माओवादी स्थायी समिति बैठक : राष्ट्रियसभा अध्यक्ष नछाड्न प्रचण्डमाथि दबाब

काठमाडौं । सरकारको नेतृत्व गरिरहेको दल नेकपा माओवादी केन्द्रमा राष्ट्रिय सभाको अध्यक्ष पाउनुपर्ने माग उठेको छ । नेकपा माओवादी केन्द्रको मंगलबार बसेको स्थायी समिति बैठकमा राष्ट्रिय सभाको अध्यक्ष पद माओवादीले पाउनुपर्ने माग उठेको हो । पार्टी मुख्यालय पेरिस डाँडामा बसेको पार्टीको स्थायी समितिको बैठकमा धारणा राख्ने अधिकांश सदस्यहरूले राष्ट्रियसभा अध्यक्षको पदमा पार्टीको तर्फबाट अध्यक्ष पुष्पकमल दाहाल ‘प्रचण्ड’ले अडान राख्नुपर्ने सुझाव दिएका छन् ।

बैठकबारे जानकारी दिँदै पार्टी प्रवक्तासमेत रहनुभएका उपाध्यक्ष अग्निप्रसाद सापकोटाले बैठकमा अधिकांश स्थायी समिति सदस्यहरूले राष्ट्रिय सभाको अध्यक्ष पद माओवादीले पाउनुपर्ने धारणा राखेको जानकारी दिनुभयो । प्रवक्ता सापकोटाले भन्नुभयो, ‘हामीले प्रस्तुत सबै एजेण्डाका बारेमा बृहत् छलफल गर्‍यौँ, निष्कर्षमा पुगिसकेका छैनौँ । पार्टी अभियान सञ्चालन र आगामी योजनाका बारेमा, वर्तमान राष्ट्रिय परिस्थितिबारे पनि अलि बढी छलफल भयो । यसमा राष्ट्रिय सभाको अध्यक्षको निर्वाचनबारे छलफल भयो । अधिकांशले राष्ट्रिय सभाको अध्यक्ष छोड्नु हुन्न भन्ने मत राख्नुभएको छ ।’

स्थायी समिति सदस्यहरूले राष्ट्रिय सभाको अध्यक्ष पद छोड्न नहुने भन्दै अध्यक्ष प्रचण्डको ध्यानाकर्षण गराएको जानकारी दिँदै पार्टी सचिव दिनानाथ शर्माले भन्नुभयो, ‘माओवादी राष्ट्रिय सभामा ठूलो दल हो, अब सहमतिअनुसार प्रधानमन्त्री छोड्नैपर्छ, त्यसपछि हामी संवैधानिक परिषद्मा शून्यको स्थितिमा पुग्छौँ, त्यसो गर्नुहुँदैन । राष्ट्रियसभा अध्यक्ष अनिवार्य हामीले लिनैपर्छ ।’

स्थायी समिति सदस्यका कुरा ध्यानपूर्वक सुन्नुभएका अध्यक्ष प्रचण्डले कुनै प्रतिक्रिया नजनाएको स्थायी समितिका एक सदस्यले बताए । राष्ट्रियसभा अध्यक्षको चुनाव आगामी फागुन २९ गते हुँदै छ । राष्ट्रिय सभाको चुनावअन्तर्गत कोशीमा माओवादीकी चम्पा कार्की पराजित भएपछि माओवादी केन्द्र कांग्रेससँग रुष्ट छ । राष्ट्रिय सभाको अध्यक्षमा कांग्रेसले नेता कृष्णप्रसाद सिटौलालाई अघि सार्ने तयारी गरिरहेको छ ।

कांग्रेससँगको सहकार्यबारे सोच्न ध्यानाकर्षण
नेकपा माओवादी केन्द्रमा हालै सकिएको सत्तासाझेदार दल नेपाली कांग्रेसको महासमिति बैठकको समीक्षा भएको छ । मंगलबार बसेको स्थायी कमिटी बैठकमा बोल्ने सबैजसो स्थायी कमिटी सदस्यहरूले नेपाली कांग्रेस दक्षिणपन्थी बाटोमा लागेको भन्दै कांग्रेससँगको सहकार्यबारे सोच्नुपर्ने धारणा राखेका छन् । बैठकमा भएको छलफलबारे जानकारी दिँदै प्रवक्ता सापकोटाले भन्नुभयो, ‘हालै सम्पन्न नेपाली कांग्रेस महासमिति बैठकमा चलेको चर्चाहरूको बारेमा पनि छलफल भयो, त्यही विषयसँग जोडिएर राष्ट्रियसभा अध्यक्ष कांग्रेसलाई दिन नहुने विषयमा साथीहरूका धारणा आए । यसबारेमा बुधबारको बैठकले अन्तिम निर्णय लिन्छ ।’ गत फागुन ७ देखि १० गतेसम्म ललितपुरको गोदावरीमा चलेको कांग्रेस महासमिति बैठकमा महामन्त्री गगन थापाले आउँदो निर्वाचनमा गठबन्धन गर्न नहुने प्रतिवेदन ल्याउनुभएको थियो । यो प्रस्ताव कांग्रेस महासमितिले पारित गरिसकेको छ । महासमिति बैठकमा पार्टी उपसभापति पूर्णबहादुर खड्काले प्रस्तुत गर्नुभएको प्रतिवेदनप्रति पनि माओवादीले असन्तुष्टि जनाएको छ । खड्काले माओवादीले सशस्त्र संघर्षबारे लेख्दै माओवादीको हिंसात्मक गतिविधिका कारण देश पछाडि धकेलिएको निष्कर्ष प्रतिवेदनमा लेख्नुभएको थियो । खड्काले महासमितिमा राखेको यो प्रतिवेदनबारे माओवादीले स्थायी कमिटी बैठकमा समीक्षा गरेको र यो प्रतिवेदनलाई परिवर्तन अस्वीकार गर्ने र असान्दर्भिक भनिएको नेताहरूले बताएका छन् ।

प्रदेश इञ्चार्ज हेरफेर
नेकपा माओवादी केन्द्रले प्रदेश इञ्चार्जहरूको जिम्मेवारी हेरफेर गरेको छ । मंगलबार बसेको स्थायी समिति बैठकले सबै प्रदेशका इञ्चार्जहरूको जिम्मेवारी हेरफेर गरेको हो । कोशीमा हरिबोल गजुरेल, मधेशमा लीलामणि पोखरेल, बागमतीमा अग्नि सापकोटा, गण्डकीमा दिनानाथ शर्मा, लुम्बिनीमा चन्द्रप्रकाश खनाल, कर्णालीमा कालीबहादुर मल्ल र सुदूरपश्चिममा गिरिराजमणि पोखरेललाई जिम्मेवारी तोकिएको छ । यस्तै, प्रवासअन्तर्गत मध्यपूर्व ब्युरोको इञ्चार्जमा पम्फा भुसाल, भारतमा मातृका यादव र युरोपमा राम कार्कीलाई जिम्मेवारी दिइएको छ । विशेष प्रदेशमा हितमान शाक्य र सम्पर्क समन्वय कमिटीमा देव गुरुङलाई जिम्मेवारी दिएको छ । पार्टी सचिव गणेश साहले कार्यविभाजन मंगलबार बसेको बैठकले टुंग्याएको पुष्टि गर्नुभयो ।

मातृका यादवद्वारा भारतको प्रवास इञ्चार्ज पद अस्वीकार
नेकपा माओवादी केन्द्रका नेता मातृका यादवले पार्टीनिकट भारतको प्रवास कमिटीको इञ्चार्ज पदको जिम्मेवारी अस्वीकार गर्नुभएको छ । मंगलबार बसेको माओवादी स्थायी कमिटी बैठकमा नेता यादवले भारतको इञ्चार्ज बन्न अस्वीकार गरेपछि नेता लक्ष्मण पन्तलाई बनाएको एक नेताले जानकारी दिए । स्रोतका अनुसार यादवले आफूलाई त्यसै पनि भारतनिकट भनेर प्रचारबाजी भइरहेको बेलामा फेरि भारतको इञ्चार्जको जिम्मेवारी बहन गर्न नसक्ने जवाफ दिनुभएको थियो ।

अध्यक्षले खगराजलाई अघि सार्दा मतभेद
अध्यक्ष प्रचण्डले स्थायी कमिटी सदस्यसमेत रहनुभएका प्रदेश सांसद खगराज भट्टलाई मुख्यमन्त्री बनाउने गरी नेतृत्व परिवर्तन गर्ने भनेर गरेको प्रस्तावप्रति माओवादीमा मतभेद देखिएको छ । मंगलबारको बैठकमा प्रचण्डको उक्त प्रस्तावप्रति नेताहरूबीच मतभेद देखिएपछि अर्को दिन निर्णय गर्ने भन्दै बैठक नै स्थगित हुन पुगेको हो । बैठकमा अध्यक्ष प्रचण्डले अहिले भएको निर्णयलाई यथावत राख्ने तर भट्टलाई आगामी दिनमा भने मुख्यमन्त्रीसमेत बनाउने गरी कांग्रेससँग छलफल गर्ने भनेर प्रस्ताव गर्नुभएको थियो । प्रचण्डको उक्त प्रस्तावप्रति नेताहरू चक्रपाणि खनाल, जनार्दन शर्मा र देवेन्द्र पौडेल लगायतले असहमति जनाए । खनाल, शर्मा र पौडेलले गलत ढंगले नेतृत्व परिवर्तन गर्न जायज नहुने धारणा राख्नुभएको थियो । सोही क्रममा नेता भट्टले आफूले कुनै पनि जिम्मेवारी पाउने अवस्था नरहेको भन्दै भावुक हुँदै बीचमै बैठकबाट बाहिरिनुभएको थियो । गत माघ १२ गते नेकपा माओवादी केन्द्र सुदूरपश्चिम प्रदेश संसदीय दलले खगराज भट्टलाई दलको नेताबाट हटाएको थियो । दलको बैठकले सांसद मानबहादुर धामीलाई नयाँ संसदीय दलको नेता चयन गरेको थियो । यो विवाद पार्टीको स्थायी समिति बैठकमा नै विधिवत रूपमा प्रवेश गरेको छ ।