काठमाडौं । तनहुँ हाइड्रोपावर लिमिटेडले निर्माण गर्ने १२६ मेगावाटको तल्लो सेती आयोजनाअन्तर्गत अडिट सुरुङका लागि सम्झौता भएको छ । आयोजनाको ३७५ मिटर लामो अनुसन्धनात्मक अडिट सुरुङ निर्माणका लागि बिहीबार निर्माण व्यवसायी आरके इञ्जिनियरिङ एण्ड एसोसिएटसँग खरिदसम्बन्धी सम्झौता भएको हो । १४० मेगावाटको तनहुँ जलविद्युत् आयोजना निर्माण गरिरहेको कम्पनीले नै उक्त आयोजना पनि निर्माण गर्दैछ ।
आयोजनाको अडिट सुरुङ निर्माणका लागि आरके इञ्जिनियरिङ एण्ड एसोसिएटसँग सम्झौता गरिएको कम्पनीका प्रबन्ध सञ्चालक किरणकुमार श्रेष्ठले बताउनुभएको छ । कम्पनीका अनुसार तल्लो सेतीको मुख्य पानी लैजाने मुख्य सुरुङ ६.७ किलोमिटर लामो बन्नेछ । अनुसन्धानका लागि निर्माण गरिने सुरुङ निर्माण सुरु भएपछि अन्य काममा प्रयोग गर्न सकिने बताइएको छ ।
डेढ वर्षभित्र सुरुङ निर्माण गरिसक्ने योजनाअनुसार काम सुरु गरिएको कम्पनीले जनाएको छ । उक्त जलविद्युत् आयोजनामा जापान अन्तर्राष्ट्रिय सहयोग नियोग (जाइका) र एसियाली विकास बैंक (एडिबी) ले लगानीका लागि चासो देखाएका छन् । आयोजना निर्माण गर्न २५ अर्ब रुपैयाँ लागत अनुमान गरिएको छ ।
आयोजनाअन्तर्गत बन्दीपुर गाउँपालिका-६ र देवघाट गाउँपालिका-३ साराङघाट नजिकै रहेको सेती नदीमा ३२ मिटर अग्लो बाँध निर्माण गरिनेछ । आयोजनाबाट बन्दीपुर-६, व्यास नगरपालिका-१३ र १४, देवघाट-२, ३ र ४, ऋषिङ गाउँपालिका-१ र ३, आँबुखैरेनी गाउँपालिका ५ र ६, भरतपुर महानगरपालिका २९ का केही भाग प्रभावित हुनेछन् । अर्धजलाशययुक्त तल्लो सेती आयोजनाको करिब १२ किलोमिटर लामो जलाशय माथिल्लो तटीय क्षेत्र अर्थात् बाँधस्थलबाट सुँडेगाउँसम्म विस्तार हुने कम्पनीले जनाएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच