इटहरी । इटहरीमा जारी प्रधानमन्त्री कप महिला राष्ट्रिय टी-२० क्रिकेट प्रतियोगितामा प्रदेश नम्बर १ ले लगातार दोस्रो जित निकालेको छ । स्थानीय जनता क्रिकेट पार्क क्रिकेट मैदानमा सोमबार भएको खेलमा लुम्बिनी प्रदेशलाई नौ रनले हराउँदै प्रदेश-१ ले लगातार दोस्रो जित हात पारेको हो ।
मैदान ओसिलो भएका कारण खेल निर्धारित समयमा सुरु हुन नसकेपछि नौ ओभरमा छोट्याइएको थियो । ६० रनको लक्ष्य पछ्याएको लुम्बिनीले पूरै नौ ओभर खेल्दै सात विकेट गुमाएर ५० रनमात्र बनाउन सक्यो । लुम्बिनीका लागि लक्ष्मी चौधरीले ३१ बाहेक अन्य ब्याटरले दोहोरो अंकको रन जोड्न सक्नुभएन ।
प्रदेश-१ का लागि संगीता राईले तीन तथा सबनम राई, ज्योति दनुवार र रुबिना क्षेत्रीले एक-एक विकेट लिनुभयो । त्यसअघि पहिले ब्याटिङ गरेको प्रदेश-१ ले नौ ओभरमा चार विकेट गुमाएर ५९ रन बनाएको थियो ।
प्रदेश-१ का लागि काजल श्रेष्ठले २१, कप्तान रुबिना क्षेत्रीले १७ र अप्सरी बेगमले १२ रन जोड्नुभयो । लुम्बिनीका कृतिका मरासिनी, सरस्वती पुन र विभष्णा बिसीले एक-एक विकेट लिनुभयो । यस जितसँगै प्रदेश-१ ले दुई खेलमा चार अंक जोडेको छ । प्रदेश-१ समूह ‘बी’को शीर्षस्थानमा छ ।
लुम्बिनीको यो पहिलो हार हो । लुम्बिनीले दुई खेलमा दुई अंक जोडेको छ । प्रतियोगितामा आठ टोलीको सहभागिता छ । नेपाल क्रिकेट संघको आयोजनामा जारी प्रतियोगिताको विजेताले पाँच लाख र उपविजेता टोलीले तीन लाख रुपैयाँ प्राप्त गर्नेछन् । प्रतियोगिताको सर्वाेत्कृष्ट खेलाडीले ३० हजार तथा उत्कृष्ट ब्याटर र बलरले समान २०-२० हजार पाउनेछन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच