प यात्रामा एमालेका शीर्ष नेतृत्व, केन्द्रीय पदाधिकारी, स्थायी कमिटी, पोलिटब्युरो र केन्द्रीय सदस्य तथा प्राविधिक टोलीको सहभागिता थियो ।

‘राज्यको सम्पत्ति डुबाउने खेल स्वीकार्य छैन’
प्रमुख प्रतिपक्षी दल एमालेका अध्यक्ष केपी शर्मा ओलीले सरकारले बेथिति गरेको छ भन्ने प्रश्न उठाउँदा ध्यान मोड्ने काम भएको भन्दै आपत्ति जनाउनुभएको छ । दूरसञ्चार सेवाप्रदायक कम्पनी एनसेलको सेयर बिक्रीमा अनियमितता र बेथिति भएको कुराबाट ध्यान मोड्न एनसेलका व्यापारीलाई आफ्नो पनि चिनजान रहेको भन्ने कुरा अगाडि सारिएको भन्दै ओलीले असन्तुष्टि जनाउनुभएको छ । ओलीले राज्यको सम्पत्ति डुबाउने खेल आफूलाई अस्वीकार्य हुने बताउनुभयो । ‘राज्यको सम्पत्ति केही व्यक्तिका फाइदाका लागि, केही व्यक्तिले फाइदा लिएर राज्यको सम्पत्ति डुबाउने काम रोकिनुपर्छ । संसदीय समितिमा र सार्वजनिक रूपमा पनि छलफल भइरहेको छ,’ उहाँले भन्नुभयोे, ‘लोकलाज त राखेर काम गर्नुपर्‍यो नि सरकारले । अब त कस्तो भयो भने तपाईंको सरकारले यस्तो बेथिति गर्‍यो भन्दा त्यो बेथिति गर्ने व्यापारीलाई त केपी ओलीले पनि चिन्या छ नि भन्छ । केपी ओलीले नेपालका व्यापारी किन चिन्दैन, चिन्छ नि त । बेथिति गर्नु र व्यापारी चिन्नु एउटै कुरा हो ?’

प्रधानमन्त्री पुष्पकमल दाहाल ‘प्रचण्ड’ले एनसेलको सेयर किन्ने व्यापारीको सिंगापुरस्थित घरमा केपी शर्मा ओली र शेरबहादुर देउवासँगै आफ्नो पनि बास भएको अभिव्यक्ति संसदीय समितिमा दिनुभएको थियो । राज्यव्यवस्था तथा सुशासन समितिको बैठकमा प्रधानमन्त्रीले दिएको उक्त अभिव्यक्तिको ओलीले आलोचना गर्नुभएको हो । एनसेलका विषयमा सरकारी निकायहरूको विरोधाभाषपूर्ण भनाइ आएको प्रति पनि ओलीले असन्तुष्टि जनाउनुभएको छ । उहाँले एनसेलको सेयर बिक्री भएको हो कि होइन भन्ने कुरा स्पष्ट पार्नुपर्ने बताउनुभयो ।