पाल्पा । पाल्पामा सम्पन्न नेपाल मानव अधिकार संगठनको १५औं राष्ट्रिय सम्मेलनले केन्द्रीय अध्यक्ष र प्रदेश संयोजकहरू निर्विरोध निर्वाचित गरेको छ । केन्द्रीय अध्यक्षमा इन्द्रप्रसाद अर्याल निर्वाचित हुनुभएको छ । यस्तै कोशी प्रदेश संयोजकमा हिराबहादुर निरौला, मधेश प्रदेश संयोजक बिमल ठाकुर, बाग्मती प्रदेश संयोजक राजु सिग्देल, गण्डकी प्रदेश संयोजक लक्ष्मी जिसी, लुम्बिनी प्रदेश संयोजक त्रिलोचन पौडेल, कर्णाली प्रदेश संयोजक लिलराज रोकाया र सुदूरपश्चिम प्रदेश संयोजक दिनेशराज जैशी रहनुभएको छ । सम्मेलनमा देशभरबाट दुई सय बढी प्रतिनिधि सहभागी थिए ।
अगुवा मानवअधिकारकर्मीहरूले संक्रमणकालीन न्याय सम्बन्धी विधेयक पारित गराउन सरकारले एमालेको सहयोग खोजे पनि यो प्रक्रिया अहिले नै टुंगोमा पुग्ने सम्भावना कमै रहेको बताएका थिए । सम्मेलनमा सहभागी मानवअधिकारकर्मी अगुवाहरूले एमालेले विभिन्न स्वार्थ मिलेर पास गराउन सहमति दिए पनि यो प्रक्रिया फेरि अड्किने धारणा राखेका हुन् ।
मानवअधिकारवादी चरण प्रसाईले भन्नुभयो, ‘बहुमत सांसदबाट पारित गर्न सक्ने अवस्था हुँदाहुँदै वर्तमान सरकारले सहमतिबाटै टुंग्याउन खोजेको देखिएको छ । तर, अहिले नै यो टुंगोमा पुग्ने देखिरहेको छैन ।’
उहाँले राष्ट्रिय सहमति गरेर संशोधन विधेयक पारित गर्दा राजनीति विजय भए पनि त्यो मान्य नहुने बताउनुभयो । अहिलेकै विधेयकलाई पीडित र अन्तर्राष्ट्रिय समुदायले नमान्ने बताउँदै संयुक्त राष्ट्र संघले पनि नमान्ने उहाँले बताउनुभयो ।
‘यो प्रक्रियालाई अन्तर्राष्ट्रिय मापदण्ड बमोजिम र सर्वोच्च अदालतको आदेश बमोजिम साथै पीडितलाई मुटुमा राखेर विधेयक अघि बढाए मात्र सहयोग गर्ने घोषणा संयुक्त राष्ट्र संघले भनेको छ,’ उहाँले भन्नुभयो ।
मानवअधिकारकर्मी सुदीप पाठकले सशस्त्र द्वन्द्वका क्रममा जोडिएका र प्रभावित भएका व्यक्तिलाई कसरी सम्बोधन गर्ने भन्ने विषयमा नमिलेका कुरा मिलाउन खोजेको देखिएको बताउनुभयो । उहाँले संक्रमणकालीन न्यायसम्बन्धी विधेयक पारित गराउन पछिल्लो समयमा दौडधुप देखिए पनि पीडित पक्षलाई न्याय हुनुपर्ने सुझाव दिनुभयो ।
वरिष्ठ अधिवक्ता तथा मानवअधिकारकर्मी इन्द्रप्रसाद अर्यालले सशस्त्र युद्धका घटनामा कम सजाय दिने, मानवअधिकार उल्लंघनका घटनामा मेलमिलापका लागि पीडितको सहमतिका विषयमा लगायतमा एमालेले राखेको फरक मतलाई सम्बोधन गर्न खोजेको देखिएको बताउनुभयो । अर्का वरिष्ठ अधिवक्ता दिनेश त्रिपाठीले नागरिकले आन्दोलन गरेर नेतालाई सत्तामा पुर्याइदिए पनि उनीहरूले लात हानेर निकालिदिएको बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच