टिआरसी पीडितमैत्री हुनुपर्ने अडानका कारण राष्ट्रियसभा निर्वाचनमा एक्लिनुपर्‍यो : ओली

काठमाडौं । एमाले अध्यक्ष केपी शर्मा ओलीले संक्रमणकालीन न्यायसम्बन्धी विधेयक (टिआरसी) पीडितमैत्री हुनुपर्छ भन्ने अडान नछोडेका कारण राष्ट्रियसभा निर्वाचनमा एक्लिनुपरेको बताउनुभएको छ । मंगलबारदेखि पार्टी केन्द्रीय कार्यालय च्यासलमा सुरु भएको केन्द्रीय कमिटी बैठकलाई सम्बोधन गर्दै अध्यक्ष ओलीले राष्ट्रियसभा निर्वाचनअघि नै टिआरसी विधेयक पारित गरौँ भनेर प्रधानमन्त्री पुष्पकमल दाहाल ‘प्रचण्ड’ र कांग्रेस सभापति शेरबहादुर देउवाले पटक-पटक प्रस्ताव गरेको बताउनुभयो । उहाँले सो विधेयक पीडितमैत्री हुनुपर्ने आफूहरूको अडानका कारण अघि बढ्न नसकेको दाबी गर्नुभयो । अध्यक्ष ओलीले पीडितलाई मञ्जुर हुनेबित्तिकै सो विधेयक पारित गराउन आफ्नो पार्टी तयार रहेको पनि बताउनुभयो । उहाँले सो विधेयक प्रचण्ड र देउवाकै कारण १८ वर्षसम्म टुंगोमा पुग्न नसकेको जिकिरसमेत गर्नुभयो । अध्यक्ष ओलीले सधैँका लागि अन्त्य हुनेगरी आफ्नो पार्टीले टिआरसी विधेयक टुंगो लगाउनुपर्छ भन्ने मान्यता लिएको पनि बताउनुभयो ।
‘म प्रधानमन्त्री हुँदा हामी शान्ति प्रक्रियाका बाँकी काम टुंग्याउनुपर्छ भन्ने पक्षमा थियौँ । त्यसबेला पनि हामीले टुंग्याउन साह्रै कोसिस गरेका हौँ । तर, प्रचण्डजी र शेरबहादुर देउवाजीले टुंग्याउन मान्नुभएन,’ अध्यक्ष ओलीले भन्नुभयो, ‘किन मान्नुभएन, के शौख हो उहाँहरूको त्यो उहाँहरूले भन्नुहोला । तर, स्पष्टतः उहाँहरूले शान्ति प्रक्रियाका बाँकी कामहरू टुंग्याउन मान्नुभएन । तर, अहिले यसलाई बेस्सरी हतियार बनाउन खोजिएको छ ।’

ओलीले सरकार र सत्तारूढ गठबन्धन पूर्णरूपमा असफल भएको पनि टिप्पणी गर्नुभयो । प्रधानमन्त्री प्रचण्ड आफैँले एक वर्षमा केही गर्न नसकेको तथा अब सप्रिन्छु भन्ने निष्कर्ष सुनाएको जिकिर गर्दै ओलीले सरकार सम्पूर्ण रूपमा असफल भएको दाबी गर्नुभएको हो । ‘मैले त एक वर्षको समीक्षा प्रधानमन्त्रीले गरिरहँदा जम्माजम्मी एउटा निष्कर्ष सुनेँ-केही गर्न सकिएन । अब सप्रिन्छु, अब गर्न कोसिस गर्छु, सप्रिन्छु आदि । केही पनि गर्न सकिनँ भन्ने निष्कर्ष नै हो । अरू केही छैन । सरकार असफल भएको छ । यस सरकारको असफलताले गर्दा देश गरिबीतिर जाँदो छ । अराजकतातिर जाँदो छ । जनतामा असन्तुष्टि बढ्दो छ । असन्तुष्टिले आक्रोशको रूप लिइराखेको छ,’ उहाँले भन्नुभयोे ।

ओलीले सरकारको एक मात्रै एजेण्डा एमालेको विरोध गर्नु रहेको पनि बताउनुभयो । सरकारसँग सुशासनको, भ्रष्टाचार अन्त्यको र आमनेपाली जनताको समस्या समाधान गर्ने कुनै योजना नै नभएको उहाँको भनाइ छ । अध्यक्ष ओलीले सरकार असफल भएकै कारण जनतामा आक्रोश थपिँदै गएको तर्कसमेत गर्नुभयो ।

‘मन्त्रीको नैतिकता हरायो, प्रधानमन्त्री हुतिहारा भए’
एमाले अध्यक्ष ओलीले अहिलेको गठबन्धन सरकार भ्रष्टाचार, अनियमितता र कुशासन बढावा गर्नतर्फ केन्द्रित भएको आरोप लगाउनुभएको छ । ओलीले सरकारका मन्त्रीहरू भ्रष्टाचारमा नाम जोडिएको भए पनि झण्डा हल्लाउँदै बयान दिने तथा मानिस मरेको घटनामा दोषी भए पनि पद नछोड्ने खालका रहेको टिप्पणी गर्नुभएको हो । यस्ता मन्त्रीहरूलाई हटाउन नसक्ने ‘हुतिहारा प्रधानमन्त्री’ले शासन गरिरहेको ओलीले बताउनुभयो । ओलीले भन्नुभयोे, ‘सरकारले बनाएको छानविन आयोगले दोषी मन्त्री हो भनेको छ । मन्त्रीमा नैतिकता छैन । हटाउन नसक्ने हुतिहारा प्रधानमन्त्री छन् । आफैँले बनाएको आयोगले दोषी करार गर्दासमेत त्यस्तो मन्त्री बसिरहन मिल्छ ? लोकलाज छैन ।’

ओलीले दुई युवकको ज्यान जानेगरी ललितपुरको बालकुमारी घटनामा दोषी देखिएका भौतिक योजना तथा यातायातमन्त्री प्रकाश ज्वालाले नैतिकताका आधारमा राजीनामा दिनुपर्ने बताउनुभयो । त्यस्तै, अध्यक्ष ओलीले गिरीबन्धु टि-स्टेट जग्गा प्रकरणमा आफ्नो नेतृत्वको सरकारले कुनै पनि हिनामिना नगरेको जिकिर गर्नुभयो । उहाँले भन्नुभयोे, ‘गिरीबन्धुमा अदालतको आदेशअनुसार कानुन मात्र बनाएको हो । हाम्रो समयमा गिरीबन्धु टि-स्टेट प्रकरणमा कुनै प्रकारको लेनदेन र सट्टापट्टा भएको छैन ।’ सरकारले आफूनिकटका व्यक्तिहरूलाई सुनकाण्ड र ललितानिवास जग्गा प्रकरणमा जोगाएको भन्दै ओलीले आलोचना गर्नुभयो ।