लण्डन । इंग्लिस प्रिमियर लिगको लण्डन डर्बीमा चेल्सीले टोटनहम हटस्परलाई ४-१ ले पराजित गरेको छ । चेल्सीका लागि निकोलस ज्याक्सनले हृयाट्रिक र अर्को गोल कोल पाल्मरले गर्नुभयो । खेलमा अग्रता भने टोटनहमले लिएको थियो । देजान कुलुसेवस्कीले खेलको छैटौँ मिनेटमा घरेलु टोलीलाई अग्रता दिलाउनुभएको थियो । तर, त्यसपछि भने खेल चेल्सीतर्फ ढल्कियो ।
१४औँ मिनेटमा टोटनहमका हृयुङ–मिन सनले अग्रता दोब्बर बनाए पनि गोल अफसाइड भएर रद्द भयो । २१औँ मिनेटमा चेल्सीका रहिम स्टर्लिङले बराबरी गोल गर्नुभयो । तर, भिडियो असिस्टेन्ट रेफ्रीले गोलमा स्टर्लिङले हृयान्डबल गरेको भनेर निर्णय दिएपछि गोल मान्य भएन ।
२७औँ मिनेटमा पुनः चेल्सीका मोइसेस काइसेडोले बराबरी गोल गरे पनि उहाँको प्रहारमा ज्याक्सन अफसाइड रहेका कारण गोल मान्य भएन । ३३औँ मिनेटमा चेल्सीले पेनाल्टी पायो । टोटनहमका क्रिस्टियन रोमेरोले एन्जो फर्नान्डेजमाथि गरेको फाउलका कारण रोमेरोले रेड कार्डको सामना गर्दै मैदान छाड्नुपरेको थियो । पाल्मरले उक्त पेनाल्टीमा गोल गर्दै खेल बराबरीमा ल्याउनुभयो ।
३७औँ मिनेटमा ज्याक्सनले बललाई पुनः जाली चुमाउनुभयो । तर, उहाँलाई पास दिएका स्टर्लिङ अफसाइड भएपछि गोल मान्य भएन । पहिलो हाफको अन्तिमतिर १० जनामा सीमित टोटनहमका जेम्स म्याडिसन र मिकी भ्यान डे भेन घाइते हुँदै मैदान बाहिरिनुभयो ।
७५औँ मिनेटमा ज्याक्सनले स्टर्लिङको पासमा गोल गर्दै खेलमा चेल्सीलाई अग्रता दिलाउनुभयो । तर, ७९औँ मिनेटमा एरिक डायरले बराबरी गोल गरे पनि अफसाइड भएपछि गोल पुनः रद्द भयो । त्यसपछि खेलको अन्तिमतिर ज्याक्सनले दुई गोल थप्दै हृयाट्रिकसमेत पूरा गर्नुभयो । उहाँले इन्जुरीको समयको दोस्रो र सातौँ मिनेटमा गोल गर्दै हृयाट्रिक पूरा गर्दै खेललाई ४-१ को स्थितिमा पुर्याउनुभयो ।
टोटनहमको यो सिजन लिगमा पहिलो हार हो । ११औँ चरणको खेल अगाडि पहिलो स्थानमा रहेको टोटनहम यस चरण सकिँदा दोस्रो स्थानमा रहेको छ । टोटनहमको ११ खेलमा आठ जित, दुई बराबरी र एक हारसहित २६ अंक छ । विजयी चेल्सी भने ११ खेलमा चार जित, तीन बराबरी र चार हारसहित १५ अंकका साथ १०औँ स्थानमा छ । एजेन्सी ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच