शुभाकर विश्वकर्मा/हिटा
नेपालगञ्ज । बाँकेको नेपालगञ्जस्थित भेरी अस्पतालमा ‘एमआरआई’ सेवा सञ्चालनमा आएको छ । अस्पतालमा बिहीबारदेखि पहिलोपटक ‘एमआरआई’ सेवा सञ्चालनमा आएको हो । उक्त सेवा नेपालगञ्ज उपमहानगरपालिकाका नगरप्रमुख प्रशान्त विष्ट र भेरी अस्पताल विकास समितिका अध्यक्ष वीरेन्द्रबहादुर शाहले संयुक्तरूपमा शुभारम्भ गर्नुभयो । सेवा शुभारम्भ भएसँगै अस्पतालमा भर्ना हुनुभएकी १९ वर्षीया सुत्केरी निलम बर्माले सेवा लिनुभयो । उहाँको स्वास्थ्य परीक्षण गरेर सेवा सुरु गरिएको हो । स्वास्थ्य तथा जनसंख्या मन्त्रालयले अस्पतालका लागि करिब २४ करोड रुपैयाँको लागतमा उक्त मेसिन उपलब्ध गराएको थियो । अस्पतालका अनुसार यो ‘थ्रिटेस्ला’ एमआरआई मेसिन हो । सरकारी अस्पतालमै एमआरआई सेवा सञ्चालनमा आएपछि गरिब तथा विपन्न समुदायका बिरामीलाई राहत मिलेको छ ।
उक्त अवसरमा बोल्दै नेपालगञ्ज उपमहामनगरपालिकाका नगरप्रमुख विष्टले भेरी अस्पतालको एमआरआई मेसिनलाई दिगोरूपमा सञ्चालन गर्नुको विकल्प नभएको बताउनुभयो । उहाँले स्थानीय सरकारले पनि आवश्यक सहयोग गर्ने प्रतिबद्धता जनाउनुभयो । ‘यसलाई कसरी दिगोपन गर्न सक्छौँ, यसको उपयोगिताका बारेमा हामी प्रचार–प्रसार गर्न सक्छौँ, एमआरआई गराउन यसअघि लखउन, काठमाडौं जानुपर्ने अवस्था थियो, रोग पत्ता नलागेर अकालमा ज्यान जानुपर्ने स्थिति थियो, यसलाई दिगोपन गराउन नेपालगञ्ज उपमहानगरपालिकाले पनि आवश्यक सहयोग गर्ने प्रतिबद्धता व्यक्त गर्दछु,’ विष्टले भन्नुभयो ।
अस्पताल विकास समितिका अध्यक्ष शाहले एमआरआई मेसिनलाई दिगोरूपले सञ्चालन गर्ने अस्पतालको योजना रहेको बताउनुभएको थियो । उहाँले भन्नुभयो, ‘अहिले सामान्यरूपले सञ्चालन गरेका छौँ, भोलिका दिनमा विस्तृतरूपमा सञ्चालन गरेर जानेछौँ ।’ एमआरआईलगायत स्वास्थ्य उपचार सेवा लिनका लागि हरेक नागरिकले नेपाल सरकारले लागू गरेको ‘स्वास्थ्य बिमा’ गराउन आवश्यक रहेको उहाँले बताउनुभयो ।
एमआरआईसँगै अन्य विशेषज्ञ सेवालाई पनि अस्पताल विकास समितिले अगाडि बढाउने उहाँको भनाइ थियो । अस्पतालका प्रमुख मेडिकल सुपरीटेन्डेन्ट डा. पवनजंग रायमाझीले अस्पतालबाट विभिन्न सेवाहरू प्रदान गरिरहेको अवस्थामा अहिले निदानका विषयमा एमआरआई सेवा पनि सुरु गरिएको बताउनुभयो । नेपाल सरकारले अस्पताललाई २४ करोड रुपैयाँको लागतमा एमआरआई मेसिन उपलब्ध गराएको जानकारी उहाँले दिनुभयो । संघीय सरकारको मातहतमा सञ्चालित भेरी अस्पताल पश्चिम नेपालकै रेफरल अस्पतालका रूपमा परिचित छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच