तीनकुने घटनाका मृतक परिवारलाई सरकारले १०/१० लाख राहत दिने

काठमाडौं । चैत १५ गते काठमाडौंको तीनकुनेमा भएको प्रदर्शनमा ज्यान गुमाउने सुरेश र सविनको परिवारलाई सरकारले १०/१० लाख रुपैयाँ दिने भएको छ । बुधबार गृहमन्त्रीस्तरीय निर्णयले पत्रकार सुरेश रजक र कीर्तिपुरका युवक सविन महर्जनको परिवारलाई १०/१० लाख रुपैयाँ सहयोग उपलब्ध गराउने निर्णय गरेको गृहमन्त्रीको सचिवालयले जनाएको छ । सचिवालयका अनुसार गृहमन्त्री रमेश लेखकले सरकारको राहत कोषबाट उक्त रकम पीडित परिवारलाई उपलब्ध गराउने निर्णय गर्नुभएको हो । त्यस्तै, पत्रकार र मिडिया हाउसको सुरक्षाका लागिसमेत संवेदनशील भएर काम गर्न प्रहरी प्रधान कार्यालयलाई गृहमन्त्रीले निर्देशन दिनुभएको छ । राजतन्त्र पुनःस्थापनाको माग गर्दै गत चैत १५ गते काठमाडौंको तीनकुनेमा भएको अराजक प्रदर्शनमा एक पत्रकारसहित दुई जनाको ज्यान गएको थियो । त्यसैगरी, प्रदर्शनकारीले स्थानीयका निजी घर र गाडीमा आगजनी गरेका थिए । उनीहरूले कोटेश्वरमा रहेको भाटभटेनीमा लुटपाटसमेत गरेका थिए । हिंसा, आगजनी र लुटपाटको घटनाको चौतर्फी विरोध भइरहेको छ ।

संसदीय समितिले माग्यो सरकारको जवाफ
संसदीय समितिले तीनकुनेमा भएको घटनाबारे सरकारको जवाफ माग गरेको छ । प्रतिनिधिसभा अन्तर्गतको राज्य व्यवस्था समितिले तीनकुने घटनाबारे सरकारको जवाफ माग गर्ने निर्णय गरेको हो । बुधबार सिंहदरबारमा बसेको बैठकमा समिति सदस्यहरूले राजावादीको प्रदर्शनमा भएको घटनाका विषयमा गृहमन्त्रीले जवाफ दिनुपर्ने माग गरेका थिए । सदस्यको मागअनुसार समितिले घटनाबारे जवाफ दिन गृहमन्त्री रमेश लेखकलाई बोलाउने निर्णय गरेको हो । समितिले घटनाबारे जानकारी दिन गृहमन्त्री लेखकलाई आगामी २२ गते बोलाएको छ । उनीहरूले घटनाबारे छानविन गर्न न्यायिक समिति बनाउनसमेत माग गरेका छन् । नेपाली कांग्रेसका सांसद विश्वप्रकाश शर्माले तीनकुने घटनाको छानविनका लागि सरकारले न्यायिक छानविन समिति बनाउनुपर्ने बताउनुभयो । तीनकुने घटनामा सरकारको बुझाइ समितिसमक्ष आउनुपर्ने उहाँले बताउनुभयो ।

माओवादी केन्द्रका प्रमुख सचेतक हितराज पाण्डेले तीनकुने घटनामा सरकारको कमजोरी देखिएको भन्दै गृहमन्त्रीले जवाफ दिनुपर्ने बताउनुभयो । आफ्नै घेरामा रहेका बेलामा दुर्गा प्रसाईंलाई प्रहरीले समात्न नसकेको भन्दै आलोचना गर्नुभयो । त्यसैगरी, राप्रपाका सांसद बुद्धिमान तामाङले १५ गतेको घटनामा एकपक्षीय रूपमा राजावादीप्रति खनिएको भन्दै निष्पक्ष न्यायिक छानविनको माग गर्नुभयो । कार्यक्रम सुरु नहुँदै मञ्चमा अश्रुग्यास प्रहार गरेको देखिएको सांसद तामाङको भनाइ छ ।

स्वतन्त्रताका नाममा हुने हिंसा, आगजनी र लुटपाट सधैँ निषेधित : राष्ट्रपति
राष्ट्रपति रामचन्द्र पौडेलले संविधानले दिएको अधिकार प्रयोग गर्दा लोकतान्त्रिक संस्कार र संस्कृति बिर्सन नमिल्ने बताउनुभएको छ । बुधबार काठमाडौंमा रेडियो नेपालको हिरक महोत्सवलाई सम्बोधन गर्दै राष्ट्रपति पौडेलले लोकतन्त्रमा जनताको अभिमत सबैभन्दा ठूलो हुने र संविधानको व्यवस्था, मर्म र भावना भुले नेपाली जनतालाई स्वीकार्य नहुने बताउनुभयो । संविधानले दिएको अधिकार प्रयोग गर्दा त्यही संविधानले अपेक्षा गरेको लोकतान्त्रिक संस्कृति र संस्कार बिर्सन नमिल्ने उहाँको भनाइ थियो । संविधानले प्रत्येक नागरिकलाई आफ्नो असहमति राख्ने अधिकार प्रदान गरेको र संघीय लोकतान्त्रिक गणतन्त्रको यो सर्वाधिक सुन्दर पक्ष भएको राष्ट्रपतिले बताउनुभयो । स्वतन्त्रताका नाममा हुने हिंसा, तोडफोड, आगजनी र लुटपाट सर्वदा निषेधित रहेको उहाँले प्रष्ट पार्नुभयो । तीनकुने क्षेत्रमा भएको जनधनको क्षतिप्रति उहाँले दुःख व्यक्त गर्नुभयो ।

घटनाको न्यायिक छानविन हुनुपर्छ : शर्मा
कांग्रेस महामन्त्री विश्वप्रकाश शर्माले तीनकुने घटनामा सरकारको पनि कमजोरी भएको बताउनुभएको छ । राज्यव्यवस्था परामर्श समितिको बैठकपछि बुधबार सञ्चारकर्मीहरूसँग कुरा गर्दै उहाँले चार हजारको भिडलाई पनि सरकारले नियन्त्रण गर्न नसकेको टिप्पणी गर्नुभयो । ‘चार हजार मात्रै मानिस भएको भन्ने राज्यको बुझाइ हो । चार हजारको भिडलाई पनि राम्रो नियन्त्रण गर्न नसकेको देखिन्छ । त्यसमा पनि सरकारले पनि गम्भीर समीक्षा गर्नुपर्छ,’ उहाँले भन्नुभयो । घटनाको न्यायिक छानविन हुनुपर्ने उहाँले बताउनुभयो । ‘यत्रो घटना भएको छ, यसको छानविन गर्न न्यायिक समिति आवश्यक छ । यो कसको उक्साहटमा भएको छ । राजनीतिक दलहरूले भन्ने टिप्पणी एउटा कुरा हो । सरकारले भन्ने कुरा एउटा हो । तर, न्यायिक समितिले त यसको उक्साहटको पछाडि को छ ? गलत ढंगले कसरी प्रयोग गरिरहेको छ । फिल्डमा कुन प्रकारको घटना भइरहेको छ । त्यसैले यो विषय भयो सकियो होइन गम्भीरतापूर्वक लिएर छानविन अनुसन्धान गर्नुपर्छ,’ उहाँले भन्नुभयो । सरकार र नेतृत्वप्रति चर्को असन्तुष्टि रहे पनि विकल्प राजसंस्था नभएको बताउनुभयो । ‘मैले त हाम्रो सभापतिलाई अब प्रधानमन्त्री बन्नुहुन्न भनिरहेको छु । २०८४ पछि तीनवटै नेताहरूले (देउवा, ओली र प्रचण्ड)ले नेतृत्व गर्ने होइन । उहाँहरू पछिकाले नेतृत्व गर्ने भन्ने दावा गरिरहेका छौँ तर, राजालाई हामीले त्यसरी सक्दैनौँ । त्यसैले अहिले असन्तुष्टि, सरकारको कमजोरीबारे पनि छलफल गर्नुपर्छ ।’

प्रधानमन्त्री र गृहमन्त्रीले तत्काल राजीनामा दिनुपर्छ : शाही
राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाहीले प्रधानमन्त्री केपी शर्मा ओली र गृहमन्त्री रमेश लेखकको राजीनामा माग गर्नुभएको छ । गत शुक्रबार तीनकुने क्षेत्रमा भएको घटनालाई लिएर उहाँले प्रधानमन्त्री ओली र गृहमन्त्री लेखकको राजीनामा माग गर्नुभएको हो । ‘आन्दोलनमा सहभागी नभएका मान्छेलाई गोली हान्ने र हत्या गर्ने प्रधानमन्त्री र गृहमन्त्रीले तत्काल राजीनामा दिनुपर्छ र निर्दोष मान्छेलाई हत्या गरेको अभियोगमा प्रधानमन्त्री, गृहमन्त्री र गोली हान्ने प्रहरीलाई पक्राउ गर्नुपर्छ,’ उहाँले भन्नुभयो । सत्ता र शक्तिको आडमा सर्वसाधारणमाथि गोली चलाउन नपाइने पनि स्पष्ट पार्नुभयो । ‘बाटोमा हिँडेका मान्छेलाई, घरबाट निस्केका मान्छेलाई गोली हान्दै हिँड्न पाइँदैन । तिमीहरूसँग जनता डराउनुपर्ने हो र ? तिमीहरूले झुटा मुद्दा लगाउँदै मान्छे थुन्नुपर्ने हो र ? तिमीहरूले भ्रष्टाचार गर्ने, देश लुट्ने हो र ?’ उहाँले भन्नुभयो, ‘युवाहरूलाई बेरोजगार बनाउने र ? अनि आवाज उठायो भने गोली हान्दै हिँड्ने, झुटो मुद्दा लगाएर थुन्ने ? होसियार, एकदिन अवस्था यस्तो हुनेछ कि तिमीहरूलाई लुक्न पनि ठाउँ भेटिने छैन ?’