काठमाडौं । सरकारले तीनजना सहसचिवलाई सचिवमा बढुवा गरेको छ । लोकसेवा आयोगका अध्यक्ष माधवप्रसाद रेग्मीको अध्यक्षतामा बसेको बढुवा सिफारिश समितिको बैठकले सिफारिश गरेका प्रशासन सेवातर्फ रिक्त एक सचिवमा केदारनाथ शर्मा, लेखापरीक्षकतर्फ रिक्त एक सचिव (उपमहालेखा परीक्षक)मा वैकुण्ठबहादुर अधिकारी र राष्ट्रिय मानव अधिकार आयोगको सचिवमा मुरारीप्रसाद खरेललाई बिहीबार बसेको मन्त्रिपरिषद् बैठकले बढुवा गरेको हो ।
राष्ट्रिय तथ्यांक कार्यालयका प्रमुख तथ्यांक अधिकारी तोयम राया महालेखा परीक्षकमा नियुक्त भएसँगै रिक्त भएको सचिव पदमा मुख्यमन्त्री तथा मन्त्रिपरिषद्को कार्यालय कोशी प्रदेशका कायममुकायम प्रमुख सचिव शर्माको नाम एकल सिफारिस भएको थियो ।
निजामती सेवा ऐनअनुसार कार्यसम्पादन मूल्यांकनबाट हुने ८० प्रतिशतका आधारमा हुने बढुवामा लगातार चार पटकसम्म एक सचिवका लागि तीन वरिष्ठ सहसचिव र पाँचौँपटक ज्येष्ठता २० प्रतिशतबाट एकजना मात्र ज्येष्ठ सहसचिवको नाम सिफारिश हुने व्यवस्थाअनुसार वरिष्ठ सहसचिव शर्माको नाम मात्रै सिफारिश भएको थियो ।
यस्तै, तत्कालीन कायममुकायम महालेखा परीक्षक महेश्वर काफ्ले अनिवार्य अवकाशमा गएसँगै रिक्त हुन पुगेको विशिष्ट श्रेणी (उपमहालेखा परीक्षक)मा महालेखा परीक्षकको कार्यालयका नायव महालेखा परीक्षक एवं प्रवक्ता अधिकारीको नाम एकल सिफारिश भएको थियो । सम्भाव्य उम्मेदवार नै अरू कोही नभएका कारण अधिकारीको नाम एकल सिफारिश भएको थियो ।
राष्ट्रिय मानव अधिकार आयोगले पनि लामो समयदेखि रिक्त रहेको आयोगको सचिव पदमा बढुवाका लागि सहसचिव खरेलको एकल नाम सिफारिश गरेको थियो । उहाँ लामो समयदेखि कामु सचिवको जिम्मेवारीमा हुनुहुन्थ्यो ।
यस्तै, सरकारले बागमती प्रदेशको प्रमुख सचिव पदमा सहसचिव गोविन्दबहादुर कार्कीलाई नियुक्त गरेको छ । बिहीबार बसेको मन्त्रिपरिषद् बैठकले सहसचिव कार्कीलाई कायममुकायम प्रदेश प्रमुख सचिवको जिम्मेवारीमा खटाउने निर्णय गरेको सञ्चार तथा सूचना प्रविधिमन्त्री एवं सरकारका प्रवक्ता रेखा शर्माले जानकारी दिनुभयो ।
‘संघीय मामिला तथा सामान्य प्रशासन मन्त्रालयको प्रस्तावमा मुख्यमन्त्री तथा मन्त्रिपरिषद्को कार्यालय, बागमती प्रदेशको प्रमुख सचिव पदमा सहसचिव गोविन्दबहादुर कार्कीलाई प्रदेश प्रमुख सचिवको पदमा कामकाजमा खटाउने निर्णय भएको छ’, मन्त्री शर्माले भन्नुभयो ।
त्यसैगरी, सरकारले स्वास्थ्य तथा जनसंख्या मन्त्रालयको प्रस्तावमा स्वास्थ्य सेवा विभागको संगठन तथा व्यवस्थापन सर्वेक्षण गर्न पूर्वस्वीकृति दिने निर्णय गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच