सर्लाही । सानो हेलचेक्य्राइँले ठूलो क्षति हुन्छ तर आमजनमानसमा चेतनाको अभाव र वनका कर्मचारीको लापरबाहीका कारण वनमा दिनहुँजस्तो डढेलो लागिरहेको छ । जंगलको आगलागीबाट छेउका बस्तीमा समेत क्षति पुगिरहेको देखिन्छ । साँझपख दिनहुँजस्तो वनमा आगो लागे पनि जिम्मेवार निकाय भने मूकदर्शक देखिन्छन् । जसले गर्दा जंगल विनाश हुनुका साथै वनमा आश्रित वन्यजन्तुको जीवनसमेत संकटमा पर्न थालेको छ ।
एकातिर वन्यजन्तुको जीवन संकटमा छ भने अर्कातिर साना बिरुवाहरू मर्दा जंगल उजाड बन्दै जान थालेको छ । पर्यावरणमा समेत गम्भीर असर परिरहेको छ । वस्तु चराउन जाने गोठालाले घाँस पलाउने आशमा वनजंगलमा आगो लगाउँछन् भने भूमाफिया जग्गा अतिक्रमण गर्न र शिकारीले शिकार गर्नका लागिसमेत जंगलमा आगो लगाउने गरेका छन् ।
आगलागी मुख्य गरी पूर्व-पश्चिम राजमार्ग आसपासमा भइरहेको छ । लालबन्दीभन्दा पूर्व र रानीगञ्जभन्दा पश्चिमका राजमार्गछेउमा अहिले दिनहुँजस्तो जंगलमा आगो लाग्ने गरेको छ । तर, सम्बन्धित निकायबाट भने अनुगमन भएको छैन । जसले गर्दा आगलागी गराउनेहरूको मनोबल झनै बढेको छ ।
यता, जिम्मेवार निकाय डिभिजन वन कार्यालय भने आफूहरूलाई अहिले लागेको डढेलोका बारेमा कुनै जानकारी नरहेको बताउँछ । यदि यस्तो भएको पाइए कानुन बमोजिम कारबाही गरिनेसमेत कार्यालयले जनाएको छ । स्थानीय प्रदेश हुँदै संघीय सरकारले समेत यसतर्फ ध्यान दिन आवश्यक छ । नत्र हरियो वन नेपालको धन उखानमा मात्र सीमित हुने देखिन्छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच