कांग्रेस केन्द्रीय समिति बैठक आज

काठमाडौं । नेपाली कांग्रेसको केन्द्रीय समितिको बैठक आज (आइतबार) बस्दै छ । केन्द्रीय समिति बैठकमा प्रस्तुत महामन्त्रीद्वय गगनकुमार थापा र विश्वप्रकाश शर्माको प्रतिवेदनमा सहमति जुट्न नसकेपछि भदौ १२ गते बैठक बस्न सकेको थिएन । महामन्त्री थापाले प्रस्तुत गर्नुभएको निर्वाचनपूर्व गठबन्धन, पार्टीको आगामी १५औँ महाधिवेशनको कार्यतालिका र महामन्त्री शर्माले प्रस्तुत गर्नुभएको एक्जिट पोलिसीका विषयमा विवाद भएपछि भदौ १२ गते बैठक स्थगित गरिएको थियो । महामन्त्रीद्वयको प्रस्तावलाई सर्वसम्मत रूपमा केन्द्रीय समिति बैठकबाट पारित गर्न पार्टी सभापति देउवाले शीर्ष नेताहरूसँग पटक-पटक छलफल गरे पनि सहमति जुट्न सकेको छैन । महामन्त्रीद्वयको प्रस्तावप्रति संस्थापक पक्षका नेताहरूले चर्को विरोध गरिरहेका छन् ।

संस्थापक पक्षका नेताहरूले महामन्त्रीद्वयले प्रस्तुत गरेको प्रतिवेदन परिमार्जन गर्न नेतृत्वमाथि तीव्र दबाब सृजना गरेका छन् । महामन्त्रीद्वयको प्रतिवेदनमा सहमति जुटाउन शनिबार बसेको नेपाली कांग्रेसका शीर्ष नेताको बैठक पनि बिना निष्कर्ष टुंगिएको छ । सहमति जुट्न नसकेपछि बैठक आइतबार दिउँसो १ बजे सम्मका लागि सारिएको थियो । शनिबारको बैठक बिना निष्कर्ष टुंगिए पनि महामन्त्रीद्वय थापा र शर्माले पेस गरेको प्रतिवेदन छलफलमा सहमतिनजिक पुगिएको नेताहरूको दाबी छ । आइतबार दिउँसो ३ बजे डाकिएको केन्द्रीय समिति बैठक अगाडि नै बस्ने शीर्ष नेताको बैठकमै विषय टुंगो लगाउने कांग्रेसको तयारी छ ।

महामन्त्रीद्वयको प्रतिवेदनमा चुनावी तालमेल, महाधिवेशन तालिका, एक्जिट पोलिसीलगायत विषय उल्लेख छ । बैठकमा सहभागी नेपाली कांग्रेस संसदीय दलका प्रमुख सचेतक श्याम घिमिरेले भन्नुभयो, ‘आइतबार १ बजे बैठक बसेर टुंग्याउने भन्ने कुरा भयो । विवाद भनेको महाधिवेशन तालिका र गठबन्धनको विषय हो । त्यसमा पनि माओवादीसँगको गठबन्धन टुटिसकेपछि धेरै ठूलो समस्या रहेन ।’ गठबन्धन टुटिसकेकाले अबको चुनावमा एक्लै बहुमत ल्याउने गरी संगठन निर्माण गर्ने विषयमा पनि छलफल भएको घिमिरेले जानकारी दिनुभयो । उहाँको अनुुसार १५औँ महाधिवेशन कार्यतालिका केन्द्रीय समितिको अर्को बैठकले निर्णय गर्ने गरी छलफल भइरहेको छ । तर, उक्त विषयमा पनि सहमति जुट्न सकेको छैन । महाधिवेशन कार्यतालिकाबारे महामन्त्री थापाले प्रस्ताव गर्नुभएको थियो ।

बैठकमा विधानले तोकेको मितिभित्र महाधिवेशन गर्ने कुरामा सहमति जुटेको जानकारी दिँदै पार्टी कार्यालयका मुख्यसचिव कृष्णप्रसाद पौडेलले भन्नुभयो, ‘सबै कुरामा सहमति भयो । विधानले तोकेको मितिभित्र महाधिवेशन गर्ने कुरा भयो । पार्टीका विधानसँग सम्बन्धित जति पनि मुद्दाहरू छन्, ती सबैलाई विधान मस्यौदा समितिमा पठाउने बैठकमा सहमति भयो ।’ महामन्त्री थापाको प्रस्तावमा भने कहीँ कतै पनि गठबन्धनबारे उल्लेख नगरिएको जिकिर गर्दै पौडेलले भन्नुभयो, ‘आगामी निर्वाचनमा गठबन्धन गर्ने/नगर्ने केही कुरा पनि आएको छैन । गठबन्धन गर्ने नगर्ने केही कुरा पनि आएन, नेपाली कांग्रेसले बहुमत ल्याउने गरेर संगठनलाई विस्तार गर्ने सहमति भयो ।’

अर्का महामन्त्री विश्वप्रकाश शर्माको प्रतिवेदनको उल्लेखित ‘एक्जिट पोलिसी’ संविधानसँग पनि जोडिएको विषय भएकाले संविधान संशोधनको बेला यो एजेण्डालाई छलफलमा ल्याउने गरी छलफल भएको नेताहरूको भनाइ छ । शनिबार बसेको पदाधिकारी र पूर्व-पदाधिकारीको बैठकले महामन्त्री थापाको प्रतिवेदन परिमार्जनसहित आइतबार केन्द्रीय समितिमा पेस गर्ने निर्णय भएको जानकारी दिँदै एक पदाधिकारीले भन्नुभयो, ‘गगनको प्रतिवेदनलाई केही परिमार्जनसहित अन्तिम रूप दिएर पेस गर्ने निर्णय भएको छ । अर्का महामन्त्री विश्वप्रकाश शर्माको प्रतिवेदन अहिलेलाई यथावत राखिने भएको छ । किनकि विश्वप्रकाशको प्रतिवेदनमा संविधान संशोधन सम्बन्धित कुरा भएकाले संविधान संशोधनको कुरा उठेको बेला छलफल गरिनेछ । गगनको प्रतिवेदनमा आइतबार १ बजे पदाधिकारीहरूको बैठकले अन्तिम रूप दिनेछ ।’

एकै व्यक्ति दुई पटकभन्दा बढी प्रधानमन्त्री बन्न नपाउने प्रस्ताव पास हुन्छ : महामन्त्री शर्मा
नेपाली कांग्रेसका महामन्त्री विश्वप्रकाश शर्माले दुईपटक मात्रै प्रधानमन्त्री बन्ने प्रस्ताव आइतबार बस्ने केन्द्रीय समितिको बैठकबाट पास हुने दाबी गर्नुभएको छ । शनिबार काठमाडौंमा आयोजित एक कार्यक्रमलाई सम्बोधन गर्ने क्रममा महामन्त्री शर्माले कांग्रेस केन्द्रीय समितिको बैठकमा आफूले एकपटक राष्ट्रपति र दुईपटक मात्रै प्रधानमन्त्री बन्न पाउने नीति प्रस्ताव गरेको उल्लेख गर्दै उक्त प्रस्ताव आइतबारको बैठकबाट पारित हुने दाबी गर्नुभएको हो । शर्माको उक्त प्रस्तावलाई लिएर पार्टीभित्र बहस भइरहेको छ । महामन्त्री शर्माले भने त्यसबारे बैठकले साझा दृष्टिकोण बनाउने र सहमतिबाट पारित गर्ने दाबी गर्नुभएको छ ।

प्रधानमन्त्री जतिसुकै लोकप्रिय बने पनि उसले दुई पटकभन्दा बढी बन्न नपाउने व्यवस्था हुनुपर्ने भन्दै उहाँले अहिले केही समस्या रहेको भए पनि त्यसलाई छलफलबाट सहमतिले पास गरेर जाने जानकारी दिनुभयो, ‘एकपटक राष्ट्रपति बन्न पाउने र दुईपटक मात्रै प्रधानमन्त्री बन्न पाउने दृष्टिकोण बनाएर जानसके भविष्यमा सबै राजनीतिक दलहरूलाई प्रभाव पार्ने जिकिर गर्दै महामन्त्री शर्माले भन्नुभयो, ‘कांग्रेसमा अहिले १, २, ३, ४ भन्ने सुन्नुभएको होला । यो देशमा खाली प्रधानमन्त्री एकै अनुहारहरू पटक-पटक हुने अवस्था छ ।

नागरिकलाई ताजा नेतृत्व कहिले आउँछ ? भन्ने चासो छ । त्यसैले मैले एउटा पोलिसी प्रस्ताव गरेको छु । कुनै पनि राजनीतिक दलले कसैलाई पनि दुईपटक राष्ट्रपति बनाउन पाउँदैन, यो देशको राष्ट्रपति एक व्यक्ति एकपटक मात्रै राष्ट्रपति बनेर शीतलनिवासबाट बिदा भएर जानुपर्छ । अनि प्रधानमन्त्री बन्दै गर्दा चारपटक, छ पटकसम्म प्रधानमन्त्री हुनुभयो रे भन्ने सुनिरहन अबको युवा पुस्ता तयार छैन । त्यसकारण अब प्रधानमन्त्री जतिसुकै लोकप्रिय भए पनि, जनताको जतिसुकै रुवावासी चलोस्, तर दुईपटक प्रधानमन्त्री भएपछि तीनपटक प्रधानमन्त्री बन्न कसैले पनि पाउनुहुँदैन ।’