काठमाडौं । पञ्जाब किंग्सले टी–२० क्रिकेटको इतिहासमा सबैभन्दा ठुलो लक्ष्य सफलतापूर्वक पछ्याएको छ । शुक्रबार राति भएको इन्डियन प्रिमियर लिग (आईपीएल)मा पञ्जाबले कोलकाता नाइट राइडर्सले प्रस्तुत गरेको २ सय ६२ रनको विशाल लक्ष्य हासिल गरेको हो ।
२६२ रनको लक्ष्य पछ्याएको पञ्जाबले आठ बल बाँकी हुँदा कलकाताविरुद्ध दुई विकेट मात्र गुमाएर आठ विकेटको ऐतिहासिक जित निकालेको हो।
इडन गार्डेनमा टस हारेर पहिला ब्याटिङ थालेको कोलकाताले निर्धारित २० ओभरमा ६ विकेट गुमाउँदै २६१ रन बनाएको थियो। जवाफी ब्याटिङमा उत्रिएको पञ्जाबले १८ दशमलव चार बलमा मात्र दुई विकेटको क्षतिमा २६२ रन बनाउँदै लक्ष्य भेट्टाएको हो।
पञ्जाबको जितका लागि जोनी बेयरस्टोले नटआउट १०८ रन बनाए। मात्र ४८ बल खेलेका उनले ८ चौका र ९ छक्का प्रहार गरे। शशांक सिंहले नटआउट अर्धशतक पूरा गरे। २८ बल खेलेका उनले आठ छक्का र दुई चौकाको मद्दतमा ६८ रन बनाएका हुन्।
उसका लागि अर्का ओपनर प्रभसिमरन सिंहलेसमेत अर्धशतक प्रहार गरे। २० बल खेलेका उनले चार चौका र ५ छक्का प्रहार गर्दै ५४ रन बनाएका हुन्। उनलाई कलकाताका सुनिल नारायणले रन आउट गरेका थिए। पञ्जाबका लागि १६ बल खेलेका रिली रोसोउले भने २६ रन बनाए। पञ्जाबविरुद्ध बलर नचलेको कलकाताका लागि मात्र एक विकेट सुनिल नारायणले लिए।
सुरुमा ब्याटिङ गरेको कलकाताका लागि फिल साल्ट र सुनिल नारायणले शानदार अधर्शतक बनाएका थिए। ३७ बल खेलेका साल्टले ६ चौका र ६ छक्का प्रहार गर्दै सर्वाधिक ७५ रन बनाएका थिए। नारायणले ३२ बलमा ९ चौका र ४ छक्कासहित ७१ रन जोडेका थिए।
पहिलो विकेटका लागि उनीहरूले १३८ रनको साझेदारी गरेका थिए। वेंकटेश अय्यर ३९, कप्तान श्रेयस अय्यर २८ र आन्द्रे रसेल २४ रनमा आउट हुँदा रमनदीप सिंह ६ रनमा नटआउट रहे।
पञ्जाबका अर्शदीप सिंहले सर्वाधिक दुई विकेट लिए। श्याम करन, हर्ष पटेल र राहुल चाहरले एकएक विकेट हात पारेका थिए।
यो जितमा पञ्जाबले आईपिएलमै केही ऐतिहासिक रेकर्ड बनाएको छ । यो खेलमा ठूलो रनको चुनौती आठ बल खेल्न बाँकी हुँदै पूरा गरेर रेकर्ड बनाएको छ । टि–२० को खेलमा ५२३ रन बनेको छ । जोनी बेयरस्टोले नटआउट ४८ बलमा १०८ रन बनाएर ऐतिहासिक जितको रेकर्डसमेत बनाएका छन् ।
यो हारसँगै कलकाता १० अंकसहित दोस्रो स्थानमा यथावत छ। पञ्जाब भने ६ अंकसहित आठौं स्थानमा छ।
यो पनि पढ्नुहोस्
कहिले सकिन्छ नारायणगढ-बुटवल सडक स्तरोन्नतिको काम ? (तस्बिरहरु)
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच