चितवन । उपप्रधानमन्त्री तथा गृहमन्त्री रवि लामिछानेले देशभरी सहकारीमा देखिएको समस्या समाधानका लागि सरकार लागिपरेको बताउनुभएको छ । आइतबार चितवनमा पत्रकारहरूसँग कुराकानी गर्दै उहाँले सहकारी पीडितसँग सरकारले वार्तामार्फत समस्या समाधानको प्रयास गरेको बताउनुभयो । उहाँले भन्नुभयो, ‘सरकारी वार्ता टोली र सहकारी पीडितको वार्तामा सहमति भएको छ, सहमति कार्यान्वयनमा आउँछ ।’ देशभरिका सहकारी पीडितको समस्या समाधान गरिने उहाँको भनाइ थियो । सहकारीको पैसा अपचलन गर्नेहरूको सम्पत्ति खोजेर भए पनि बचत कर्ताको पैसा फिर्ता गर्ने उहाँले बताउनुभयो ।
गृहमन्त्री लामिछानेले बचतकर्ताको रकम फिर्ता गर्नका लागि सम्बन्धित दोषीहरूको सम्पत्ति ल्याएर भए पनि उपलब्ध गराउने बताउनुभयो । सहकारीको पैसा अपचलन गरेर फरार रहेका जिबी राईलाई नियन्त्रणका लागि सरकारले पूरै शक्ति परिचालन गरेको उहाँले बताउनुभयो । सरकारले गरेका अनुसन्धान र अध्ययनका कुरा पहिले नै सार्वजनिक गर्न नहुने भन्दै उहाँले राई छिट्टै पक्राउ पर्ने विश्वास व्यक्त गर्नुभयो ।
सरकारले गरेका कामको नतिजा पूर्णरूपमा आउने उहाँको भनाइ थियो । उहाँले भन्नुभयो, ‘कहीँ कतै कसैलाई कानुनले जे भन्छ त्यही गर्ने हो, निर्दोष नफसोस् दोषी नउम्कियोस् भन्ने प्रधानमन्त्रीको निर्देशन छ, त्यहीअनुसार काम हुन्छ ।’ प्रक्रियामा केही जटिलता भए पनि नतिजा आउने गरी काम गर्ने उहाँले बताउनुभयो । यसअघि शनिबार मात्रै गृहमन्त्री लामिछानेले सहकारी ठगीमा संलग्न रही फरार जिबी राईलाई जहाँ बसेको भए पनि समाएर ल्याउने बताउनुभएको थियो ।
सरकारमा बसेर प्रतिशोध कसैसँग नसाँध्ने पनि उहाँले बताउनुभयो । ‘राज्यमा प्रतिशोध साँध्न गएका होइनौँ । कसैमाथि प्रतिशोध साँध्दैनौँ,’ उहाँले भन्नुभयो, ‘कस–कसले हामीमाथि प्रतिशोध साँधे चिन्छौँ, तर हामी त्यसो गर्दैनौँ । विधि र कानुनले जे भन्छ त्योभन्दा दायाँबायाँ जाँदैनौँ ।’ जोखिम मोलेर रास्वपा सरकारमा गएको गृहमन्त्री लामिछानेको भनाइ थियो ।
‘अब नेता होइन जनता बचाउने हो’
गृहमन्त्री लामिछानेले देशमा सुशासनको नयाँ अभियान सुरु भएको बताउनुभएको छ । चितवनको भरतपुरमा पार्टी नेता कार्यकर्तासँग फागु पूर्णिमाको अवसरमा होली खेल्दै उहाँले नयाँ सरकार निर्माण भएसँगै जनतामा आशा पलाएको बताउनुभयो । उहाँले भन्नुभयो, ‘विभिन्न दलहरूसँग साझेदारी गरेर सत्तामा चार मन्त्रालयको जिम्मेवारी लिएका छौँ । सुशासनका लागि ठूला दलका प्रमुख नेता एक हुनुहुन्छ ।’
उहाँले सरकार सञ्चालन र सुशासन कायम गर्ने विषयमा सबै शीर्ष नेताहरू एक ठाउँमा उभिएको बताउनुभयो । ‘अब मान्छे बचाउने होइन देश बचाउने हो । नेता बचाउने होइन जनता बचाउने हो’, उहाँले भन्नुभयो । गृहमन्त्री लामिछानेले गलत गतिविधि गर्नेहरू कानुनको दायरामा आउने भन्दै सना, ठूला, चिल्ला, खस्रा सबै माछा पक्राउ गर्ने बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच