जैविक मल तथा जैविक विषादी उत्पादन उद्योग अलपत्र

हिमालय टाइम्स
Read Time = 4 mins

सुर्खेत । जाजरकोट भेरी नगरपालिका-१३ कुदुमा निर्माण भएको जैविक मल तथा जैविक विषादी उत्पादन उद्योग अलपत्र परेको छ । प्रदेश सरकारको ५० लाख र कर्णाली बायो इनर्जी एण्ड आर्गानिक फर्टिलाइजर प्रालिको ५० लाख रकमसहित निर्माण थालिएको जैविक मल तथा जैविक विषादी उत्पादन उद्योग अलपत्र परेको हो ।

आर्थिक वर्ष २०७७/७८ को कर्णाली प्रदेशको बजेटबाट उक्त संरचना निर्माण भए पनि त्यहाँ जैविक मल तथा जैविक विषादी उत्पादन गर्न भैँसीपालन गर्नुपर्ने भए पनि अहिलेसम्म सो काम हुन सकेको छैन । भेरी करिडोरका साथै मध्यपहाडी लोकमार्गको बीचमा रहेको उक्त ठाउँमा कर्णाली प्रदेश सरकारबाट अनुदान ल्याएर संरचना निर्माण गरेर अहिले अलपत्र अवस्थामा रहेको छ ।

भौतिक संरचनाभित्र भैँसीपालन गरेर जैविक मल उत्पादन गर्ने लक्ष्य बीचमै तुहिएको छ । प्रदेश सरकारले भेरी नगरपालिकामार्फत उपलब्ध गराएको ५० लाख रुपैयाँमा काम कम गरेको भन्दै नगरपालिकाले ४२ लाख रुपैयाँ मात्र भुक्तानी दिएको छ । बाँकी प्रालिले आफैँले व्यवस्थापन गरेर भैँसीपालन गरी जैविक मल तथा विषादी उत्पादन गर्नुपर्ने लक्ष्य भए पनि अनुदानको रकम मात्र प्रयोग गरेर बाँकी लगानी नै नगरी बीचमै छाडेको देखिन्छ । लाखौँ रकम राज्यको अनुदानको नाममा ल्याएर तोकिएको काम सम्पन्न नगरी बीचमै छोड्दा आर्थिक हानि हुनुका साथै उद्देश्यसमेत पूरा नहुँदा समस्या हुने गरेको छ ।

अनुदानका लागि मात्र विभिन्न कम्पनी खोल्ने कामले श्रमजीवी कृषकहरू मारमा परेका छन् । पहुँचको भरमा ल्याइएका यस्ता खालका अनुदानको अनुगमन तथा निरीक्षण गर्ने निकायसमेत मौन बस्नुले रकम झ्याम पार्ने परिपार्टी मौलाएको कृषकहरूको भनाइ छ । संरचाभित्र हप्ता दिनसम्म मात्र भैँसी राखेर रकम भुक्तानी गरेको प्रालिका नजिकै घर भएका स्थानीयवासी बताउँछन् ।

अहिले सो संरचनाभित्र केही पनि नभएको अवस्था छ । यता, भेरी नगरपालिकाका नगर प्रमुख चन्द्रप्रकाश घर्तीले अनुदान लिने तर काम नगर्ने परिपार्टी मौलाउँदै गएको बताउनुभयो । ‘सधैँ निगरानी गर्न सकिँदैन, हामीले जिम्मा लगाएपछि किसानले आफैँले सक्रिय भएर कम गर्ने हो,’ उहाँले भन्नुभयो । उता, कम्पनीका मानबहादुर रोकायले साथीहरूले धोका दिएका कारण कुदुमा काम गर्न नसकिएको बताउनुभयो ।
अहिले सुर्खेतस्थित वीरेन्द्रनगर नगरपालिका-३ तातोपानीमा शाखा सञ्चालन गरेर काम गरिरहेको उहाँको दाबी छ । जाजरकोटको कुदुमा काम गर्न नसकिएको उहाँले स्वीकार गर्नुभएको छ ।

Subscribe
Notify of
guest
0 Comments
Inline Feedbacks
View all comments

रिलेटेड न्युज

छुटाउनुभयो कि ?