धनगढी । धनगढी एफसीले दोस्रो संस्करणको नेपाल सुपर लिग (एनएसएल)का लागि कैलालीका प्रतिभावान युवा मिडफिल्डर ओमप्रकाश चौधरीलाई अनुबन्धित गरेको छ । ‘गो ड्रिमर्स’ को स्वामित्वमा रहेको साबिक उपविजेता धनगढी एफसीले प्लानिङ ब्वाइजलाई यस वर्ष सी डिभिजनबाट ‘बी’ डिभिजनमा उकाल्न महत्वपूर्ण भूमिका खेल्नुभएका प्रतिभावान मिडफिल्डर ओमप्रकाशलाई यस सिजनका भित्र्याएको हो ।
सुदूरपश्चिम ११ स्पोर्ट्स क्लबबाट देशका विभिन्न भागमा हुने गोल्डकपहरूसमेत खेल्नुभएका ओमप्रकाश र धनगढी एफसीका अध्यक्ष सुवास शाहीले सम्झौतापत्रमा हस्ताक्षर गर्नुभएको थियो । सम्झौतापत्रमा हस्ताक्षरपश्चात् ओमप्रकाशले स्थानीय खेलाडीका रूपमा होम टाउनको टोलीसँग अनुबन्ध हुन पाउँदा खुसी व्यक्त गर्नुभयो । ‘धनगढी एफसीमा सम्झौता गर्न पाउँदा एकदमै खुसी छु । पहिलो सिजनको उपविजेता टोलीमा सम्झौता गर्न पाउँदा निकै हर्षित छु । यसपटक टोलीमा पाएका मौकाहरूको पूर्ण सदुपयोग गर्दै टोलीलाई एक स्थान माथि पुर्याउन भूमिका खेल्ने प्रतिबद्धता जनाउँछु । अवसरका लागि सम्पूर्ण टोली व्यवस्थापकलाई धन्यवाद ज्ञापन गर्दछु,’ उहाँले भन्नुभयो ।
यस्तै, धनगढी एफसीका अध्यक्ष सुवास शाहीले मिडफिल्डर ओमप्रकाशलाई स्वागत गर्दै उहाँको आगमनले टोली थप मजबुद बन्ने प्रतिक्रिया व्यक्त गर्नुभयो । ‘धनगढी एफसीमा यस सिजन युवा प्रतिभावान मिडफिल्डर ओमप्रकाश चौधरीलाई सम्झौता गर्दा हामी एकदमै उत्साहित छौँ । ठूला प्रतियोगिताहरूमा युवाहरूले एक्सोजर पाउनु आवश्यक ठान्दै र उहाँको प्रतिभाको कदर गर्दै हामीले उहाँलाई भित्र्याएका हौँ,’ शाहीले भन्नुभयो । धनगढी एफसीले यसअघि युरोपियन लिगहरू खेलिसकेका सेनेगल राष्ट्रिय फुटबल टोलीका पूर्वरक्षक फलु डियाग्ने र नेपाली फुटबलमा सफल देखिएका विदेशी खेलाडी ओलावाले अफिजलाई अनुबन्ध गरिसकेको छ । नेपाल सुपर लिगको दोस्रो संस्करण आगामी मंसिर ८ देखि पुस २१ गतेसम्म काठमाडौंको दशरथ रंगशालामा हुँदैछ ।
एनएसएलको यस सिजनका लागि धनगढी एफसीको मार्की खेलाडीमा नेपाली राष्ट्रिय टिमका प्रतिभावान मिडफिल्डर आशिष चौधरी रहनुभएको छ । आशिषले शहीद स्मारक लिग ‘ए’ डिभिजन लिगमा चर्च ब्वाइज युनाइटेडबाट खेल्दै टोलीलाई लिगको विजेता बनाउन महत्वपूर्ण भूमिका निर्वाह गर्नुभएको थियो ।
यस्तै, अक्सनबाट धनगढी एफसीले साइमन लिम्बू, निशान लिम्बू, मिलन राई, सुरेश कुमाल, रन्दीप पौडेल, मनोज राई, कमल श्रेष्ठ, टेकेन्द्र सिंह थापा, देवेन्द्र तामाङ, हेमन्त श्रेष्ठ, अभिषेक गुरुङ, कृतिशरत्न छुन्जु र रामचन्द्र वाजीलाईं अनुबन्ध गरिसकेको छ ।
प्रशिक्षकमा भने धनगढी एफसीले युगोलकिशोर राईलाई निरन्तरता दिएको छ । धनगढी एफसीको ब्राण्ड एम्बासडरमा कलाकार तथा चर्चित टिकटकर पवी साँकी रहनुभएको छ । धनगढी एफसीले आफ्नो पहिलो खेल आगामी नोभेम्बर २६ तारिखमा वीरगञ्ज युनाइटेडसँग खेल्ने तालिका छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच