सप्तरी प्रिमियर लिगको सेमिफाइनलमा कञ्चनरूप राइनोज र छिन्नमस्ता प्रवेश

राजविराज । सप्तरीको राजविराजमा जारी मेयर कप सप्तरी प्रिमियर लिगको छैटौँ संस्करण अन्तर्गत छैटौँ दिन बुधबार सम्पन्न दुईवटा खेलमा कञ्चनरूप राइनोज र छिन्नमस्ता लायन्स विजयी भएसँगै सेमिफाइनलमा प्रवेश गरेका छन् ।

बुधबार सम्पन्न पहिलो खेलमा तेश्रो जित निकालेसँगै कञ्चनरूप राइनोज सेमिफाइनलमा प्रवेश गरेको छ भने दोश्रो खेलमा छिन्नमस्ता लायन्सले बलान बिहुल सुपर किंग्सलाई पराजित सेमिफाइनलमा प्रवेश गरेका हुन ।

राजविराज राजदेवीले दिएको १५५ रनको लक्ष्य कञ्चनरूप राइनोजले ३ ओभर बाँकी हुँदै ४ विकेट गुमाएर भेटायो । कञ्चनरूपका ओपनर सुभ कंसाकारले ९३ रन बनाउदैछ जितमा अहम् भूमिका निभाए । प्लेयर अफ द म्याच घोषित कंसाकारले ५३ बलमा ८ चौका र ८ छक्का प्रहार गर्न सफल भएका थिए ।

राकेश कामतले २४ तथा राहुल मण्डलले अविजित २५ रन बनाए ।राजदेवी एघारका बलर विजय यादवले २ तथा श्रवण यादव र जितेन्द्र यादवले १/१ विकेट लिए ।

यस अघि टस जितेर ब्याटिङ गरेको राजविराज राजदेवी एघारले २० ओभरमा ६ विकेट गुमाएर १५४ रन बनायो। उसको लागि श्रवण यादवले सर्वाधिक ५५ रन बनाए जुन क्रममा उनले ३० बलमा ६ चौका र ३ छक्का प्रहार गरे । हिमांशु दत्ताले ३१, मन्नु दासले १५ तथा रिजन ढकालले १४ रन बनाए ।

कञ्चनरूपको बलिंगमा कप्तान राशिद खान र चित्र बहादुर बिस्टले २/२ विकेट लिए। राशिदले ४ ओभरमा २२ तथा चित्रले ४ ओभरमा १९ रन खर्चिए। दिनेश अधिकारी र अरनिको यादवले १/१ विकेट लिए ।

आजको दोश्रो खेलमा छिन्नमस्ता लायन्सले बलान बिहुल सुपर किंग्सलाई ३७ रनले पराजित गर्यो । छिन्नमस्ता लायन्सले दिएको १४० रनको लक्ष्य पछ्याएको बलान बिहुलले १७.१ ओभरमा १०२ रनमा सबै विकेट गुमायो। बलान बिहुलको लागि साहिल पटेलले सर्वाधिक २३ रन योगदान दिए ।

साहब आलमले अविजित १६, तुल बहादुर थापाले १५ तथा बब्बु गोठीयाले १४ रन योगदान दिए । छिन्नमस्ताको बलिंगमा फिर्दोश अन्सारीले सर्वाधिक ३ विकेट लिए ।

प्लेयर अफ द म्याच समेत घोषित अन्सारीले ३ ओभरमा २८ रन खर्चिए। मोहम्मद सोहेल र गुनंद रेले २/२ विकेट तथा विशाल पटेल र रेवती रेले १/१ विकेट लिए ।

यस अघि टस जितेर ब्याटिंग गरेको छिन्नमस्ता लायन्सले २० ओभरमा ८ विकेट गुमाएर १३९ रन बनायो ।

छिन्नमस्ताको लागि मयन यादवले सर्वाधिक ३२ रन योगदान दिए भने विशाल पटेलले अविजित २९, फिर्दोश अन्सारी र बिकाश दासले समान २२ रन बनाए ।

बलिंगतर्फ बलान बिहुलका शाहब आलम र बब्बु गोठीयाले समान २ विकेट लिए। बिबेक यादव, नितेश यादव र गोमानन्द अमात्यले समान १ विकेट लिए । ४ खेलमा ३ जित र १ नतिजा विहिन खेल खेलपछि छिन्नमस्ता ७ अंक सहित अंकतालिकाको शीर्षस्थानमा छ । एक खेल अगावै छिन्नमस्ताले प्लेअफमा स्थान समेत सुरक्षित गरेको छ ।

यस्तै ४ खेलमा ३ जित र १ हार बेहोर्दै ६ अंक सहित दोश्रो स्थानमा रहेको कन्चनरुप राइनोजले पनि प्लेअफमा स्थान सुरक्षित गरेको छ । चारवटै खेलमा हार बेहोरेको बलान बिहुलको एक खेल अगावै प्लेअफ पुग्ने सम्भावना समाप्त भएको छ ।

आजको हार पछि ४ खेलमा २ अंक रहेको राजविराज राजदेवी अंकतालिकामा पाँचौ स्थानमा छ । ३ खेलमा ३ अङ्क सहित तिलाठी कोइलाडी चौथो स्थानमा छ । ३ खेलमा ४ अंक सहित तिरहुट टाइगर्स तेश्रो स्थानमा छ ।

प्रतियोगिता अन्तर्गत सातौँ दिन बिहिबार पनि दुई खेल हुनेछन् । बिहान ९ः३० बजेको खेलमा सनराइज एघार तिलाठी कोइलाडी र कञ्चनरूप राइनोज तथा दिउँसो १ः३० बजेको खेलमा छिन्नमस्ता लायन्स र तिरहुट टाइगर्स बीच प्रतिस्पर्धा हुनेछ । जेठ २८ गते सम्म आयोजना हुने प्रतियोगितामा ६ टिम सहभागी छन् ।

कञ्चनरूप राइनोज, छिन्नमस्ता लायन्स, बलान बिहुल सुपर किंग्स, राजविराज राजदेवी एघार, तिरहुत टाइगर्स र सनराइज एघार तिलाठी कोइलाडी लिगमा सहभागी छन् ।