काठमाडौं । नेपालमा माग अनुसारको खाद्यान्न मौज्दात नभएकाले खाद्यान्न संकट आउन सक्ने भन्दै अधिकारीहरूले चिन्ता व्यक्त गर्न थालेका छन् । अन्तरिक उत्पादन र बजार माग अनुसार खाद्यान्न मौज्दातमा मुलुक सहज अवस्थामा नरहेको उनीहरूको भनाइ छ ।
अधिकारीहरूले गत वर्षको तुलनामा धान उत्पादन ५० प्रतिशत कमी हुने देखिएको जनाएका छन् । सरकारसँग बजार मूल्य नियन्त्रण गर्ने गरी खाद्यान्न मौज्दातसमेत नहुने अवस्था रहेको बताइएको छ । खाद्यान्नको आन्तरिक उत्पादन र आयातका आधारमा १० प्रतिशत मौज्दात हुनुपर्नेमा एक प्रतिशत पनि मौज्दात नरहने अवस्था देखिएको उद्योग वाणिज्य तथा आपूर्ति मन्त्रालयका सचिव नारायण शर्मा दुवाडीले बताउनुभएको हो ।
बिहीबार संसद्को उद्योग तथा वाणिज्य र श्रम तथा उपभोक्ता हित समितिको बैठकमा उहाँले गत वर्षको तुलनामा यस वर्ष धान उत्पादन करिब ५० प्रतिशत कमी आउने कृषि मन्त्रालयबाट सूचना आएको भन्दै मुलुकको आन्तरिक खाद्यान्न उत्पादनको हिसाब सहज अवस्थामा नभएको जानकारी गराउनुभयो । खाद्य व्यवस्था तथा व्यापार कम्पनीले खरिद गर्ने धान र चामलको हिस्सा पनि बजार माग पूरा गर्नसक्ने परिणाममा नभएको भन्दै सचिव दुवाडीले उत्पादन र मागका आधारमा करिब एक प्रतिशत हाराहारीमा मात्रै धान वा चामलको मौज्दात सरकारसँग रहने अवस्था रहेको बताउनभयो ।
१० प्रतिशत हाराहारीमा मौज्दात राख्न नसके बजारको आपूर्ति र मूल्यवृद्धि नियन्त्रण गर्नसक्ने अवस्था नहुने उहाँको भनाइ थियो । खाद्य संस्थान तथा व्यापार कम्पनीका प्रमुख कार्यकारी अधिकृत मोहनप्रकाश चन्दले व्यापार कम्पनीले ४६ हजार क्विन्टल धान खरिदको तयारी गरेको बताउनुभयो । लक्ष्यानुसार कम्पनीले धान खरिद गर्न नसक्ने अवस्था देखिएकाले दुई लाख ९१ हजार क्विन्टल चामल खरिदका लागि टेण्डर आहृवान गरिएको उहाँले जानकारी गराउनुभयो ।
भारतबाट नेपाललाई प्राप्त भएको ९५ हजार मेट्रिकटन चामल आयात कोटामध्ये कम्पनीले आफ्नै आर्थिक स्रोतबाट २० हजार मेट्रिक टन र सरकारको आर्थिक सहयोग भएमा थप २० हजार मेट्रिक टन चामल खरिद गर्नेगरी आवश्यक पहल थालेको उहाँको भनाइ थियो । भारतले नेपालमा चामल निर्यात गर्न स्वीकृत गरेको एजेन्सीले मूल्यको विषयमा विवरण नपठाउँदा चामल खरिदमा ढिलाइ भइरहेको चन्द्रले बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच