नेकपा एस केन्द्रीय परिषद् बैठक

काठमाडौं । नेकपा एकीकृत समाजवादीको केन्द्रीय परिषद्को दोस्रो बैठकले विभिन्न २४ बुँदे समसामयिक प्रस्ताव पारित गरेको छ । काठमाडौंको कमलादीस्थित प्रज्ञा प्रतिष्ठानमा आइतबार र सोमबार दुई दिन चलेको केन्द्रीय परिषद् बैठकले विभिन्न समसामयिक विषयमा प्रस्ताव पारित गरेको हो । नेकपा एकीकृत समाजवादीको १९ पदाधिकारीसहित १९९ केन्द्रीय कमिटी हुने भएको छ । काठमाडौंको कमलादीस्थित प्रज्ञाप्रतिष्ठानमा आइतबार र सोमबार दुई दिन चलेको केन्द्रीय परिषद् बैठकले केन्द्रमा १९ पदाधिकारीसहित १९९ केन्द्रीय कमिटी रहने प्रस्ताव पारित गरेको हो ।

केन्द्रीय परिषद्को बैठकमा पार्टी उपाध्यक्ष बेदुराम भुसालले पार्टीका सबै कमिटीका पदाधिकारी तथा सदस्यहरू प्रत्यक्ष निर्वाचित हुने जानकारी दिनुभयो । सोमबार सम्पन्न पार्टीको दोस्रो केन्द्रीय परिषद् बैठकका निर्णय सुनाउँदै उपाध्यक्ष भुसालले सबै कमिटीका पदाधिकारी तथा सदस्यहरू महाधिवेशन वा सम्बन्धित तहका अधिवेशनहरूबाट प्रत्यक्ष निर्वाचित हुने जानकारी दिनुभयो । प्रदेश कमिटीको संख्या ७५ देखि ९९ सम्म हुने र प्रदेश कमिटीको पदाधिकारीको संख्या सात हुने विधानमा व्यवस्था गरिएको छ । प्रदेश पदाधिकारीमा अध्यक्ष, उपाध्यक्ष, सचिव र तीन उपसचिव हुने व्यवस्था गरेको एकीकृत समाजवादीले जिल्ला कमिटी ५५ सदस्यीय बनाउने व्यवस्था गरेको छ । तर, एकभन्दा बढी निर्वाचन क्षेत्र भएका जिल्लामा तीन महिला थपिने बताइएको छ ।

यस्तै, जिल्ला कमिटीका पदाधिकारीको संख्या पनि सात नै रहने भएको छ । जुन हाल कायम व्यवस्था हो । पालिका कमिटीको संख्या ४५ बनाउने व्यवस्था परिषद् बैठकले गरेको छ । तर, पाँचभन्दा बढी वडा भएका पालिकामा प्रत्येक वडाबाट दुईजना थप्ने निर्णय परिषद् बैठकले गरेको छ । परिषद्ले गरेका निर्णयलाई हलले ताली बजाएर अनुमोदन गरेको थियो ।

नेताहरूको उमेरहद नराख्ने निर्णय
नेकपा एकीकृत समाजवादीले नेताहरूको उमेरहद नराख्ने निर्णय गरेको छ । दुई वर्षपछि बसेको केन्द्रीय परिषद् बैठकले पार्टी अध्यक्ष माधवकुमार नेपाल र सम्मानित नेता झलनाथलाई आगामी महाधिवेशनका लागि मैदान खुल्ला हुनेगरी उमेरहद नराख्ने निर्णय गरेको हो । पार्टीको सबै कमिटीमा समावेशी सिद्धान्तअनुसार २० प्रतिशत युवा राख्ने निर्णय गरेको उपाध्यक्ष वेदुराम भुसालले जानकारी दिनुभयो । केन्द्रीय कमिटीभित्रको संरचना केन्द्रीय कमिटी, पोलिटब्युरो र स्थायी कमिटी रहनेछ । केन्द्रीय निकायमा राष्ट्रिय महाधिवेशन, केन्द्रीय कमिटी, अनुशासन आयोग, लेखा परीक्षण आयोग, निर्वाचन आयोग, सल्लाहकार परिषद्, जेष्ठ कम्युनिष्ट मञ्च र केन्द्रीय परिषद् रहने व्यवस्था गरेको छ । प्रदेशमा भने आयोगहरू रहने छैनन् । महाधिवेशन र अधिवेशनका प्रतिनिधि छनोटसम्बन्धी विषय र स्थानीय कमिटीहरूको संख्या र पदाधिकारीको विषय सोमबारदेखि नै लागू भएको जनाइएको छ । यस्तै, स्थानीय कमिटीको पदाधिकारी संख्या अधिवेशन गर्दादेखि लागू हुने पार्टीले जनाएको छ ।

भ्रष्टाचारविरुद्धको अभियानमा बहाना नखोज्न सरकारलाई चेतावनी
सत्तासाझेदार दलसमेत रहेको नेकपा एकीकृत समाजवादीले भ्रष्टाचारविरुद्धको अभियानमा बहाना नखोज्न सरकारलाई सचेत गराएको छ । परिषद् बैठकका निर्णय सार्वजनिक गर्न आयोजित पत्रकार सम्मेलनमा पार्टी महासचिव घनश्याम भुसालले एनसेलको सेयर न्यून मूल्यांकन गरी बिक्री गर्ने र अर्बौं रकम कर छली गर्ने संगठित प्रयत्न गरेको घटनाप्रति बैठकले गम्भीर रूपमा सरकारको ध्यानाकर्षण गराउने निर्णय गरेको जानकारी दिनुभयो । एकीकृत समाजवादीले एनसेल प्रकरणबारे सत्यतथ्यको खोजी गरी आर्थिक अपराध गर्न दुरुत्साहन गर्ने–गराउने जोसुकैलाई पनि पत्ता लगाई कानुनी कारबाही गर्न र एनसेलको स्वामित्व सरकारमा ल्याउन आवश्यक प्रक्रिया अगाडि बढाउन सरकारसँग माग गरेको छ ।

बैठकले सहकारी क्षेत्र दिनानुदिन संकटग्रस्त बन्दै गएकोमा पार्टीले गम्भीर चिन्ता व्यक्त गरेको उल्लेख गर्दै महासचिव भुसालले कतिपय सहकारी संस्थाले अधिकारको दुरुपयोग र बचतको उपचलन गरी जनताको ठूलो धनराशीमा आर्थिक तथा वित्तीय अपराध गरेको निष्कर्ष निकालेको छ । सहकारी सम्बन्धी दुःखद घटनाहरू सार्वजनिक भइरहेकाले सहकारी क्षेत्रमा आर्थिक अनुशासन कायम गर्न र जनताको सम्पत्ति डुब्न नदिन नेपाल सरकारले सशक्त अनुगमन गर्न तथा आवश्यक कानुनहरूको निर्माण गरी सही दिशा दिन पनि नेकपा एकीकृत समाजवादीले सरकारसँग माग गरेको छ ।

मुलुकको लिम्पियाधुरा तथा कालापानी लगायतका क्षेत्रहरूमा भएको अतिक्रमणको विरोध गर्दै एकीकृत समाजवादीले अतिक्रमित भूमि फिर्ता गर्न नेपाली जनताले बढाइरहेको दबाबप्रति ऐक्यबद्धता जनाउँदै सो क्षेत्र फिर्ता गराउन सरकारलाई प्रभावकारी कदमहरू चाल्न ध्यानाकर्षण गराएको हो । संघीय लोकतान्त्रिक गणतन्त्रमाथि पछिल्ला दिनहरूमा विभिन्न कोणबाट हमला भइरहेको अवस्थाप्रति सचेत रहँदै यी सबै खाले पनरुत्थानवादी विचार र क्रियाकलापको राजनीति तथा वैचारिक रूपमा प्रतिवाद गर्नुपर्ने आवश्यकता रहेको एकीकृत समाजवादीले ठहर गरेको छ । परिवर्तनलाई संस्थागत गर्न र प्राप्त उपलब्धिको रक्षा गर्न सबै अग्रगमनकारी राजनीतिक शक्तिहरूबीच घनीभूत संवाद र सहकार्य आवश्यक रहेको पनि एकीकृत समाजवादीको निष्कर्ष छ । सरकारले भ्रष्टाचारका विरुद्धमा देखाएको सक्रियताले जनतामा आशा जगाएको उल्लेख गर्दै एकीकृत समाजवादीले कुनै पनि बहानामा भ्रष्टाचारविरुद्धको अभियान नरोक्न सरकारलाई सचेतसमेत गराएको छ ।

कम्युनिष्ट पार्टीले श्रमजीवी वर्गको प्रतिनिधित्व गर्छ : खनाल
नेकपा एकीकृत समाजवादीका सम्मानित नेता झलनाथ खनालले समाजवादी क्रान्ति हाँक्नसक्ने कम्युनिष्ट पार्टी नेकपा एकीकृत समाजवादी मात्र भएको दाबी गर्नुभएको छ । सोमबार पार्टीको केन्द्रीय परिषद् बैठकको समापन समारोहलाई सम्बोधन गर्दै नेता खनालले अन्य पार्टीहरू नामका मात्र कम्युनिष्ट पार्टी भएको टिप्पणी गर्नुभयो । नेता खनालले भन्नुभयो, ‘जति पनि कम्युनिष्ट पार्टी छन् ती कम्युनिष्ट पार्टीहरू नामका मात्र कम्युनिष्ट पार्टी भए पनि समाजवादी क्रान्ति हाँक्ने पार्टी बन्न सकेका छैनन् । त्यस्तो पार्टी बनाउने जिम्मा आज हाम्रो काँधमा आएको छ ।’ परिषद् बैठकमा एउटै एजेण्डामा मात्र छलफल भएको र विधान कसरी परिष्कृत गर्ने भन्नेबारेमा छलफल भएको उल्लेख गर्दै नेता खनालले अझै पार्टी विधानमा धेरै कुरा सच्याउनुपर्ने आवश्यकता रहेको स्पष्ट पार्दै भन्नुभयो, ‘नेपाल कम्युनिष्ट पार्टी आमनेपाली जनता तथा श्रमजीवी सर्वहारा वर्गको हित र प्रतिनिधित्व गर्ने राजनीतिक संस्था हो । सबै वर्गको प्रतिनिधित्व गर्ने पार्टी हुँदैन । तर, कम्युनिष्ट पार्टीले श्रमजीवी वर्गको प्रतिनिधित्व गर्छ । त्यसैले विधानमा सच्याउनुपर्ने धेरै कुरा छन् । विधानमा रहेको लोकतान्त्रिक मूल्य–मान्यतासहितको समाजवाद भनेको के हो ?’