काठमाडौं । नेपाल नम्बर एक एमेच्योर गल्फर सुवास तामाङ प्रोफेसनल गल्फ टुर अफ इण्डिया (पिजिटिआई) को फुलकार्ड प्राप्त गर्न सफल हुनुभएको छ । जम्सेधपुरस्थित ७१ पारको गोलमुरी गल्फ क्लबमा सम्पन्न टाटा स्टिल पिजिटिआई क्वालिफाइङ स्कुलको अन्तिम दिन ४-अण्डर ६७ को स्कोर कार्ड बनाउँदै उहाँले ७२ होलको प्रतिस्पर्धामा १३-अण्डर २ सय ७१ को रवाफिलो स्कोर खडा गर्दै संयुक्तरूपमा दोस्रो स्थान बाँड्नुभयो ।
क्वालिफाइङ स्कुलमा पहिलो दिनदेखि नै उत्कृष्ट प्रदर्शन गर्नुभएका सुवासले अन्तिम दिन पनि लोभलाग्दो प्रदर्शन गर्नुभयो । उहाँले फ्रन्ट नाइन १–अण्डर ३४ मा पूरा गर्नुभयो । दोस्रो, चौथो र नवौँ होलमा बर्डी प्रहार गर्नुभयो र पाँचौँ र सातौँ होलमा एक-एक सट खेर फाल्नुभयो । यसपछि ब्याक नाइन बोगी फ्री खेल्नुभयो । १०औँ, ११औँ र १६औँ होलमा बर्डीको सफलता प्राप्त गर्दै उहाँले ३-अण्डर ३३ को स्कोर दर्ज गर्नुभयो । सुवासले पहिलो दिन ४-अण्डर ६७, दोस्रो दिन ५-अण्डर ६६ र तेस्रो दिन इभन-पार ७१ मा खेल सक्नुभएको थियो ।
प्रभावशाली प्रदर्शनमा सुवासले सन् २०२४ को भारतीय गल्फ टुरका लागि फुलकार्ड प्राप्त गर्नुभएको छ । योसँगै उहाँको प्रोफेसनल गल्फ करियरको सुरुवात हुनेछ । सुवास नेपाली एमेच्योर गल्फका अहिलेसम्मकै सर्वाधिक सफल गल्फर हुनुहुन्छ । उहाँले १३औँ दक्षिण एसियाली खेलकुद (साग) मा ऐतिहासिक दुई स्वर्ण जित्नुभएको थियो । यसपछि बंगलादेश ओपनमा सद्भाव आचार्यसँग मिलेर टिमतर्फ पनि स्वर्ण जित्नुभएको थियो । सो प्रतियोगितामा उहाँले व्यक्तिगततर्फ रजत हात पार्नुभएको थियो । टुरिजम कपमा पनि उहाँले नेपाललाई टिमतर्फ स्वर्ण दिलाउनुभएको थियो ।
सूर्य नेपाल गल्फ टुरमा सुवासले प्रोफेसनल गल्फरहरूलाई कयौँपटक पछि पार्नुभयो । उहाँले ५ पटक प्रोफेसनल र एमेच्योर दुवैतर्फको उपाधि जितिसक्नुभएको छ । पछिल्लो समय नेपाल गल्फ संघले सुवासलाई विशेष प्रशिक्षणका लागि भारतको तरूण सरदेशाई एकेडेमीमा पठाएको थियो । अहिले पनि उहाँ सोही एकेडेमीमा प्रशिक्षणरत हुनुहुन्छ ।
यो प्रतियोगिताको उपाधि चिलीका माटियास डोमिङग्वेजले हात पार्नुभयो । अन्तिम दिन ७-अण्डर ६४ खेल्दै उहाँले समग्रमा २०-अण्डर २ सय ६४ को स्कोर निकाल्नुभयो । नेपालका सुवाससँगै भारतीयद्वय मोहम्मद सन्जु र एमेच्योर अंशुल कब्थियाल कुल १३-अण्डर २ सय ७१ सहित संयुक्तरूपमा दोस्रो हुनुभयो । यो पटक पिजिटिआई क्यु-स्कुलमा सहभागी ४ सय १९ गल्फरमध्ये भारतबाहेक १७ देशका ६१ खेलाडीले दाबेदारी प्रस्तुत गरेका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच