भैरहवा । भैरहवाका विजयसागर श्रेष्ठ साहित्यकार हुनुहुन्छ । साहित्यमा दख्खल राख्ने श्रेष्ठको पछिल्लो समय साहित्य छाडेर क्रिकेटमा रुचि बढेको छ । भैरहवामा भइरहेको प्रधानमन्त्री कप क्रिकेट प्रतियोगितामा उहाँ दैनिक देखिनुहुन्छ । कहिले दर्शकदीर्घाबाट, कहिले विशिष्ठ व्यक्ति बस्ने प्यारापिटबाट उहाँ खेल नियालिरहेको भेटिनुहुन्छ । ‘आफ्नै नगरमा राष्ट्रिय प्रतियोगिता भइरहेको छ, यहाँ नआएर भयो त ?’, बुधबार हर्षित मुद्रामा भेटिनुभएका श्रेष्ठले भन्नुभयो ।
नेपालका लागि अन्तर्राष्ट्रिय प्रतियोगिता खेल्ने नेपाली क्रिकेट टोलीको अहिले भैरहवामा जमघट भएको छ । भैरहवामै राष्ट्रिय टोलीका खेलाडी पाएपछि यहाँका प्रंशसक पनि हौसिएका छन् । दर्शक नै नपाउने सिद्धार्थ क्रिकेट रंगशाला अहिले दर्शकले भरिभराउ छ । भैरहवामात्र होइन, रूपन्देहीका ग्रामीण क्षेत्रबाट पनि खेल हेर्न र राष्ट्रिय खेलाडीलाई भेट्न दर्शक भैरहवा आइपुग्ने गरेका छन् ।
खेल सुरु हुनुअघि र खेल समापनपछि रंगशालाबाहिर प्रंशसकहरू खेलाडीको एक झलक पाउन तथा उनीहरूसँग तस्वीर लिन लालयित हुने गरेका छन् । खेलाडीले पनि दर्शकको माया र हुटिङ पाएका छन् । दर्शकसँग फोटो खिचाउन खेलाडीलाई भ्याइनभ्याई छ । सिद्धार्थ क्रिकेट रंगशाला दर्शक र राष्ट्रिय खेलाडीको मिलन गराउने माध्यम बनेको छ । पहिलोपटक आयोजना भएको राष्ट्रियस्तरको प्रधानमन्त्री कप प्रतियोगिताले भैरहवा क्रिकेटमय भएको छ । खेलाडी पनि काठमाडौंबाहिर नयाँ खेलमैदान पाएपछि दंग छन् ।
त्रिभुवन आर्मी क्लबका कप्तानसमेत रहनुभएका राष्ट्रिय खेलाडी विनोद भण्डारी केही वर्षयता नै सिद्धार्थ रंगशाला परिवर्तन भएको प्रतिक्रिया दिनुभयो । ‘म करिब अढाई वर्षअघि यहाँ घरेलु प्रतियोगिता खेल्न आएको थिएँ, यो अढाई वर्षमा यहाँ धेरै परिवर्तन भइसकेको छ’, भण्डारीले भन्नुभयो, ‘पिच राम्रो बनेको छ, ‘आउटफिल्ड’ एकदमै राम्रो बनेको छ, दर्शकका लागि ‘स्टेण्ड’ पनि बनिसकेको रहेछ, यो यही रोकिनु भएन अझै अगाडि बढ्नुपर्छ ।’
उहाँले अहिले काठमाडौंमा मात्र अन्तर्राष्ट्रिय खेल भइरहेको अवस्थामा अब भैरहवा पनि यस्तो खेल खेलाउनसक्षम रहेको बताउनुभयो । भण्डारीले भैरहवाको पिच खेल्न योग्य रहेको बताउनुभयो । गत पुस २८ गतेदेखि प्रधानमन्त्री कप सुरु भएदेखि नै भैरहवाको पिचले घाम हेर्न पाएको थिएन । यसले गर्दा यहाँ रन धेरै बन्न सकेको थिएन । पिच राम्रो हुनलाई पानी र घाम हुनुपर्छ यसले ब्याटरहरूलाई रन बनाउन सहयोग गर्छ । आर्मीका कप्तान विनोद भण्डारीका अनुसार सिद्धार्थ रंगशालाको पिचले घाममात्र पाएको भए यहाँ उच्च अंक बन्ने थिए ।
आर्मीका कप्तानको जस्तै धारणा राष्ट्रिय टोलीका समेत कप्तान रहनुभएका सशस्त्र प्रहरीका रोहित पौडेलको पनि छ । उहाँले पनि भैरहवाको खेलमैदान राम्ररी तयार गरेको प्रतिक्रिया दिनुभयो । ‘विशेषगरी आउटफिल्ड खेल्नका लागि साह्रै राम्रो छ, पिचले घाम पनि पाएको छैन, यस्तो अवस्थामा पनि यति राम्रो विकेट तयार गर्नुभएको छ’, पौडेलले भन्नुभयो, ‘आउने दिनमा यहाँ अझै राम्रा खेल हुँदै जाउन्, हामी यहाँ नेपालका लागि खेल्न चाहन्छौँ ।’
पौडेल पिच तयार भइसकेको अवस्थामा रंगशालालाई बिस्तारै विकसित गरी लैजान सकिने बताउनुहुन्छ । ‘सिद्धार्थ क्रिकेट रंगशालामा अन्तर्राष्ट्रियस्तरका खेल हुने पिच छ’, उहाँले भन्नुभयो, ‘अब यसलाई ‘अपडेटेड’ गरेर यहाँको समिति कसरी अगाडि बढ्छ, त्यो महत्वपूर्ण पाटो हो ।’
सिद्धार्थ रंगशालामा अहिले छवटा पिच रहेका छन् । रूपन्देही क्रिकेट संघका अध्यक्ष हरिबहादुर थापाका अनुसार त्यसमध्ये तीनमा रातो माटो तीनवटामा पहेंलो माटो प्रयोग गरिएका पिच छन् । आठ वर्षअघि गुरुयोजनासमेत तयार भएको रंगशालामा अहिलेसम्म करिब १० करोड खर्च गरिसकिएको उहाँले बताउनुभयो । आफ्नै एकेडेमीसमेत तयार पार्ने लक्ष्यसहित रूपन्देही क्रिकेट संघले अहिले तीन सिमेन्ट पिच र दुई टर्स पिच निर्माण गरिसकेको छ ।
करिब साढे सात बिघा क्षेत्रफलमा फैलिएको रंगशालाको आठ वर्षअघि गुरुयोजना तयार भए पनि अहिलेसम्म करिब १० प्रतिशत मात्र काम हुनसकेको नेपाल क्रिकेट संघका पूर्वकार्यवाहक सचिव प्रशान्तविक्रम मल्लको भनाइ छ । तत्कालीन समयमा ३८ करोड लागत अनुमान गरिएको थियो । अहिले यसलाई पुनः मूल्यांकन गरी अगाडि बढ्नुपर्ने उहाँको धारणा छ ।
