ललितपुर । नेपाल कृषि अनुसन्धान परिषद् (नार्क) मा तरकारी बालीसम्बन्धी तालिम सुरु भएको छ । राष्ट्रिय बाली रोग विज्ञान अनुसन्धान केन्द्रअन्तर्गतको फिड द फ्युचर हर्टिकल्चर इनोभेसन ल्याब(तरकारीमा लाग्ने माटोजन्य रोगहरूको व्यवस्थापनबाट कृषकहरूको जीविकोपार्जन तथा खाद्य सुरक्षामा सुधार) र युएसएआइडीको आर्थिक सहयोगमा आयोजित सातदिने तालिम आइतबारदेखि सुरु भएको हो । तालिम कार्यक्रममा अमेरिका, क्यानडा र ताइवानका कृषिविज्ञले तरकारीको बिउको प्रविधि र क्षमता अभिवृद्धिलगायत विषयमा प्रशिक्षण दिने आयोजकले जनाएको छ ।
माघ २७ गतेसम्म सञ्चालन हुने तालिमबाट बाली सुधारका लागि नयाँ विकास जातको कार्यक्रमलाई तीव्र गतिमा लैजान सहयोग पुग्ने राष्ट्रिय बाली रोग विज्ञान अनुसन्धान केन्द्रका वैज्ञानिक डा. रामबहादुर खड्काले जानकारी दिनुभयो । तालिममा सरकारी र निजी क्षेत्रका ३० जनाको सहभागिता छ । खड्काका अनुसार विश्वविद्यालयबाट पाँच, नार्कबाट १५, संघीय तथा प्रादेशिक सरकारी निकायबाट छ र निजी बिउ उत्पादक कम्पनीबाट चारजनाको सहभागिता रहेको छ । नार्कको परियोजना कार्यान्वयन इकाईले कार्यान्वयन गर्ने मिटिगेटिङ स्वायल-वर्न डिजिज टु इम्प्रुभ स्मलहोल्डर फार्मर्स लाइभ्लीहुड एण्ड फुड सेक्युरिटी नेपाल नामक परियोजनाअन्तर्गत तालिम कार्यक्रम आयोजना गरिएको हो ।
तालिम कार्यक्रम उद्घाटन गर्दै कृषि तथा पशुपन्छी विकासमन्त्री डा. बेदुराम भुसालले (नार्क)का युवा वैज्ञानिकलाई उच्च मनोबलका साथ काम गर्न र नेपाली कृषकको आयस्तरमा सुधार ल्याउने गरी अनुसन्धान प्रभावकारी बनाउन आग्रह गर्नुभयो । नार्कलाई उत्कृष्ट अनुसन्धान केन्द्र बनाउन मन्त्रालय तत्पर रहेको भन्दै नार्कबाट सोहीअनुरूपको योजना र कार्यक्रमको अपेक्षा गरेको पनि उहाँले बताउनुभयो । कृषि मन्त्रालयका सचिव रेवतीरमण पौडेलले तालिमले नेपालका वैज्ञानिकहरूले नेपालमा रहेका विभिन्न बालीका रैथाने जात उपयोग गर्दै उन्नत जातको विकास गरी तिनको उत्पादनमार्फत् निर्यात गर्न सकिने सम्भावना रहेको बताउनुभयो ।
नार्कका कार्यकारी निर्देशक डा. ध्रुवराज भट्टराईले नार्कले आयात प्रतिस्थापन गर्न मद्दत पुग्ने अनुसन्धानका कार्यक्रम ल्याउने र नार्कका युवा वैज्ञानिकले अन्तर्राष्ट्रियस्तरका अनुसन्धान परियोजना ल्याउन र लागू गर्न सजिलो हुने वातावरण तयार गर्न लागेको बताउनुभयो । सो अवसरमा राष्ट्रिय बालीरोग विज्ञान अनुसन्धान केन्द्रका प्रमुख सुरज वैद्य, वैज्ञानिक एवं सहपरियोजना संयोजक डा. रञ्जना रावल, राष्ट्रिय कृषि प्रविधि सूचना केन्द्रका प्रमुख डा. कालिकाप्रसाद उपाध्यायलगायतको उपस्थिति रहेको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच