झापाको सार्वजनिक जग्गा हिनामिना प्रकरणमा कार्यालय प्रमुखकै मिलेमतो

काठमाडौं । झापाको दमकस्थित रतुवा र दिपिनी खोला किनार क्षेत्रको करिब ५९ बिघा सार्वजनिक जग्गा हिनामिना प्रकरणमा माओवादी केन्द्रका नेतासहित नापी अधिकृतको पनि प्रत्यक्ष मिलेमतो भएको पाइएको छ । अख्तियार दुरुपयोग अनुसन्धान आयोगले फागुन १३ गते विशेष अदालतमा दायर गरेको मुद्दामा नापी कार्यालय चन्द्रगढी, झापाका तत्कालीन प्रमुख नापी अधिकृत शशिकान्त झा समेतको प्रत्यक्ष मिलेमतो भएको जिकिर छ ।

तत्कालीन प्रमुख नापी अधिकृत शशिकान्त झाले सरकारी जग्गा स्थानीय माओवादी नेता गगन पुरी लगायतको नाममा दर्ता गराइदिँदा आफ्नै श्रीमतीको नाममा समेत राखेको पाइएको हो । मालपोत कार्यालय दमकले २०७५ भदौ १७ गते अख्तियारलाई पठाएको पत्रमा सुरुमा रेवतराज पुरीको नाममा दर्ता गरिएको साबिक दमक-६ को कित्ता नम्बर ३१४९४ वा पुनः कित्ताकाट भई कित्ता नम्बर ३३५२१ बनेको ८ कट्ठा जग्गा तत्कालीन नापी अधिकृत झाले आफ्नी श्रीमती अनारदेवी झाको नाममा दर्ता गराएको उल्लेख छ ।

यसरी सुरु भएको थियो जग्गा व्यक्तिका नाममा बनाउने चलखेल
दमक नगरपालिकास्थित तत्कालीन १३ र १४ वडा (हालको वडा नं. ८) मा फैलिएको खोला किनारको ५८ बिघा १४ कट्ठा १७ धुर जग्गा हिनामिना अभियोगमा माओवादी कोशी प्रदेश कमिटी कोषाध्यक्षसमेत रहेका पुरीसहित १३८ जनालाई बिगो, कैद र जरिवाना तथा २२१ विरुद्ध जग्गा जफत प्रयोजनका लागि प्रतिवादी बनाइएको हो । २०२१ सालको नापीमा सरकारी र सार्वजनिक ठहरिएको दुवै खोला किनार तथा त्यसले चर्चेको ५८ बिघा १४ कट्ठा १७ धुर झापाको चन्द्रगढी र दमकस्थित नापी र मालपोतका कर्मचारीसँगको मिलेमतोमा संगठित गिरोहले व्यक्तिका नाममा दर्ता गरेको अनुसन्धानबाट खुलेको छ । २०२१ र २०३४ सालको नापीमा तत्कालीन श्री ५ को सरकार र सार्वजनिक प्रकृतिको जग्गा कायम रहेकामा यो अभिलेख २०६३ सम्म कायम रहेको देखिन्छ । २०६२/६३ को राजनीतिक परिवर्तनपछि भने जग्गा हत्याउन चलखेल सुरु भएको र १० वर्षको अवधिमा सरकारी-सार्वजनिक जग्गा व्यक्तिका नाममा पुगेको अनुसन्धानमा संलग्न एक अधिकारीको भनाइ छ ।

२०६३ को जेठ/असारबाटै जग्गा खाने/मास्ने खेल सुरु भएर २०६६ पछि जग्गा पुनः नापी गराइएको थियो । पुनः नापी गराउँदा सरकारी-सार्वजनिक जग्गा व्यक्तिका नाममा लगियो । जसमा माओवादी नेता पुरी, अर्का अभियुक्त ओमप्रकाश पौडेल र प्रमुख नापी अधिकृत शशिकान्त झासहितको योजना र मिलेमतोमा काम भएको देखिन्छ ।

सुरुमा रेवतराज पुरीको नाममा दर्ता गराई त्यहाँबाट २०६७ जेठ २१ गते झाले आफ्नी श्रीमती अनारदेवी झाको नाममा जग्गा ल्याएको रेकर्ड देखिएको छ । तत्कालीन नापी अधिकृत झाको २०७५ साल पुस ७ गते मृत्यु भइसकेको छ । यद्यपि, सरकारी जग्गा श्रीमतीको नाममा राखेको र करोडौँको सरकारी सम्पत्ति व्यक्ति विशेषका नाममा दर्ता गर्न सहयोग गरेको भन्दै झाकै सम्पत्तिबाट जफत गर्ने गरी झाविरुद्ध ४१ करोड ६२ लाख १९ हजार ८०१ रुपैयाँ ७५ पैसाको बिगो कायम गरी भ्रष्टाचारको मुद्दा दायर भएको हो ।

कित्ता नम्बर ७६०/१, ७६१, ७६२, ९७३, ७८३, ७८४, ७८६, ७८७ र ७८८ तथा साबिक दमक ६(ग) र दमक ५ (ख) बीचमा रहेको जग्गा हालसाबिक गरेर व्यक्तिका नाममा लैजाने र त्यसपछि चक्लाबन्दी गरी बेचबिखन भएको थियो । जग्गा हिनामिनामा माओवादी नेता पुरी मुख्य योजनाकारका रूपमा संलग्न रहेको अख्तियारले अदालतमा दायर गरेको अभियोगपत्रमा उल्लेख छ । जग्गा हडप्ने योजनाकारका रूपमा किटान गरिएका पुरी यही फागुन ६ मा सम्पत्ति शुद्धीकरण मुद्दामा विशेष अदालतबाट समेत दोषी ठहर भएका छन् । यो मुद्दामा विशेषले पुरीलाई चार करोड तीन लाख ३४ हजार रुपैयाँ जरिवाना गरेको थियो ।

५८ बिघाभन्दा बढी सरकारी जमिनमा भू-माफियाको कब्जा
झापाको बालुवाटार भन्ने स्थानको सरकारी जग्गा व्यक्तिको नाममा दर्ता गराएको कसुरमा अख्तियारले गगन पुरी भन्ने रेवतीराज पुरी तथा उनका परिवारका सदस्यहरू श्रीमती केशावती पुरी, आमा मनमाया पुरी, देवकुमार पुरी, डिल्लीराम पुरी, देवरूपा पुरी, ममता पुरी घिमिरे, माया पुरी पाण्डे, कृष्णकुमार पुरी, प्रेमकुमार पुरी र कुलबहादुर पुरीलाई पनि विपक्षी बनाई विशेष अदालतमा भ्रष्टाचारको मुद्दा दायर गरेको थियो । विशेष अदालतले दुई फरक फरक मुद्दामा मुख्य योजनाकार रहेका पुरीलाई हालसाबिक गर्दा सरकारी जमिन आफ्नो नाममा पारेको कसुरमा ६ करोड, दुई लाख, ७० हजार ४९९ रुपैयाँ र स्ववासी दर्ता गर्दा तीन करोड ३५ लाख ७६ हजार ८८० रुपैयाँ गरी कुल नौ करोड ३८ लाख ४७ हजार ३७९ रुपैयाँ बिगो कायम गरी भ्रष्टाचारको मुद्दा दायर भएको छ ।

त्यसैगरी, गगन पुरीकी श्रीमती केशावती पुरीको नाममा स्ववासी दर्ता गरी हिनामिना गरेको मुद्दामा पाँच करोड ६२ लाख ५० हजार ८४० रुपैयाँ र हालसाबिक दर्ता गर्दा ८४ लाख ८९ हजार १६५ रुपैयाँ बराबरको सरकारी सम्पत्ति आफ्नो बनाइएको भन्दै कुल ६ करोड ४७ लाख ४० हजार पाँच रुपैयाँ बराबरको बिगो कायम गरी भ्रष्टाचारको मुद्दा दायर भएको छ । त्यस्तै, परिवारका अन्य सदस्यहरूविरुद्ध पनि जग्गा जफत र भ्रष्टाचारको कसुरमा मुद्दा दायर भएको छ ।