टेलिकमको २० औँ वार्षिकोत्सव

काठमाडौं । नेपाल टेलिकमका प्रबन्ध निर्देशक संगीता पहाडी (अर्याल) ले कम्पनीले प्रदान गर्ने दूरसञ्चार सेवालाई थप आकर्षक र गुणस्तरीय बनाउन हाइवे नेटवर्क सुधार कार्यका साथै हरेक जिल्लाको नेटवर्क सुधार गर्ने उद्देश्यले १९ जिल्लालाई नमुना टेलिकम घोषणा गरी सुधार कार्यलाई तीव्रता दिइएको बताउनुभएको छ । नेपाल टेलिकमको २०औँ वार्षिकोत्सवका अवसरमा सोमबार आयोजित कार्यक्रममा उहाँले कम्पनीले ७७ वटै जिल्लामा ताररहित फोरजी एलटिई प्रविधिमा आधारित मोबाइल र डाटा सेवा तथा ७४ जिल्लामा अप्टिकल फाइबरमा आधारित एफटिटिएच सेवा सञ्चालनमा ल्याए पनि ग्राहक संख्या बढेर तीन लाख ३६ हजार पुगेको बताउनुभयो ।

सेवालाई थप आकर्षक र गुणस्तरीय बनाउन हाइवे नेटवर्कका साथै हरेक जिल्लाको नेटवर्क सुधार गर्ने उद्देश्यले १९ जिल्लालाई नमुना टेलिकम घोषणा गरी सुधार कार्यलाई तीव्रता दिइएको प्रबन्ध निर्देशक पहाडीले बताउनुभएको छ ।

कम्पनीले आगामी दिनमा विभिन्न सामुदायिक विद्यालयमा आइसिटी ल्याबको स्थापना, एफटिटिएच डाटा तथा नमस्ते वाईफाई उपलब्ध गराइने र वीर अस्पताललगायत सामुदायिक अस्पतालमा कुरुवाका लागि वेड–कम चेयर उपलब्ध गराउने कार्यक्रम रहेको पनि उहाँले जानकारी गराउनुभयो । प्रबन्ध निर्देशक पहाडीका अनुसार २० वर्षअघि कम्पनी स्थापना हुँदा ग्राहक आधार करिब चार लाख २२ हजार रहेकोमा हाल ग्राहक आधार बढेर दुई करोड १८ लाखभन्दा बढी पुगेको छ भने मुलुकका अधिकांश भू-भागमा टेलिकमका कुनै न कुनै सेवाको पहुँच पुगिसकेको छ ।

सञ्चार तथा सूचना प्रविधिमन्त्री रेखा शर्माले ग्राहकको चाहनाअनुरूप सर्वसुलभ तथा भरपर्दोरूपमा सेवा प्रदान गर्ने खालका नीति, योजना र कार्यक्रम सञ्चालन गर्दै कम्पनीको आय वृद्धिमा समेत ध्यान दिन निर्देशन दिनुभयो । सरकारको डिजिटल नेपालको अवधारणा साकार पार्न कम्पनीका कार्यक्रम परिलक्षित रहेको भन्दै उहाँले कम्पनीको ऐतिहासिक विरासत कायम राख्न सम्पूर्ण संयन्त्र परिचालन गर्न निर्देशन दिनुभएको हो ।

सञ्चार तथा सूचना प्रविधि मन्त्रालयका सचिव तथा कम्पनी सञ्चालक समिति अध्यक्ष रामकृष्ण सुवेदीले कम्पनीले संस्थागत सुशासन कायम गर्दै गुणस्तरीय सेवा प्रदान गर्ने कार्यलाई निरन्तरता दिनुपर्ने बताउनुभयो । आन्तरिक कार्य चुस्त बनाउँदै निर्णय प्रक्रिया, कार्य पद्धति र संस्थागत संरचनामा सुधार गरी प्रगतिशील संस्थाका रूपमा कम्पनीलाई विकास गर्नुपर्ने उहाँको जोड थियो ।

नेपाल दूरसञ्चार प्राधिकरणका कार्यवाहक अध्यक्ष नवराज अधिकारीले नेपालमा दूरसञ्चार सेवाको विकास र विस्तारमा नेपाल टेलिकमको अहं भूमिका रहेको चर्चा गर्दै प्रविधिको परिवर्तनसँगै कम्पनीलाई समयसापेक्ष सुधारमा जोड दिनुभयो । जसका लागि नियामक निकाय सहयोग, समन्वय र सहजीकरणका लागि तयार रहेको पनि उहाँले बताउनुभयो । सञ्चालक समितिका सदस्य (कर्मचारी प्रतिनिधि) शंकर लामिछानेले प्रतिस्पर्धी वातावरणमा मन्त्रालयलगायत नियामक निकायबाट कम्पनीका लागि आवश्यक नीति निर्माण गर्न र कम्पनीलाई अग्रणी दूरसञ्चार सेवाप्रदायकका रूपमा राखिरहन आवश्यक सहयोग हुनुपर्ने बताउनुभयो ।

कम्पनीले हाल सञ्चालनमा रहेको च्याटबोटलाई स्तरोन्नति गरी एआई प्रविधिको एलएलएम (लार्ज ल्यांग्वेज मोडल) मा आधारित च्याटबोट सञ्चालनमा ल्याउने तयारी अन्तिम चरणमा रहेको जनाएको छ । त्यस्तै, हाल कम्पनीले बबरमहल, सुन्धारा, पोखरा तथा वीरगञ्जमा फाइभजी उपकरणहरू जडान सम्पन्न गरी परीक्षण कार्यसमेत सम्पन्न गरेको छ । बाँकी चार प्रदेशमा समेत उपकरण जडान गर्नका उपकरण आयातको अनुमतिका लागि नेपाल दूरसञ्चार प्राधिकरणलाई अनुरोध गरिसकेको र आगामी दिनमा फोरजी सेवा विस्तार र फाइभजी पनि क्रमशः परीक्षण र विस्तार गर्ने प्रतिबद्धता जनाएको छ ।

कम्पनीले दूरगामी प्रभाव पार्ने रणनीतिक आयोजना मध्यपहाडी लोकमार्ग अप्टिकल फाइबर, डाटा सेन्टर, अत्याधुनिक तालिम तथा अनुसन्धान केन्द्र, फोरजी विस्तार, फाइभजी परीक्षण, डिजिटल मार्केटिङ, नयाँ भ्यालु एडेड सर्भिस, नमुना टेलिकम सेवालगायतलाई विशेष प्राथमिकता साथ कार्यान्वयन गरिने जनाएको छ ।

कम्पनीको खुद नाफा आठ अर्ब
आर्थिक वर्ष २०७९/०८० मा कम्पनीको कुल आय ४४ अर्ब ४२ करोड पुगेको छ भने कम्पनीको खुद मुनाफा करिब आठ अर्ब अर्थात् सात अर्ब ९२ करोड रहेको छ । चालु आर्थिक वर्षको पुससम्म कम्पनीले करिब २० अर्ब ५३ करोड रुपैयाँ राजस्व प्राप्त गरेको छ । आर्थिक वर्ष २०७९/०८० मा कर तथा गैरकर गरी कम्पनीले २८ अर्ब ४६ करोड रकम योगदान गरेको जनाएको छ ।