चौथो चरणको क्यान्सरलाई जितेर घर फर्किइन् मोनिका

ध्रुवसागर शर्मा म्याग्दी, संवाददाता

३ श्रावण २०८१, बिहिबार ०८:२१

ध्रुवसागर शर्मा म्याग्दी, संवाददाता

३ श्रावण २०८१, बिहिबार ०८:२१

Read Time = 3 mins

सिफारिस

विश्वासको कसीमा नौला मन्त्रीहरू

डिजिटल संस्करण

गण्डकी प्रदेश

प्रदेश समाचार

A A- A+

म्याग्दी । बलियो आत्मबल र उपचारका लागि आर्थिक अभाव नहुने हो भने चौथौं चरणमा पुगेको क्यान्सर जस्तो भयानक रोगलाई पनि जितेर स्वस्थ कन्न सकिँदाे रहेछ भन्ने उदाहरण म्याग्दीकी २१ वर्षिया मनिषा पाइजा (मोनिका) बन्नुभएको छ ।

म्याग्दीको बेनी नगरपालिका–१०,पात्लेखेतकी मनिषालाई डेढ वर्ष अघि हड्डीको क्यान्सर भएको चिकित्सकहरुले पत्ता लगाएपछि सात महिना अघि भारतको राजिव गान्धी क्यान्सर इन्स्टिच्युट एण्ड रिसर्च सेन्टरमा उपचारका लागि लगिएको थियो ।

त्यहाँ सात महिनासम्म नियमित उपचारपछि निको भएर घर पर्किनुभएकी मोनिकाले भन्नुभयो “मैले नयाँ जीवन पाएर घर फर्किएको छु,उपचारमा सहयोग गर्ने सबैलाई धन्यवाद दिन्छु” ।

स्वदेश तथा विदेशबाट प्राप्त आर्थिक सहयोगले उपचार सम्भव भएको बताउँदै थप ६ महिना नियमित फलोअफका लागि दिल्ली जानुपर्ने उहाँले बताउनुभयो । “निकै अत्यासलाग्दो बसाईपछि घर फर्किन पाउँदा खुशी लागेको छ, पूर्णरूपमा निको भएपछि पूरानै काममा फकिन्छु” मोनिकाले भन्नुभयो । उहाँ पेसाले स्वास्थ्यकर्मी हुनुहुन्छ ।

उहाँले क्यान्सर लाग्यो भनेर चिन्ता नलिन तर राम्रोसँग उपचार गर्न सुझाव दिनुभयो । “क्यान्सर रोग लाग्दैमा डर चिन्ता लिन हुँदैन । तर उपचार सुरु गर्नु प¥यो । औषधि नियमित, आत्मबल बलियो बनाउनुपर्छ” उहाँले भन्नुभयो ।

चौथो चरणको हड्डीको क्यान्सरविरुद्ध संघर्ष गरिरहेको अवस्थामा सबै तिरबाट प्राप्त साथ र सहयोगलाई समेत औषधीजस्तै मानेको उहाँले बताउनुभयो । क्यान्सर जितेर नयाँ जीवन पाएपछि क्यान्सर रोकथाम र सचेतनाको क्षेत्रमा समेत लाग्ने उहाँले बताउनुभयो ।

मोनिकालाई क्यान्सर भएको पत्ता लागेपछि उहाँको उपचारका लागि आर्थिक संकलन अभियान सुरु गरिएको थियो । उक्त अभियानमा देश विदेशबाट रु ६४ लाख ४१ हजार एक सय ४४ रुपैयाँ संकलन भएकोमा ५५ लाख १८ हजार पाँच सय रुपैयाँ खर्च भएको मोनिकाका बुबा ओमबहादुरले बताउनुभयो । “मेरो आर्थिक हैसियतले छोरीको उपचार सम्भव थिएन, सबैतिरबाट सहयोग आउँदा घरको खुसी फर्किएको छ”ओमबहादुरले भन्नुभयो ।