काठमाडौं । गैरआवासीय नेपाली संघ(एनआरएनए) को गत अक्टोबरमा सम्पन्न ११औँ महाधिवेशनबाट निर्वाचित नयाँ कार्यसमितिको ९० दिन पूरा भएको छ । विश्वका ५९ देशका महाधिवेशन प्रतिनिधिले पहिलोपटक अनलाइन मतदानमार्फत् निर्वाचित गरेका अध्यक्ष डा. बद्री केसीसहितको नयाँ कार्यसमितिले विविध अवरोधबीच पनि तीन महिनामा विभिन्न सामाजिक गतिविधि सञ्चालन गरेको छ । नोभेम्बर पहिलो साता ठूलो जनधनको क्षति हुने गरी गएको भूकम्प प्रभावित क्षेत्र जाजरकोट र रुकुम पश्चिममा एनआरएनएले स्वास्थ्य शिविरका साथै छात्रछात्रालाई न्यानो कपडालगायत एक करोड २४ लाख ६८ हजार रुपैयाँ बराबरको भौतिक तथा आर्थिक सहयोग गरेको थियो । एनआरएनएले भूकम्प प्रभावित क्षेत्रमा पुनर्निर्माणलगायत दीर्घकालीन सहयोगका लागि स्थानीय सरकारसँग समन्वय गरेर काम गरिरहेको छ ।
यसै साता कोशी प्रदेशको धरानमा, मधेश प्रदेशको जनकपुरमा गैरआवासीय नेपालीहरूको सहयोगमा संकलित रकमबाट ७० लाख रुपैयाँ पर्ने एक-एकवटा मोबाइल ब्लड बस हस्तान्तरण गरिएको र २६ जनवरीमा लुम्बिनी प्रदेशमा अर्को मोबाइल ब्लड बस हस्तान्तरण गर्ने तयारी रहेको पनि एनआरएनएले जनाएको छ । त्यसैगरी एनआरएनएले स्थापनाकालदेखि नै नेपाली राष्ट्रिय खेलाडीको मनोबल उच्च राख्न र खेल विकासका लागि आवश्यक सहयोग गर्दै आएको छ । सोही क्रममा टी-२० विश्वकपमा सहभागी नेपाली क्रिकेट खेलाडीको सहयोगका लागि नेपाल क्रिकेट एसोसिएसन (क्यान) मार्फत् हौसलास्वरूप १० लाख, नेपाली भलिबल राष्ट्रिय टिमका लागि आठ लाख, छैटौँ एनआरएनए सुदूर पश्चिम फुटबल प्रतियोगिताको सहयोगार्थ दुई लाख ५० हजार, पोखरा म्याराथनका लागि सात लाख ५० हजार, एनआरएनए इलाम गोल्ड कपका लागि पाँच लाख रुपैयाँ आर्थिक सहयोग घोषणा गरेको छ ।
त्यस्तै, धनगढीको सेती प्रादेशिक अस्पतालमा एक करोड २५ लाख, कञ्चनपुरको महाकाली प्रादेशिक अस्पतालमा एक करोड २५ लाख रुपैयाँ लागतमा अक्सिजन प्लान्ट स्थापना गरेको छ । वैदेशिक रोजगारीका क्रममा कंगोमा निधन भएका डोटीका सुरेश सिल्लाको परिवारको सहयोगार्थ एनआरएनए कंगोको सक्रियतामा संकलित २६ लाख ६१ हजार रुपैयाँ परिवारलाई राहतस्वरूप हस्तान्तरण गरेको छ ।
कञ्चनपुरको झलारीस्थित कृष्ण वैजनाथ बहुमुखी कलेजमा छात्रा शौचालय निर्माणका लागि २० लाख रुपैयाँ सहयोगका साथै सडक बालबालिकाको शिक्षा तथा बसोबासको सहयोगार्थ युसेफ नेपाल भक्तपुरमार्फत् सात लाख ५० हजार रुपैयाँ सहयोग प्रदान गरेको छ ।
एनआरएनए गैरआवासीय नेपाली नागरिकता, वैदेशिक रोजगार, सामाजिक सुरक्षा, १० अर्ब लगानीलगायतका विषयमा सरोकारवाला सरकारी निकाय र मन्त्रालयबीच छलफल तथा अन्तरक्रियाको तयारीमा समेत रहेको छ । एनआरएनएले सञ्चालन गरेका मोबाइल ब्लड बस, अक्सिजन प्लान्ट, जाजरकोट र भूकम्पपीडितको सहयोग, खेल क्षेत्रमा आर्थिक सहयोगलगायतको मानवीय काममा विगत ९० दिनमा करिब छ करोड ६५ लाख ९१ रुपैयाँ बराबरको आर्थिक सहयोग गरेको जनाएको छ ।
साथै एनआरएनएले आगामी दिनमा कोशी प्रदेश लगानी प्राधिकरणसँगको सहकार्यमा चियाको प्रवद्र्धन र प्राविधिक शिक्षामा सहकार्य गर्दै अघि बढ्ने प्रतिबद्धता जनाउँदै सुदूरपश्चिम प्रदेशमा आयोजना हुने लगानी सम्मेलनमा सहभागी हुन र सहकार्य गर्न विदेशमा रहेका नेपाली समुदायलाई आग्रहसमेत गरेको छ । एनआरएनएले आगामी कार्यक्रम तय गर्न जनवरी २१ र २२ काठमाडौंमा बैठक आयोजना गर्ने एनआरएनए अध्यक्ष डा. बद्री केसी, महासचिव गौरीराज जोशी र प्रवक्ता फणिन्द्र पन्तद्वारा शनिबार जारी संयुक्त प्रेस विज्ञप्तिमा उल्लेख छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच