सङ्घीय निजामती सेवा ऐन तत्काल जारी गर्न जरुरी

गुल्मी । गुल्मीको तम्घासमा भएको एक कार्यक्रमका सहभागीहरुले सङ्घीय निजामती सेवा ऐन जारी नहुँदा निकै समस्या परेको बताउनु भएकाे छ । नेपाल निजामती कर्मचारी युनियन जिल्ला कार्यसमिति गुल्मीद्वारा आयोजित ३५ औं युनियन स्थापना दिवस कार्यक्रममा सहभागीले प्रतिनिधि सभामा दर्ता भएको सङ्घीय निजामती सेवा ऐन तत्काल जारी गर्नुपर्ने बताउनु भएकाे हाे ।

त्यस अवसरमा बोल्ने अधिकांश वक्ताले निजामती सेवा ऐन जारी हुन नसक्दा सार्वजनिक सेवा प्रवाह समेत कठिन भएको बताउनुभयो । प्रदेश र स्थानीय तहको कर्मचारी कानुन बन्न नसक्दा समायोजन भएका कर्मचारीलाई सेवा प्रवाहमा बाधा उत्पन्न भएको नेपाल निजामती कर्मचारी युनियन गुल्मीका अध्यक्ष मेघलाल पाण्डेले बताउनुभयो ।

प्रतिनिधि सभामा पेश गरिएको निजामती सेवा ऐनमा ट्रेड युनियनसम्बन्धी व्यवस्थालाई यथावत राख्न आवश्यक रहेको उहाँले बताउनुभयो । निजामती कर्मचारीहरुको आधिकारिक ट्रेड युनियन गुल्मीका अध्यक्ष खिमबहादुर अधिकारीले सङ्घीय निजामती सेवा ऐन तत्काल जारी गर्न आवश्यकता रहेको भन्दै सबै निजामती कर्मचारीले सार्वजनिक सेवा प्रवाहलाई चुस्त दुरुस्त बनाउन जरुरी रहेको बताउनुभयो ।

सङ्घीय निजामती सेवा ऐनमा सुधारिएको ट्रेड युनियनको अनिवार्य व्यवस्था गर्नुपर्ने उहाँले बताउनुभयो । नेपाल निजामती कर्मचारी युनियनका केन्द्रीय सदस्य नविन कुमार पन्थीले सङ्घीय निजामती ऐन नआउँदा काम गर्न निकै असहज भएको बताउनुभयो । सबै निजामती कर्मचारीहरु सार्वजनिक सेवा प्रवाहसंगै ट्रेड युनियनलाई नागरिक मैत्री बनाउन जरुरी उहाँले बताउनुभयो ।

नेपाली कांग्रेस रेसुङ्गा नगरपालिका सभापति जयश्वर पन्थीले सङ्घीय निजामती सेवा ऐन तत्काल जारी गर्नका लागि सम्बन्धित निकायसंग पहल गर्ने बताउनुभयो । पूर्व निजामती कर्मचारी समेत रहनुभएका उहाँले सङ्घीय निजामती सेवा ऐन जारी नहुँदा सेवा प्रवाहमा समेत समस्या आउँन सक्ने उहाँले बताउनुभयो ।

गुल्मी जिल्लाका प्रमुख जिल्ला अधिकारी कृष्णप्रसाद शर्माले निजामती सेवा ऐन नआउँदा अप्ठ्यारो परेको भन्दै सार्वजनिक सेवा प्रवाहमा समेत निकै समस्या आएको बताउनुभयो । निजामती कर्मचारीले नागरिकलाई सन्तुष्टी बनाउने गरी काम गर्न जरुरी रहेको भन्दै नागरिकलाई केन्द्रमा राखेर काम गर्न आग्रह गर्नुभयो ।

नेपाली कांग्रेस गुल्मीका सभापति खिलध्वज पन्थीले हरेक निजामती कर्मचारीले नागरिकका पक्षमा गर्न जरुरी रहेको बताउनुभयो । सुशासन कायम गर्नेतर्फ निजामती कर्मचारी लाग्न जरुरी रहेको भन्दै नागरिकलाई मुस्कानसहितको सेव प्रवाह गर्नुपर्ने बताउनुभयो । सङ्घीय निजामती सेवा ऐन जारी नहुँदा कर्मचारीमा सहजता नआएको भन्दै उहाँले निजामती सेवा ऐन तत्काल जारी गर्नका लागि आवश्यक समन्वय र पहल गर्ने बताउनुभयो ।

नेपाली कांग्रेस लुम्बिनी प्रदेशका उपसभापति भुवनप्रसाद श्रेष्ठले निजामती सेवामा लाग्नुभएका सबैले नागरिकलाई शिरमा राखेर आफ्नो कर्तव्य पूरा गर्न जरुरी रहेको बताउनुभयो । लामो समयदेखि प्रतिनिधिसभामा दर्ता भएको सङ्घीय निजामती सेवा ऐन जारी नहुँदा निजामती कर्मचारीमा समस्या आएको हुन सक्ने भन्दै संविधानसंगै देशमा धेरै ठूला परिवर्तन गर्न सक्ने ठुला राजनीतिक दलले सङ्घीय निजामती सेवा ऐन जारी गर्न जरुरी रहेको बताउनुभयो ।

विविध कार्यक्रमसहित स्थापना दिवस

नेपाल निजामती कर्मचारी युनियनको ३५ औं स्थापना दिवस गुल्मीमा सप्ताहव्यापी विभिन्न कार्यक्रमहरु गरी मनाइएको छ । स्थापना दिवसको अवसरमा यहाँ नेपाल निजामती कर्मचारी युनियन जिल्ला कार्यसमितिले विभिन्न सामग्री वितरण र सम्मानका कार्यक्रम गरेको सचिव डिवि थापाले जानकारी दिनुभयो ।

उहाँका अनुसार गुल्मी कारागारका कैदीबन्दीकहरुको लागि पुस्तक वितरण, रेसुङ्गा गौशालामा गाईको लागि खाद्यान्न हस्तान्तरण, नेपाली कांग्रेस गुल्मी र तम्घासस्थित बालमन्दिरलाई रोष्टम हस्तान्तरण, तीज मिलन कार्यक्रम, अक्षयकोष दाता सम्मान, युनियन शैक्षिक छात्रवृत्ति वितरण, जटिल रोगबाट पिडित जनप्रतिनिधिलाई सहयोग हस्तान्तरण गरिएको छ ।

यो पनि पढ्नुहोस्

कति छ आज तरकारी तथा फलफूलको भाउ ? (सूचीसहित)