काठमाडौं । कीर्तिपुर नगरपालिका वडा नं. ५ का एक स्थानीयको निजी जमिन मिचेर वडाले बाटो बनाएपछि न्यायको माग गर्दै अदालत पुगेका छन् । वडा कार्यालयमै छलफल गरी टुंगिनुपर्ने विषय भए पनि वडाध्यक्षले घटनालाई प्राथमिकता नदिँदा स्थानीय विदुर महर्जन अदालत पुग्नुभएको हो । करिब एक वर्षदेखि सो घटनाका विषयमा वडा कार्यालय, नगरपालिका तथा सम्बन्धित निकायमा धाउँदा पनि आफूले न्याय नपाएपछि अन्ततः अदालतको ढोकामा पुगेको उहाँले दुखेसो पोख्नुभयो ।
वडा कार्यालयले कीर्तिपुरको राराहिल-जाखा सडक स्तरोन्नतिका लागि १४ फिट बाटो निर्माण गरेको थियो । सो बाटो गोरेटो भए पनि दुवै साइडबाट बराबर फराकिलो बनाउनुपर्नेमा स्थानीय विदुर महर्जनको निजी जमिनलाई प्रभाव पर्ने गरी वडाले सडक निर्माण गरेको पीडितको आरोप छ । वडाले नक्साका आधारमा १४ फिट बाटो निर्माण गरी फराकिलो बनाउँदै ग्राभेल गरेको थियो । पीडित महर्जनले वडाको निर्णय चित्त नबुझेको भन्दै वडा कार्यालय, नगरपालिकाको न्यायिक समितिमा निवेदन दिनुभएको थियो ।
निवेदनमाथि न्याय नभएको भन्दै पीडित महर्जन जिल्ला अदालत काठमाडौं पुग्नुभएको हो । सामान्य बाटो निर्माण गर्दा स्थानीयको सहमति जुटाउनुपर्ने, दुवै पक्षलाई सँगै राखेर बराबर कटान गर्नुपर्नेमा एकलौटी निर्णय भएको भन्दै पीडित महर्जनले अदालतमा मुद्दा दायर गर्नुभएको थियो । सो मुद्दा अहिले जिल्ला अदालत काठमाडौंमा विचाराधीन रहेको छ ।
यही बुधबार महर्जनले जिल्ला अदालतको आदेशमा पुनः जग्गाको नक्सांकन गर्नुभएको छ । सरकारी प्राविधिकहरूले जग्गाको पुनः नक्सांकन गरेको पीडित महर्जनले बताउनुभयो । स्थानीय भोला महर्जनले भने ‘स्थानीयलाई बाटो चाहिन्छ तर विकासका नाममा एउटैलाई मात्रै मर्का पार्नुहुँदैन ।’ उहाँले भन्नुभयो, ‘वडाले समन्वय गरिदिएको भए घटना अदालतसम्म पुग्ने थिएन ।’ अदालतको फैसला जे जस्तो आए पनि मिलेर जानुको विकल्प नभएको उहाँको भनाइ छ । पीडित महर्जनले बाटो निर्माणमा आफ्नो अवरोध नभएको तर बराबर हिस्सा हुनुपर्ने बताउनुभयो । उहाँले भन्नुभयो, ‘विकासको विरोधी म होइन, स्थानीय सरकारका प्रतिनिधिले मिलाउन नखोजेपछि अदालत जानुपर्ने बाध्यता भएको हो’ ।
उहाँले भन्नुभयो, ‘कि.नं. ६९४ को क्षेत्रफल ०-१०-२ जग्गाबाट साबिकको चलनचल्तीमा रहेको गोरेटो बाटोलाई फराकिलो बनाउने भन्दै निजी जग्गालाई मास्न मिल्छ ?’ उहाँले एकतर्फ बाटो बनाउँदा साबिकको भन्दा दुई आना बढी जग्गा आफ्नो मात्रै काटिएको बताउनुभयो । यता वडाध्यक्ष राजेन्द्रकुमार महर्जनले वडा कार्यालयले नक्साअनुसार नै काम गरेको बताउनुभयो । २०४७ सालबाटै यस क्षेत्रमा १४ फिट बाटो भएकाले सोहीअनुरुप काम गरेको उहाँको भनाइ छ । उहाँले भन्नुभयो, ‘स्थानीय सरकारले न्यायअनुसार काम गरेको छ, यहाँको जग्गामा कुनै असर परेको छैन, नक्सामा जस्तो छ, त्यसलाई मिलाएको हो । वडाको विकासमा कसैले रोक्न मिल्दैन ।’
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच