काठमाडौं । चैते दशैँका अवसरमा बागलुङमा पुरुष भलिबल हुने भएको छ । भलिबल प्रतियोगितामा प्रथम पुरस्कार तीन लाख, द्वितीय पुरस्कार एक लाख ५० हजार र तृतीय पुरस्कार एक लाख रुपैयाँ तोकिएको छ । हालसम्म भलिबल प्रतियोगितामा १५ समूहले सहभागी हुन नाम दर्ता गरेको आयोजकले जनाएको छ । लोकदोहोरी, छेलो फाल्नेलगायतका प्रतियोगिता हुने बताइएको छ ।
चैते दशैँका अवसरमा बागलुङमा हुने ‘चैत्राष्टमी मेला-२०८०’ आउँदो चैत ३० गतेदेखि वैशाख ६ गतेसम्म हुने भएको हो । आयोजक संस्था कालिका भगवती गुठी व्यवस्थापन समिति, बागलुङले काठमाडौंमा पत्रकार सम्मेलन गर्दै मेलाको तयारी पूरा भएको जानकारी दिएको हो ।
समितिले चैते दशैँका अवसरमा हरेक वर्ष बागलुङको कालिका भगवती मन्दिर परिसरमा यस्तो मेला गर्दै आएको छ । यसलाई बागलुङको पहिचान बोकेको ऐतिहासिक मेलाका रूपमा लिइन्छ । यो वर्षको मेलाको उद्घाटन गर्न प्रधानमन्त्री पुष्पकमल दाहाल ‘प्रचण्ड’लाई निमन्त्रणा गरिसकिएको आयोजकले जनाएको छ । मेलाको मुख्य प्रायोजक ग्लोबल आइएमई बैंक रहेको छ ।
‘गन्तव्य बागलुङ कालिका–कला, संस्कृतिको प्रवद्र्धन, स्थानीय उत्पादन, व्यापार र प्रवद्र्धन’ भन्ने नारासहित मेला गर्न लागिएको हो । मेलाका कारण डालो, नाङ्लो, खुकुरीजस्ता स्थानीय उत्पादनको बजार प्रवद्र्धनमा सहयोग पुग्ने समितिका अध्यक्ष कुमार खड्काले बताउनुभयो । ‘यसका अलावा मेलाले बागलुङको पर्यटन तथा कृषि क्षेत्रको प्रवद्र्धनमा पनि सहयोग पुग्ने अपेक्षा गरेका छौँ,’ उहाँले भन्नुभयो ।
समितिका सल्लाहकारसमेत रहनुभएका कलाकार लक्ष्मणश्रीले मेलाका कारण स्थानीय कला, संस्कृति र परम्पराको जगेर्ना गर्ने बताउनुभयो । बागलुङको पर्यटन प्रवद्र्धनमा पनि मेलाले सहयोग पुग्ने उहाँको भनाइ छ ।
पत्रकार सम्मेलनमा कलाकारहरू थानेश्वर गौतम, जुना श्रीस, राजेश बर्देवा, सुवास केसी तथा पत्रकार राजु सुवेदीले मेलाको सफलताका लागि शुभकामना दिनुभएको थियो ।
यसैगरी, दोहोरी गीत प्रतियोगितामा प्रथम पुरस्कार दुई लाख, द्वितीय पुरस्कार एक लाख र तृतीय पुरस्कार ५० हजार रुपैयाँ तोकिएको छ । दोहोरी प्रतियोगितातर्फको पुरस्कार नेपालमा हालसम्मकै उच्च रहेको आयोजकको दाबी छ । यसमा हालसम्म ३३ समूह दर्ता भएका छन् ।
छेलो फाल्नेतर्फ प्रथम पुरस्कार ११ हजार एक सय ११ रुपैयाँ र द्वियीय पुरस्कार पाँच हजार पाँच सय ५५ तोकिएको छ । मेलामा खुला माविस्तरीय नृत्य प्रतियोगिता पनि हुनेछ । जसमा प्रथम पुरस्कार २० हजार, द्वितीय पुरस्कार १० हजार, तृतीय पुरस्कार पाँच हजार र सान्त्वता दुई हजार रुपैयाँ प्रदान गरिनेछ । यसका अलावा स्थानीय तथा राष्ट्रिय कलाकारको सांगीतिक प्रस्तुतिसमेत मेलामा हुनेछ । सात दिनसम्म सञ्चालन हुने मेलामा दर्शकहरू निःशुल्क प्रवेश गर्न सक्नेछन् । झण्डै ६० लाख रुपैयाँ बराबरको खर्चमा यो मेला गर्न लागिएको बताइएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच