काठमाडौं । लोकदोहोरी गीत-संगीत क्षेत्रमा आफ्नो नामलाई उँचो पार्दै लानुभएको छ रेनुका भट्टराईले । अर्घाखाँचीको खिदिम-४ मा जन्मिनुभएकी गायिका भट्टराई हाल रूपन्देहीको सैनामैना-६ मा रहेर आफ्नो सांगीतिक यात्रालाई अगाडि बढाइरहनुभएको छ । सानैदेखिको रुचिलाई वास्तविकतामा परिणत गर्न धेरै मिहिनेत गर्नुभएकी भट्टराईले ०७३ सालदेखि यो क्षेत्रलाई निरन्तरता दिइरहनुभएको छ । गायिका भट्टराई विद्यालयमा हुने हरेक कार्यक्रममा गायनका लागि तयारी अवस्थामा रहनुहुन्थ्यो र मौका पाउनासाथ आफ्नो गायकी प्रतिभा पस्किहाल्नुहुन्थ्यो । विद्यालयका कार्यक्रममा आफ्नो गायन प्रतिभा देखेर विद्यालयका शिक्षक, शिक्षिका तथा साथीसंगिनीहरूले प्रशंसा गर्ने गरेको उहाँ सुनाउनुहुन्छ ।
प्रत्यक्ष दोहोरी गायनमा समेत उत्कृष्ट मानिनुभएकी गायिका भट्टराई मेला महोत्सवहरूमा अत्यधिक माग हुने गायिकामध्येमा पर्नुहुन्छ । उहाँका ‘घुम्ती घुम्ती रोड’, ‘मत ठिटो गाउँले’, ‘बत्ती पिल पिली’, ‘सिक्री घाँटीमा’, ‘कुरकुरे वैंश’ लगायतका गीत दर्शक/श्रोतामाझ प्रिय छन् । नयाँ गीत ल्याउने तयारीमा रहनुभएकी गायिका भट्टराई लोकदोहोरीमात्र नभएर लोकपप, तीज, आधुनिकलगायतका विभिन्न विधाका गीत गाउन पनि आफू पछि नपर्ने बताउनुहुन्छ ।
दर्शक श्रोताले माया गरेकै कारण देश तथा विदेशमा हुने विभिन्न कार्यक्रममा उहाँको माग पनि उत्तिकै छ । गायिका भट्टराई देशका विभिन्न जिल्ला तथा विदेशमा आफ्नो प्रस्तुतिमार्फत् दर्शक/श्रोताको मन जित्न सफल हुनुहुन्छ ।
गायिका भट्टराई आफ्नो प्रस्तुतिले दर्शक श्रोताको मनमा खुसी छाउँदाको जस्तो आनन्दको अनुभूति अन्य केही गर्दा नपाइने बताउनुहुन्छ । दर्शक श्रोताको मायाले नै आफूलाई यस क्षेत्रमा झनै क्रियाशील भएर लाग्न उत्प्रेरित गरेको उहाँको ठम्याइ छ ।
छोटो समयको सांगीतिक यात्रामा गायिका भट्टराई विभिन्न अवार्डबाट सम्मानित पनि हुनुभएको छ । उहाँले पाँचौँ ज्योति फिल्मस् म्युनिक अवार्ड २०८० मा ‘सर्वोत्कृष्ट अवार्ड’, कल्चरल नेसनल म्युजिक अवार्ड २०२३, हालै मलेसियामा सम्पन्न तेस्रो सिल्भर इन्टरनेसनल म्युजिक अवार्ड २०२४ मा ‘प्रत्यक्ष गायनमा सर्वोत्कृष्ट लोकदोहरी गायिकाको अवार्ड’, राष्ट्रिय लोक सांस्कृतिक सम्मानलगायत दर्जन बढी अवार्ड तथा सम्मानबाट सम्मानित भइसक्नुभएको छ ।
आफ्नो कामप्रति इमान्दारिता, धैर्यता, मिहिनेत, लगनशीलता तथा दृढ संकल्प लिएर अगाडि बढे मात्र जिन्दगीमा सफलता मिल्ने कुराको जानकार गायिका भट्टराईले यही मूलमन्त्रका साथ सांगीतिक क्षेत्रमा सफलता हासिल गर्नुभएको हो भन्दा फरक नपर्ला । विभिन्न गायन प्रतियोगिताहरूमा निर्णायकको भूमिका पनि निभाउँदै आउनुभएकी गायिका भट्टराई गीतका अन्य विधासँगै नेपालको मौलिक लोकभाकालाई बचाइराख्नुपर्ने बताउनुहुन्छ । भविष्यमा पनि गीत संगीतकै माध्यमबाट देश र जनताका साथै दर्शक श्रोतालाई मनोरञ्जन प्रदान गर्नु नै आफ्नो मुख्य लक्ष्य रहेको गायिका भट्टराई बताउनुहुन्छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच