काठमाडौं । अमेरिकी अन्तर्राष्ट्रिय सहयोग नियोग (युएसएड) नेपालकी निर्देशक सेपिदे केभान्सादले नेपालले दातृ संस्थाबाट प्राप्त सहयोगको जिम्मेवारीपूर्ण कार्यान्वयन गर्न नसकेको बताउनुभएको छ । नेपाल इन्स्टिच्युट फर इन्टरनेसनल को-अपरेसन एण्ड इन्गेजमेन्ट संस्थाद्वारा ललितपुरमा आयोजित एक कार्यक्रममा बोल्दै उहाँले यस्तो बताउनुभएको हो । सन् १९५१ मा अमेरिका र नेपालबीच भएको विकास सम्झौतापछि दुई देशबीच कूटनीतिक सम्बन्ध विस्तार भएको थियो । सेपिदेले विगतका वर्षमा अमेरिकाले युएसएडमार्फत् गर्ने सहयोगको प्रकृति र वर्तमान समयमा गर्ने सहयोगको प्रकृति र कार्यशैलीमा परिवर्तन आएको बताउनुभयो ।
विगतमा अमेरिकाले युएसएडमार्फत् नेपालमा आवश्यक पूर्वाधारको विकासका लागि आर्थिक तथा प्राविधिक सहयोग गर्ने गरेकामा हाल युएसएडले नेपाल सरकारका परियोजनामा आर्थिक, प्राविधिक सहयोग गर्ने गरेको उहाँको भनाइ थियो । वर्तमान समयमा युएसएडलगायतका अन्य विकासका साझेदारले नेपालले वर्गीकरण गर्ने प्राथमिक क्षेत्रको विकासका लागि काम गरेको पनि सेपिदेले बताउनुभयो ।
पूर्वाधार विकासका क्रममा विगतमा युएसएडले निश्चित समुदायका लागि निश्चित योजना निर्माण गरी लागू गरेको र हाल कुनै समुदाय लक्षित भएर निर्माण गरिने परियोजनामा त्यहाँका स्थानीय बासिन्दा सहभागी बनाई काम गर्दै आएको सेपिदेको भनाइ थियो ।
नेपालमा संघीयता लागू भएपछि युएसएडले स्थानीय सरकार, नगरपालिका, गाउँपालिकासँग प्रत्यक्ष आबद्ध भई काम गरेको जानकारी गराउँदै उहाँले परिवर्तनशील समयसँगै दुई देशबीचको सम्बन्धले पनि विभिन्न चरण पार गर्दै आएको बताउनुभयो ।
नेपाल लामो समयदेखि सहयोग लिने पक्षमा रहेका कारण उक्त भूमिकामा परिवर्तन गरी एक जिम्मेवार साझेदारको भूमिका परिपक्वरूपमा निर्वाह गर्न नसकेको सेपिदेले गुनासो गर्नुभयो ।
उहाँले भन्नुभयो, ‘नेपालमा विविधता धेरै छ, भौगोलिक विविधताका कारण सबै क्षेत्रहरू एकनासले विकास हुन सकेका छैनन् । थोरै फण्डमा धेरै विकास गर्नुपर्नेछ । शिक्षाको विकासका लागि पूर्वाधार छैन, स्वास्थ्य क्षेत्रको सुधारका लागि पूर्वाधार विकासकै कमी छ, कृषि क्षेत्रमा आधुनिकीकरण हुन सकेको छैन । त्यसैले विकास नहुनुमा प्राविधिक कमी कमजोरी छन् तर विकास नहुनुको सबैभन्दा ठूलो कारण मानिसहरूको मानसिकता परिवर्तन नहुनु हो । मानिसहरूको सोच्ने शैलीमा परिवर्तन आउन सकेको छैन । मानिसहरूले आफ्नो ठाउँको विकासको उत्तरदायित्व लिन सकेका छैनन् । जसकारण नेपालको विकास पछाडि परिरहेको छ ।’
जलविद्युत्मा नेपालको क्षमता प्रचुर रहेको भन्दै उहाँले कुनै पनि आयोजना निर्माणअघि परियोजनाले वातावरण र स्थानीय बासिन्दामा पार्ने असरको पनि अध्ययन हुनुपर्ने बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच