काठमाडौं । झापाको मेचीनगरस्थित ज्यामिरगढीमा रहेको प्लाई उद्योगले शंकास्पद आगलागीमा १५ करोड रुपैयाँ बराबरको क्षति दाबी गरेको छ । देशकै ठूलो भनेर दाबी गरिने मेचीनगर–१५ ज्यामिरगढीमा रहेको भगवती लेमिनेट्समा गत साता भएको शंकास्पद आगलागीमा उद्योगले १५ करोडको क्षति भएको दाबी गरेको हो ।
आगलागीबाट १५ करोड रुपैयाँको भौतिक सम्पत्ति क्षति भएको विवरण उद्योगले प्रहरीलाई दिएको छ । जिल्ला प्रहरी कार्यालय झापाका अनुसार आगलागीबाट उद्योगमा आगलागीमा १५ करोडको क्षति भएको विवरण जिल्लामा आएको हो । इलाका प्रहरी कार्यालय धुलाबारीमार्फत आएका विवरणमा आगलागीका कारण ठूलो मात्रामा भण्डारण गरिएको काठको गोलिया र तयारी प्लाइउड खरानी भएको उल्लेख छ ।
फागुन २८ गते बिहानै उद्योगमा भयानक आगलागी भएको थियो । घना आवादी भएको गाउँको मध्यभागमा रहेको उद्योगमा भएको आगलागीले सिंगो गाउँ त्रस्त बनेको थियो । बिहान लागेको आगो भोलिपल्ट साँझ मात्रै नियन्त्रणमा आएको थियो ।
उद्योगले विद्युत् सर्ट भएर आगलागी भएको दाबी गरे पनि घटनाक्रम अनुसन्धानका क्रममा धेरै त्रुटि फेला परेको थियो । उद्योगले बिमाको करोडौँ रकम पचाउन र राजस्व विभागको छानविन छल्न उद्योगमा नक्कली आगलागी गराइएको स्रोतको दाबी छ । उद्योग केही महिना अघि मात्रै २५ करोडको राजस्व हिनामिनामा ३२ लाख मात्रै तिरेर छुटेको थियो ।
कम्पनीले ठूलो क्षति भएको बताए पनि आगलागी हुनुअगाडि सम्पूर्ण मूल्यवान् सामानहरू गोदामबाट निकालिएको स्रोत बताउँछ । स्रोतका अनुसार कबाडी सामानहरू मात्र भएको अवस्थामा उद्योगमा आगोलागी भएको थियो । कबाडी सामानमा भएको आगलागीबाट १५ करोड क्षति भएको उद्योगको दाबी छ । उद्योगले कबाडी सामान डढाएरै बिमाबाट करोडौँ बचाउने योजना बनाएको छ ।
स्रोतका अनुसार लेमिनेट्समा हुने गरेको कच्चा र पक्का बिलको कारोबार र राजस्व विभागको छानविनसमेत प्रभावित पार्नेगरी नक्कली आगलागी गराइएको थियो । उद्योगले करोडौँ राजस्व हिनामिनाको थप अनुसन्धान नहोस् भनेर आगलागी गराइएको हुनसक्ने स्रोतको दाबी छ । लेमिनेट्सका मुख्य सञ्चालक रजनीश कर्नानी लगायतको योजनामा नै उद्योगमा आगलागी भएको स्रोतले दाबी गरेको छ । आगलागीको क्षतिबारे स्थानीय सरकार र विज्ञ टोलीबाट अनुसन्धान हुन भने बाँकी नै छ ।
यकिन विवरण लिनै बाँकी छ: वडाध्यक्ष भट्टराई
उद्योगले १५ करोडको क्षति दाबी गरे पनि यकिन विवरण भने लिनै बाँकी छ । स्थानीय सरकार, प्रहरी र विज्ञ टोलीले स्थलगत अनुगमन गरेपछि मात्रै क्षतिको यकिन विवरण आउँछ । उद्योगले क्षतिको विवरण यकिन गरिदिन आग्रह गर्दै सम्बन्धित वडामा निवेदन दिएको छ ।
उद्योगले मेची नगर नगरपालिका वडा नम्बर १५ मा क्षति विवरण यकिनका लागि निवेदन दिएको वडाध्यक्ष गुणराज भट्टराईले बताउनुभयो । आफूहरूले निरीक्षण गरिनसकेकाले क्षतिको यकिन विवरण अहिले नै भन्न नसकिने उहाँले बताउनुभयो ।
आगलागीको कारण पनि विस्तृत अध्ययनपछि मात्रै खुल्ने उहाँले बताउनुभयो । तर, उद्योगले भने बिजुली सर्ट भएर आगलागी भएको दाबी गरेको उहाँको भनाइ छ । ‘क्षतिको यकिन विवरण लिने काम भएको छैन । उहाँहरूले सजर्मिनका लागि निवेदन दिनुभएको छ,’ वडाध्यक्ष भट्टराईले भन्नुभयो, ‘छानविन गर्न अझै बाँकी छ । आज वा भोलि स्थलगत गर्नेबारे निर्णय गर्छौं ।’
विगतदेखिकै गतिविधि शंकास्पद
यसपटकको आगलागी मात्रै होइन उद्योगका गतिविधि विगतदेखि नै शंकास्पद छन् । गतवर्ष मात्र राजस्व हिनामिनामा भगवती लेमिनेट्स उद्योगका तत्कालीन सञ्चालकहरू रजनीश कर्नानी, सन्तोष आचार्य, रतनलाल अग्रवाल, निर्मला कर्नानी, निर्मला सरिया, दिपेन्द्रकुमार अग्रवाल र रतनकुमार अग्रवाल लगायतलाई राजस्व अनुसन्धान विभागले अनुसन्धानसमेत गरेको थियो ।
लामो समयसम्म अनुसन्धान गर्नुपर्ने फाइलहरू रोकिएपछि तत्कालीन समयमा राजस्व अनुसन्धान विभागको नियतमाथि समेत प्रश्न उठेको थियो । राजस्व चुहावट अनुसन्धान तथा नियन्त्रण ऐन २०७६ अनुसार राजस्व चुहावटको कसुर गरेमा त्यस्ता व्यक्ति र कम्पनीलाई बिगोको शतप्रतिशत जरिवाना वा कसुरको मात्रा हेरी पाँच वर्षसम्म कैद सजाय गर्ने व्यवस्था छ ।
ऐनअनुसार एक करोड सम्मको बिगोमा एक महिनादेखि ६ महिनासम्म कैद हुने व्यवस्था छ । यसैगरी, एक करोडदेखि पाँच करोड रुपैयाँसम्मको बिगोमा ६ महिनादेखि एक वर्षसम्म कैद हुने व्यवस्था छ । त्यस्तो व्यक्तिबाट बिगो असुल वा जफत गरिने उल्लेख छ । तर, उद्योगलाई यो सजाय भएन । उद्योग सन् २०१६ मा स्थापना भएको हो । १४ सय मजदुरले काम गर्ने यो उद्योगमा आधा दर्जनभन्दा बढी सञ्चालक छन् । विष्णु मधगोरिया, रजनीश कर्नानी र विकास सिंह भगवती लेमिनेट्सको मुख्य सञ्चालक हुन् ।
पैसाको पावरमा पटक–पटक उन्मुक्ति
भगवती लेमिनेट्स यसका शंकास्पद कारोबारका कारण विगतदेखि नै बदनाम छ । पैसाको पावरले राज्यशक्तिको दुरुपयोग गर्दै उद्योगले पटक–पटक उन्मुक्ति पाउँदै आएको छ । उद्योगले विगतदेखि नै फर्जी कारोबार गर्दै आएको छ । तर, कारबाही भने भएको छैन । वार्षिक एक अर्बभन्दा बढीको कारोबार गर्ने कम्पनीले सरकारी संयन्त्रको आँखा छल्न कच्चा बिल अर्थात् नर्मल बिल र पक्का बिल अर्थात् भ्याट बिल गर्ने कार्यालयसमेत छुट्टाछुट्टै राखी कारोबार गर्दै आएको छ ।
मेचीनगरमा पक्का बिलको कारोबार गरी धुलाबारीमा रहेको अर्को कार्यालयबाट कच्चा बिलबाट कारोबार हुने गरेको स्रोत बताउँछ । राजस्व छलीमा रेकर्ड कायम गर्दै भगवती लेमिनेट्सले नक्कली बिलमार्फत कारोबार गरी राजस्व छल्दै आएको छ । भगवतीले वास्तविक कारोबारका लागि ‘कच्चा बिल’ र भ्याटका लागि ‘पक्का बिल’ प्रयोग गरेर राजस्व छल्दै आएको छ । कम्पनीले मूल्य अभिवृद्धि कर (भ्याट) र आयकरबाट बच्न ‘अण्डर इनभ्वाइस’ मार्फत कारोबार गर्ने गरिएको पाइएको थियो ।
यसअघि राजस्व विभागले लेमिनेट्सलाई कर छली मुद्दामा उन्मुक्ति दिएको थियो । विभागका तत्कालीन महानिर्देशक मदन दाहालले २०७९ साल मंसिर २७ मा भगवती लेमिनेट्सलाई उन्मुक्ति दिनेगरी निर्णय गराउनुभएको थियो । भगवती लेमिनेट्स प्रालिले २५ करोडभन्दा बढी राजस्व छली गरेको प्रकरणमा विस्तृत छानविनमा भइरहेका बेला निचोडमै नपुगी मिलेमतोमा उहाँले उन्मुक्ति दिनुभएको थियो । विभागले लेमिनेट्सका सम्पूर्ण कागजात नियन्त्रणमा लिएर छानविन गरिरहेको थियो । तर, २५ करोडभन्दा बढी राजस्व छली गरेको प्रशस्त आधारहरू हुँदाहुँदै ३२ लाख मात्रै तिराउने निर्णय गराएर तत्कालीन महानिर्देशक दाहालले हतारमा उन्मुक्ति दिएको थियो ।
नेपाली लगानीकर्ताको भनेर उद्योग खोले पनि मूल लगानीकर्ता भने सीमापारिका रहेका छन् । दोहोरो बिलको फण्डा खुल्नासाथ फसाउनकै लागि नेपालीहरूलाई हैसियतबिनाको मालिक बनाएर राखिएको स्रोत बताउँछ । नेप्लाई ब्राण्डलाई आक्रामक विस्तार गरेको लेमिनेट्सले उत्पादन गरेको ए, बी र सी ग्रेडका प्लाइउडमध्ये ए ग्रेडको प्लाइउड बिक्री गर्दासमेत भ्याट छल्नकै लागि सी ग्रेडको बिक्री गरेको भनी बिल जारी गर्ने गरेको पाइएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच