काठमाडौं । द लोकेशन गाइड लण्डनको आयोजनामा लण्डनमा हालै भएको ‘फोकस २०२३, मिट द मेकर्स’ नामक संसारभरका चलचित्रकर्मी तथा मिडियाकर्मीहरूको सम्मेलनमा नेपालका तर्फबाट सम्पादक तथा निर्देशक निशान बाबू घिमिरेले सहभागिता जनाउनुभएको छ । यही डिसेम्बर ५ र ६ तारिखका दिन लण्डनको विजनेस डिजाइन सेन्टरमा सम्पन्न भएको दुई दिने सम्मेलनमा कोष्टारिका फिल्म कमिसन, ब्रिटिश फिल्म कमिसन, फिल्म् फ्रान्स सि एम सि, हङकङ टुरिज्म बोर्ड, इटालियन फिल्म कमिसन, जर्मन फिल्म कमिसन, इन्टरनेशनल कास्टिङ डिरेक्टर असोसियसन, मड्रिड फिल्म अफिस, फिल्म इन फिन्ल्यण्ड, पोल्याण्ड फिल्म असोसियसन, स्पेन फिल्म कमिसनलगायत राष्ट्रका फिल्म तथा मिडियाकर्मी, व्यवस्थापक र विभिन्न देशका सुप्रसिद्ध वक्ताहरूले सहभागिता जनाएका थिए ।
नेपालको तर्फबाट एकमात्र प्रतिनिधिका रूपमा रहनुभएका निशान नेपाली पोशाक दौरा सुरवाल र भादगाउँले टोपीमा ठाँटिएर बस्दा धेरै सहभागीको नजर उहाँतर्फ पुगेको थियो । यस सम्मेलनका लागि निशानलाई आयोजकहरूले लामो अध्ययन र केही चरणको वार्तालापमार्फत छनोट गरेका थिए ।
नेपाल म्युजिक भिडियो निर्देशक समाजका उपाध्यक्षसमेत रहनुभएका निशानले नेपाल र नेपाली संस्कृतिलाई झल्काउन र नेपाली चलचित्र क्षेत्रका बारेमा केही जानकारी दिलाउन एउटा स्टल नै राख्नुभएको थियो । जहाँ अन्य देशका सहभागीले नेपालका विभिन्न महत्वपूर्णस्थल र संस्कृति झल्काउने तस्वीरसहित भिडियो क्लिप्सहरू, नेपाली फिल्म, म्युजिक भिडियो र वृत्तचित्रका भिडियो क्लिप्सहरू अवलोकन गरेका थिए ।
लण्डन जानुपूर्व निशानले कार्यक्रमका बारेमा नेपाल चलचित्र विकास बोर्डलाई जानकारी गराएपछि बोर्डले समेत उहाँको यो कदम र उपलब्धिप्रति समर्थन जनाउँदै स्टलका लागि आवश्यक केही दस्तावेज उपलब्ध गराएको थियो ।
निशानका अनुसार महामेलामा सहभागी मार्भल, नेटफ्लिक्सका प्रतिनिधिहरूले नेपालको विषयमा चासो राखेका थिए । ‘मैले मेरो स्टलमा द सोल अफ द हिमालयजको व्यानर राखेको थिएँ । चलचित्र विकास बोर्डको फिल्मिङ इन नेपाल पुस्तक अन्य देशका सहभागीलाई देखाउँदा उनीहरू नेपालको सुन्दरता देखेर प्रभावित भएका थिए’ निशानले भन्नुभयोे ‘केही देशका फिल्ममेकर डकुमेन्ट्री खिच्नका लागि नेपाल आउँछु भनेका छन् ।’
चाँडै चलचित्र ‘मुना’को निर्देशन र सम्पादनको तयारीमा रहनुभएका निशानले यो कार्यक्रममा सहभागिता जनाएपछि चलचित्र निर्माण र बजारीकरणमा समेत थप टेवा पुगेको सुनाउनुभयो । उहाँले भन्नुभयो, ‘विश्वभरका चलचित्रकर्मीसँग साक्षात्कार भएर अनुभव साटासाट गर्न पाउँदा धेरै कुरा सिक्न पाइदो रहेछ ।’
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच