भारतबाटै ओमानतर्फ नेपाली क्रिकेट टोली

काठमाडौं । भारत भ्रमणमा रहेको नेपाली राष्ट्रिय क्रिकेट टोली त्यहीँबाट ओमान जाने भएको छ । राज्यस्तरीय क्लबसँग त्रिकोणात्मक टी-२० शृंखला खेल्न नेपाली टोली भारत भ्रमणमा गएको थियो । ‘एसएमएस फ्रेण्डसिप कप’ नाम दिइएको उक्त त्रिकोणात्मक शृंखलाको उपाधि पनि नेपालले आफ्नो पोल्टामा पार्न सफल भएको छ । त्रिकोणात्मक शृंखला सकिएपछि अब नेपाली टोली भारतबाटै अर्को महत्वपूर्ण प्रतियोगिता ‘एसिसी प्रिमियर कप’ खेल्न ओमान प्रस्थान गर्न लागेको हो । एसिसी प्रिमियर कपको दोस्रो संस्करण अप्रिल १२ देखि २१ तारिखसम्म ओमानमा आयोजना हुँदैछ ।

नेपाल एसिसी प्रिमियर कपको साबिक विजेता पनि हो । एसिसी प्रिमियर कपको पहिलो संस्करण एक वर्षअघि नेपालमै आयोजना भएको थियो । उक्त संस्करणको फाइनलमा नेपालले संयुक्त अरब इमिरेट्स (युएई) लाई सात विकेटले हराएको थियो ।

अघिल्लो संस्करणमा पनि नेपाल प्रिमियर कपको विजेता बन्दै एसिया कपमा छनोट भएको थियो । एसिया कपमा छनोट भएको एसोसिएट्स सदस्य राष्ट्रले आफूभन्दा निकै बलिया टेस्ट राष्ट्रहरूसँग भिडन्त गर्ने अवसर पाउँछ ।

एसिया कपमा भारत, पाकिस्तान, श्रीलंका, बंगलादेश र अफगानिस्तानले सहभागिता जनाउँछन् । नेपालले सन् २०२३ मा पनि एसिया कप खेल्ने अवसर पाएको थियो । त्यतिबेला नेपाल एसिया कपको समूह ‘ए’ मा परेको थियो । नेपालको समूहमा विश्व क्रिकेटका दुई चिरप्रतिद्वन्द्वी राष्ट्र भारत र पाकिस्तान पनि थिए ।

भारत र पाकिस्तानविरुद्धको खेलमा नेपाली खेलाडीको प्रदर्शन पनि उत्कृष्ट थियो । यद्यपि, दुवै खेलमा नेपाली टोली पराजित भएको थियो । खासगरी भारतविरुद्धको खेलमा नेपाली ब्याट्सम्यानले उत्कृष्ट प्रदर्शन गरेका थिए । पाकिस्तानविरुद्धको खेलमा भने नेपाली बलरहरूले गतिलो प्रदर्शन गरेका थिए ।

एसिसी प्रिमियर कपको आगामी संस्करणले यसै वर्षको जुनमा अमेरिका र वेस्ट इण्डिजमा आयोजना हुने आइसिसी टी–२० विश्वकपको तयारीलाई पनि सहयोग पुर्‍याउनेछ ।

आगामी टी-२० विश्वकपमा नेपालले पनि सहभागिता जनाउँदै छ । यसपटक एसिसी प्रिमियर कपमा सहभागी हुने अर्को एक राष्ट्र ओमानले पनि टी-२० विश्वकपमा सहभागिता जनाउनेछ । टी-२० विश्वकपमा सहभागी यी दुवै राष्ट्रका लागि एसिसी प्रिमियर कप आफ्नो प्रदर्शनमा सुधार ल्याउने सुनौलो अवसर हो ।

एसिसी प्रिमियर कपमा १० टोलीले सहभागिता जनाउँदै छन् । नेपालसहित आठ राष्ट्र एसोसिएट्स सदस्य राष्ट्रहरूको आइसिसी वरीयताका आधारमा प्रतियोगितामा छनोट भएका हुन् । बाँकी दुई राष्ट्र साउदी अरेबिया र कम्बोडिया भने एसिसी पुरुष च्यालेन्ज कपबाट एसिसी प्रिमियर कपमा छनोट भएका हुन् ।

यसपटक एसिसी प्रिमियर कपमा नेपालसँगै हङकङ, मलेसिया, साउदी अरेबिया र कतार समूह ‘ए’ मा परेका छन् । प्रतियोगिताको समूह ‘बी’ मा भने बहराइन, कम्बोडिया, कुवेत, आयोजक ओमान र संयुक्त अरब इमिरेट्स (युएई) छन् ।

प्रतियोगितामा नेपालले आफ्नो पहिलो खेल अप्रिल १२ तारिखमा मलेसियासँग खेल्नेछ । अप्रिल १३ तारिखमा नेपाल र कतारबीच खेल हुनेछ । अप्रिल १५ तारिखमा नेपालले आफ्नो तेस्रो खेल हङकङसँग खेल्नेछ । नेपालले समूहगत चरणको अन्तिम खेल अप्रिल १७ तारिखमा साउदी अरेबियासँग खेल्नेछ ।

समूहगत चरणको समाप्तिपछि दुवै समूहबाट दुई-दुई टोली प्रतियोगिताको सेमिफाइनलमा प्रवेश गर्नेछन् । दुवै सेमिफाइनल खेल अप्रिल १९ तारिखमा खेलिनेछ । सेमिफाइनलमा विजयी हुने टोली फाइनलमा पुग्नेछ भने पराजित दुई टोलीबीच अप्रिल २० तारिखमा तेस्रो स्थानका लागि खेल हुनेछ ।

प्रतियोगिताको फाइनल खेल अप्रिल २१ तारिखमा खेलिनेछ । हाल भारत भ्रमणमा रहेको नेपाली टोलीले नै एसिसी प्रिमियर कप खेल्ने नेपाल क्रिकेट संघ (क्यान) ले यसअघि नै स्पष्ट पारिसकेको थियो ।

प्रतियोगिताका लागि घोषित नेपाली टोलीमा रोहितकुमार पौडेल (कप्तान), आसिफ शेख, कुशल भुर्तेल, कुशल मल्ल, विवेक यादव, सन्दीप जोरा, अनिल साह, गुलसन झा, दीपेन्द्रसिंह ऐरी, ललित राजवंशी, करण केसी, सोमपाल कामी, प्रतिश जिसी, अविनाश बोहरा र आकाश चन्द हुनुहुन्छ । नेपाली टोलीको प्रशिक्षकमा भारतका मोन्टी देसाई रहनुभएको छ ।