सुदूरपश्चिमबाट स्कुल टु ओलम्पिक कार्यक्रम सुरु

कैलाली । विद्यार्थीहरुलाई खेल क्षेत्रमा आबद्ध हुन प्रोत्साहित गर्ने उद्देश्यका साथ स्कुल टु ओलम्पिक कार्यक्रम सुदूरपश्चिम प्रदेशबाट सुरु भएको छ ।

सात वटै प्रदेशमा आयोजना गर्ने लक्ष्य रहेको कार्यक्रम सुदूरपश्चिम प्रदेशबाट सुरु भएको बताइएको छ । सुदूरपश्चिम प्रदेश खेलकुद परिषदको आयोजना तथा नेपाल ओलम्पियन्स संघको संयोजनमा सोमबार धनगढीमा भएको कार्यक्रममा स्थानिय धनगढीका सामुदायिक र निजी विधालयका विधार्थीहरुसँग ओलम्पियनहरुको अन्तरक्रिया भएको थियो ।

कार्यक्रमको उद्घाटन गर्दै सुदूरपश्चिम प्रदेश सरकारका सामाजिक विकास मन्त्री गोविन्दराज बोहोराले खेलकुद क्षेत्रको विकास गर्नका लागि प्रदेश सरकारले काम गरिरहेको बताउनु भयो । उहाँले स्कुल टु ओलम्पीक कार्यक्रमले खेलाडी उत्पादनमा टेवा पुग्ने बताउनु भयो ।

स्कुल टु ओलम्पिक कार्यक्रममा ओलम्पीयनहरु बैकुण्ठ मानन्धर, दिपक विष्ट, डम्मर दत्त भट्ट, विष्णुवहादुर सिंह, देवु थापा, प्रमिला रिजालका साथै नेपाल राष्ट्रिय तथा अन्तराष्ट्रिय खेलाडी संघका अध्यक्ष दिपक श्रेष्ठले विभिन्न विद्यालयका विद्यार्थी र खेलाडीहरुसँग एकै मञ्चमा बसेर आफ्ना अनुभव साट्नुभएको थियो ।

उहाँहरुले आफ्नो खेलकुदको सुरुवातदेखि सफलतासम्मका संघर्ष, खेलकुद क्षेत्रले आफ्नो जीवनमा परेको प्रभावका बारेमा चर्चा गर्नुभएको थियो । अधिकांशले सफलताका लागि इच्छा शक्ति, लगनशिलता र इमान्दारिता आवश्यक रहहेको औँल्याउनु भयो । उहाँहरुले जुन सुकै क्षेत्रमा प्रवेश गर्नका लागि पनि तीन चिज आवश्यक रहने उल्लेख गर्दै शिक्षा भने अनिवार्य रहेको सुनाउनु भयाे।

खेलकुद क्षेत्रमा लाग्नका लागि नाम सुनेका र उनीहरुको बारेमा जानेका विद्यार्थीहरुले उनीहरुसँग कुराकानी गर्दै प्रश्नोत्तर समेत गरेका छन् । विद्यार्थीहरुले खेल क्षेत्रको अवस्था, विगत वर्तमान र भविष्यका साथै पारिवारिक बातारण, आर्थिक पाटो लगायत विभिन्न विषयमा प्रश्नहरु सोधे । उनीहरुका प्रश्नलाई ओलम्पियनहरुले क्रमशः जवाफ फाउने क्रममा खेलकुदमा आर्थिक दृष्टिकोषणले विगतमा भन्दा सहज भएको बताए । कार्यक्रमको सहजिकरण हाम्रो खेलकुद डटकमका सम्पादक प्रकाश तिमिल्सेनाले गर्नुभएको थियो ।

कीर्तिमानी खेलाडीहरुसँग साक्षात्कार र भलाकुसारी गर्न पाउँदा विद्यार्थीहरु हर्षितसाथै उत्साहित देखिन्थे । कार्यक्रम प्रभावकारी भएकोर आगामी दिनमा यसले नतिजा ल्याउने प्याब्सन कैलालीका अध्यक्ष टोपेन्द्र शाहले बताउनु भयो ।

धनगढी विद्यार्थीहरुमाँझ गरिएको कार्यक्रमलाई प्रदेशका अन्य जिल्लाहरुमा पनि पुराईने लक्ष्य राखिएको छ । यसपाली कैलालीका विद्यार्थीहरुसँग ओलम्पियनको छलफल गराउँदा यसले खेलकुद क्षेत्रको अवस्था बारेमा अवगत गराउन मद्दत मिलेको सुदूरपश्चिम प्रदेश खेलकुद परिषदका सदस्य सचिव दीपकबहादुर सिंहले बताउनु भयो । उहाँले आगाामी दिनहरुमा पनि यस्ता कार्यक्रमहरुलाई निरन्तता दिने जानकारी दिनुभयो ।

सुदूरपश्चिमबाट सुरुवात भएको कार्यक्रम सात वटै प्रदेशहरुमा खेलकुद परिषद्सँग समन्वय गरेर आयोजना गरिने नेपाल ओलम्पियन्स संघका अध्यक्ष दीपक विष्टले जानकारी दिनुभयो । धनगढीमा भएको कार्यक्रममा विभिन्न विद्यालयका झण्डै चार सय बढी विद्यार्थीको सहभागिता थियो ।
कार्यक्रमको अन्त्यमा प्याब्सन प्रदेश, कैलाली र धनगढी नगर समितिले ओलम्पियनहरुलाई सम्मान गरेका थिए । उद्योग वाणिज्य संघ कैलालीले पनि ओलम्पियनहरुको स्वागतमा अलग्गै कार्यक्रम आयोजना गरेको थियो ।