काठमाडौं । नेपाल उद्योग वाणिज्य महासंघ अन्तर्गतको पर्यटन तथा हवाई यातायात समितिले कानुन न्याय तथा संसदीय मामिलामन्त्री धनराज गुरुङलाई भेटी होटल व्यवसायलाई राष्ट्रिय प्राथमिकता प्राप्त उद्योगमा वर्गीकरण गरिदिन आग्रह गरेको छ । होटल क्षेत्रले ठूलो पुँजी लगानी गरी ठूलो संख्यामा रोजगारी दिनुका साथै अर्थतन्त्रमा टेवा दिने भन्दै समितिले यस्तो माग गरेको हो ।
महासंघका उपाध्यक्ष हेमराज ढकाल र पर्यटन तथा हवाई उड्यन समिति सभापति देशबन्धु बस्नेत अजितको नेतृत्वको प्रतिनिधिमण्डलले होटल व्यवसायलाई राष्ट्रिय प्राथमिकता प्राप्त उद्योग क्षेत्रमा समावेश गराउन आग्रह गरेको हो ।
यसअघि संस्कृति पर्यटन तथा नागरिक उडड्यन मन्त्रालयले मन्त्रिस्तरिय निर्णय गर्दै पर्यटनमूलक क्षेत्रमा रहेको ठूला तारे होटललाई औद्योगिक व्यवसाय ऐन २०७६ अनुरूप राष्ट्रिय मान्यता प्राप्त उद्योगका रूपमा वर्गीकरण गरिने भन्दै कानुन मन्त्रालय, अर्थ र उद्योग मन्त्रालयसँग राय माग गरेको थियो । सोही अनुरूप उद्योग मन्त्रालयले सचिवस्तरीय निर्णय गर्दै सहमति प्रदान गरिसकेको छ ।
त्यस्तै प्रतिनिधिमण्डलले विदेशी लगानी तथा प्रविधि हस्तान्तरण ऐन २०७५ मा विदेशी ब्राण्डहरूले रोयल्टीवापत कूल बिक्रीको पाँच प्रतिशत भन्दा बढी रोयल्टी शुल्क लैजान नपाउने व्यवस्थामा सहजीकरण गरिदिन आग्रह गरेको हो । पाँच प्रतिशत मात्रै रोयल्टी लैजान पाउने प्रावधानले मुलुकमा अन्तर्राष्ट्रिय होटल रिसोर्टको सञ्चालन हुन कठिन रहेको महासंघले जनाएको छ ।
समितिका सभापति बस्नेतले होटल व्यवसायसम्बन्धी विभिन्न संघसंस्थाबाट आएका सुझाबका आधारमा प्रतिवेदन तयार परेर यसअघि उद्योग वाणिज्य तथा आपूर्ति मन्त्रालयमा समेत ज्ञापनपत्र बुझाउनुभएको थियो । सोही अनुरूप उद्योग मन्त्रालयले मन्त्रिस्तरीय निर्णय गर्दै रोयल्टीमा देखिएको समस्या समाधानका लागि ऐन परिमार्जन गर्ने निर्णय गरिसकेको छ । यसअघि उक्त प्रतिनिधिमण्डलले अर्थमन्त्री डा.प्रकाशशरण महतलाई पनि भेटेको थियो । कानुन मन्त्री गुरुङले विदेशी पर्यटक भित्र्याउने ठूला तारे होटलाई उच्च प्राथमिकता साथ उद्योगका रूपमा समावेश गर्न आफूले पहल गर्ने प्रतिबद्धता जनाउनुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच