मोफसलमा रहेर पनि कला क्षेत्रमा सक्रिय नाम हो देव महतो । चितवनमा रहेर उहाँले आफूलाई कला क्षेत्रमा संलग्न गराउँदै आउनुभएको छ । खासगरी थारू गीतका भिडियोमा एकक्षत्र राज गर्न सफल महतोले अभिनय गरेका थुप्रै गीतका भिडियो चर्चामा छन् । उहाँले केही नेपाली गीतका भिडियोमा पनि अभिनय गर्नुभएको छ भने धेरैजसो थारू गीतका रहेका छन् । दुई दर्जनभन्दा बढी गीतमा अभिन गरेर धेरैको मन मष्तिस्कमा बस्न सफल महतो गायक मिलन लामाको थारू गीत ‘हमार थारू गाउँमा हावा चलल’बाट यो क्षेत्रमा आफूलाई औपचारिक रूपमा होमनु भएको हो । यही गीतबाट अवार्डसमेत प्राप्तगर्न सफल हुनुभएको थियो । केही गीतमा कोरियोग्राफीसमेत गर्नुभएका महतो आफू अभिनयमै रम्ने बताउनुहुन्छ । ‘मखमली, तोर मायाक सागर, दिल कहे हरबार, यहसास मायाको, मोर जान लेगयील’जस्ता उहाँको अभिनय रहेका धेरै गीतका भिडियोलाई दर्शकले औधि मन पराएका छन् । उहाँले सृष्टि खडका, पूर्जा शर्मा, उषा उप्रेतीलगायतसँग स्त्रिन शेयर गर्नुभएको छ । चितवनमा रहेको नाटेश्वर नृत्य संघमा बुद्धिराम चौधरीबाट नृत्य सिक्नुभएका उहाँले नेशनल थारू मोडलको अवार्डसमेत आफ्नो पोल्टामा पार्न सफल हुनुभएको छ । थारू कला क्षेत्रमा लागेर थारू संस्कृतिलाई राष्ट्रियस्तरमा स्थापित गर्न पुर्याएको योगदानका लागि उहाँलाई विभिन्न मान, सम्मान र पुरस्कार प्राप्त भएका छन् । सन्देशलाई कला क्षेत्रले मनोरञ्जनात्मक तवरले प्रस्तुत गर्छ भन्नुहुने देव महतोसँग हिमालय टाइम्सका लागि गीता अधिकारीले गर्नुभएको संवादको संक्षिप्त अशंः-
यतिबेला के गर्दै हुनुहुन्छ ?
कला क्षेत्रमा नै आफूलाई समर्पित गर्दै आएको छु । आफूलाई पूर्णरूपमा यही क्षेत्रमा संलग्न गराएको हुनाले यही क्षेत्रसँगका कार्यमा आफूलाई व्यस्त बनाउँदै आएको छु । केही नयाँ गीतको भिडियोको पनि तयारी भइरहेको छ ।
कसरी आउनुभयो यो क्षेत्रमा ?
म गाउँघरमा नृत्य गर्थे । गायक मिलन लामाको थारू गीत ‘हमार थारू गाउँमा हावा चलल’मार्फत म यो क्षेत्रमा आए । गायक लामाले नै मलाई यो क्षेत्रमा ल्याउनुभएको हो भन्दा हुन्छ । उहाँले सुरुमा जोड गर्नुभयो । ‘तिमी सक्छौ यति राम्रो नृत्य गर्छौ’ भनेर उहाँले मलाई यो क्षेत्रमा ल्याउनुभयो । उहाँको गीतमार्फत मैले यो क्षेत्रमा डेब्यु गरे । अहिले फर्केर हेर्दा राम्रै भएको छ । यही गीतबाट पहिलो अवार्ड पनि प्राप्त भयो । आफूलाई अझै निखार्दै म यो क्षेत्रमा निरन्तर छु ।
घरपरिवारको कतिको सर्पोट थियो ?
सुरु-सुरुका दिनमा त यो क्षेत्रभन्दा अन्य क्षेत्रमा लागे हुन्थ्यो भन्ने उहाँहरूको मनसाय थियो । तर, अहिले भने राम्रै मान्नुभएको छ । उहाँहरू खुशी हुनुहुन्छ ।
अहिलेसम्म कति जतिमा अभिनय गर्नुभयो ?
दुई दर्जनभन्दा बढी गीतका भिडियोमा अभिनय गरेको छु ।
यहाँले अभिनय गरेका गीतका भिडियोलाई दर्शकले मन पराएको छन् । चलचित्रका अभिनेत्रीहरूसँग पनि स्क्रिन शेयर गर्नुभएको छ, एउटा सफलता प्राप्त गर्दै गर्दा के कुरा आवश्यक हुन्छन् भन्ने लाग्छ सफलताका लागि ?
तपाईंले भनेजस्तै मैले अभिनय गरेका भिडियोलाई दर्शकले मन पराइ दिनुभएको छ । खुशी लाग्छ । यो साथसहयोग सदैव भइरहोस भन्ने चाहन्छु । अर्को कुरा ठूलो पर्दाका अभिनेत्रीहरूसँग स्क्रिन शेयर गरेको कुरालाई पनि दर्शकले राम्रै मन पराइदिनुभएको छ । जहाँसम्म सफलताको कुरा छ मैले यो क्षेत्रमा अझै धेरै गर्न बाँकी छ जस्तो लाग्छ । मुख्य कुरा क्षमता र अनुसाशन हुनुपर्छ भन्ने मलाई लाग्छ । आफ्ना हरेक प्रस्तुतिमा नयाँ नयाँ क्रियशन दिनुपर्छ । सबैभन्दा ठूलो कुरा काम हो । आफू सन्तुष्टि हुनुपर्छ ।
ठूलो पर्दामा अभिनय गर्ने सोच बनाउनुभएको छैन ?
सोच त छ । केही प्रस्ताव पनि आएका छन् । हेर्दै जाउ, के हुन्छ ।
कस्तो फिल्मका अफर आए गर्नुहुन्छ ?
खाशै मेरो डिमाण्ड छैन । मुख्य कुरा व्यानर, टिम र स्टोरी राम्रो हुनुपर्छ । म जस्तो भूमिका पनि निर्वाह गर्न तयार छु । मलाई भूमिकामा समस्या छैन ।
थारू गीतमा नै बढी यहाँको अभिनय रहेको पाइन्छ नि ?
म यही क्षेत्रको मान्छे हुँ । आफ्नो भाषा, साहित्य कला संस्कृति जर्गेना गर्ने जिम्मा हाम्रै हो । नेपाली हाम्रो राष्ट्रिय भाषा हो भने थारू मातृभाषा हो । थारू संस्कृतिलाई संरक्षण र सम्बद्र्धन गर्नु मेरो मुख्य कतव्र्य हो जस्तो लाग्छ । त्यसैलै पनि आफ्नो भाषा संस्कृतिलाई जगर्ने गर्दै यसको व्यापकताका लागि मैले यही भाषाका धेरै गीतमा अभिनय गरेको छु । फेरि म जुन मूलबाट आए त्यसमा केही बढी हुनु स्भाविक नै हो, होइन र ? नेपाली भाषामा पनि गरेको छु । मन पराइदिनुभएको छ । आउँदा दिनमा पनि नेपाली भाषाका पनि आउनेछन् । थारू भाषाका पनि आउनेछन् ।
यसक्षेत्रमा लागेर खुशी नै हुनुहुन्छ ?
आफूले चाहेको क्षेत्रमा सधैं खुशी मिल्दोेरहेछ । जहाँ नयाँ–नयाँ कुरा सिक्न पाएको छु । साथीहरू पाएको छु । दर्शकको माया र हौसला पाएकै छु । रोजेको क्षेत्रलाई करिअर बनाएको छु ।
कला क्षेत्र मनोरञ्जनमात्रै हो त ?
होइन, कला क्षेत्रअन्तर्गतका नाटक, टेलिफिल्म र चलचित्र त समाजलाई बाटो देखाउने, नैतिकता सिकाउने, हिम्मत बढाउने, दोषीले उन्मुक्त हुन नदिने, माया–प्रेम नै मानव समुदायको पहिचान हो भन्ने कुराको बोध गराउने माध्यम हुन् । यस्ता सन्देशलाई कला क्षेत्रले मनोरञ्जनात्मक तवरले प्रस्तुत गर्छ ।
यहाँको लक्ष्य र उद्देश्य ?
मेरो सपना र विपना यही क्षेत्र हो । यही क्षेत्रमा आफूलाई अझै धेरै परिस्कृति गर्दै अझ राम्रो गर्ने कोसिसमा रहनेछु हरसमय ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच