काठमाडौं । नेपालले आइसिसी टी-२० विश्वकप एसिया क्षेत्र फाइनल छनोटको सेमिफाइनल खेल युएईसँग खेल्ने भएको छ । नेपाल अन्तिम खेलमा बिहीबार ओमानसँग पाँच रनले हारेपछि युएईसँग सेमिफाइनल खेल्ने भएको हो । उता युएईले अर्को खेलमा हङकङलाई २२ रनले हराउँदै समूह ‘बी’ को विजेता बनेको छ । योसँगै नेपालले सेमिफाइनल खेल मूलपानी क्रिकेट मैदानमा खेल्ने भएको छ । आइसिसीको तालिकाअनुसार समूह ‘ए’ को विजेताले टियुमा र उपविजेताले मूलपानीमा सेमिफाइनल खेल्ने तालिका थियो । त्यसैअनुसार नेपाल र युएईबीचको सेमिफाइनल खेल शुक्रबार मूलपानीमै हुनेछ ।
सुरक्षाको कारण नेपालको खेल टियुमा सार्ने चर्चा रहे पनि मूलपानीमै हुने पक्का भएको क्यानले जनाएको छ । नेपाल अन्तिम खेलमा ओमानसँग पाँच रनले पराजित भएपछि समूह ‘ए’ को उपविजेता बनेको थियो । टियुमा समूह ‘ए’ को विजेता ओमान र समूह ‘बी’ को उपविजेताबीच शुक्रबार सेमिफाइनल खेल हुनेछ । समूह ‘बी’ बाट उपविजेता बन्ने कुवेत र बहराइनबीचको नतिजापछि मात्रै थाहा हुनेछ । दुवै सेमिफाइनल बिहान-११ बजे सुरु हुनेछ ।
फाइनलमा पुग्ने दुवै टोलीले आगामी वर्ष अमेरिका र वेस्टइण्डिजमा हुने टी-२० विश्वकप खेल्न पाउनेछन् । फाइनल भने आइतबार टियु क्रिकेट मैदानमा हुनेछ । कीर्तिपुरस्थित त्रिभुवन विश्वविद्यालयको क्रिकेट मैदानमा भएको खेलमा नेपाल ओमानसँग पाँच रनले पराजित भएको हो । यस जितसँगै ओमान समूह ‘ए’ को विजेता तथा नेपाल उपविजेता बन्यो । ओमानले दिएको १४६ रनको चुनौती पछ्याएको नेपाल निर्धारित २० ओभरमा ९ विकेट गुमाउँदै १४० रनमा समेटियो । नेपालका विवेक यादवले २४ बलमा ५ छक्कासहित सर्वाधिक ३९ रन जोड्नुभयो । त्यस्तै कुशल भुर्तेलले २६ रन बनाउनुभयो भने करण केसीले १५ रन जोड्नुभयो ।
नेपालले सुरुवातदेखि नै लगातार विकेट गुमाएको थियो । आसिफ शेखले पाँच रन जोड्दै आउट हुनुभयो भने सोमपाल कामी, कप्तान रोहितकुमार पौडेल र सन्दीप जोराले समान १२/१२ रन जोड्दै आउट हुनुभयो । त्यस्तै गुलशन झाले ३ रन जोड्नुभयो । ओमानका विलाल खानले तीन किकेट झार्नुभयो भने अकिब इलयास, सकिल अहमद र मेहरान खानले समान दुई/दुई विकेट लिनुभयो । त्यस्तै कप्तान जिशान मकसुदले एक विकेट लिनुभयो ।
त्यसअघि टस हारेर पहिले ब्याटिङ गरेको ओमानले निर्धारित २० ओभरमा ९ विकेट गुमाउँदै १४५ रनको योगफल बनाएको थियो । ओमानका लागि जिशान मकसुदले सर्वाधिक ३२ रनको योगदान दिनुभयो । उहाँले २६ बलमा १ चौका र ३ छक्कासहित ३२ रन बनाउनुभयो । त्यस्तै नसिम खुसीले २५ रन बनाउनुभयो भने प्रतीक अथभलले २४, सकिल अहमदले २२ तथा आयान खानले १८ रन बनाउनुभयो । नेपालका लागि करण केसीले तीन विकेट लिनुभयो भने सोमपाल कामी र सन्दीप लामिछानेले समान दुई/दुई विकेट लिनुभयो । त्यस्तै गुलशन झा र अभिनाश बोहोराले समान एक/एक विकेट लिनुभयो ।
युएईद्वारा हङकङ पराजित
यस्तै अर्को खेलमा संयुक्त अरब इमिरेट्स (युएई) ले हङकङलाई हराउँदै विजयी भएको छ । माथिल्लो मूलपानी क्रिकेट मैदानमा भएको खेलमा हङकङलाई २२ रनले पराजित गर्दै युएई समूह ‘बी’को विजेता बन्न सफल भयो । यो जितसँगै युएईले सेमिफाइनल खेलमा नेपालसँग प्रतिस्पर्धा गर्नेछ । नेपाल समूह ‘ए’ को उपाविजेता बन्दै सेमिफाइनलमा पुगेको हो । जितका लागि १७७ रनको विजयी लक्ष्य पछ््याएको हङकङले निर्धारित २० ओभरमा ८ विकेट गुमाउँदै १५४ रनमा समेटियो ।
हङकङका लागि अन्स्या राथले सर्वाधिक ५९ रनको योगदान दिनुभयो । उहाँले ४७ बलमा ८ चौकासहित सर्वाधिक ५९ रन बनाउनुभयो । त्यस्तै एजिज खानले २६, निजाकत खानले २५ तथा नस्रुल्लाह रानाले १३ रन बनाउनुभयो । त्यसबाहेक अन्य खेलाडीले दोहोरो अंकमा रन बनाउन सकेनन् । युएईका अली नासिर र जहुर खानले समान दुई विकेट लिनुभयो । त्यसअघि टस हारेर पहिला ब्याटिङको निम्तो पाएको युएईले निर्धारित २० ओभरमा ६ विकेट गुमाउँदै १७६ रनको योगफल बनाएको थियो । युएईका लागि बासिल हामिद सर्वाधिक ५१ रनको योगदान दिनुभयो । उहाँले २९ बलमा ४ चौका र ३ छक्कासहित सर्वाधिक ५१ रन बनाउनुभएको हो ।
कप्तान मोहम्मद वासिमले २४ बलमा ५ चौका र ३ छक्कासहित ४६ रन जोड्नुभयो । एलिशान शराफुले २४ बलमा २ चौका र २ छक्कासहित ३४ रन बनाउनुभयो । वृत्य अरविन्दले १९ रन जोड्दा खालिद शाह ६ तथा आसिफ खान ४ रनमा आउट हुनुभयो । हङकङका यासिम मुर्तजाले तीन विकेट लिनुभयो भने नस्रुल्लाह रानाले दुई विकेट लिनुभयो । त्यस्तै एहसान खानले एक विकेट लिनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच