खिलाप मेरा सब टार्न सक्ने
विलाप दुर्भाव सपार्न सक्ने ।
द्रष्टा उनै दीक्षक हुन् पिताजी
सन्तानका आँसु निखार्न सक्ने ।।
१
मिलाप बुन्ने घरबारभित्र
रानो मुली रक्षक घारभित्र ।
खाताखजाञ्ची सुचरित्रदाता
पिता ! दया सागर जन्मदाता ।।
२
खेतीकिसानी समुदाय न्यानो
घरायसी अड्चन आड छानो ।
खुसी फुटाएर जुटाउने को ?
प्रसन्न पार्ने फल–बोट को त्यो ? ।।
३
पगाल रे ईश्वर भावमा छ
नपाल रे दुष्ट सभा समाज !
सुमार्ग देखाउन च्याप्प च्यापी
हिँडाउने तागत हौ पिताजी ।।
४
आमा र बा पालक प्रेमधारा
उन्मुक्तिका संकटका सहारा
दयार्द्र दानी करुणा निधान
कल्याणका बीजन रामवाण ।।
५
बाबाविनाको धरती अँधेरो
बा ! हौ तिमी आयुदआयु मेरो ।
आशीष ली ढाकर ढोग्न पाऊँ
गुरुत्व हौ जाँगर जोड्न पाऊँ ।।
६
पिता महामान्य गरौं पुकार
सौभाग्य वर्षा गर बारबार !
सन्तान हो ! पार पिता प्रसन्न
मिष्टान्न सेवा थप टन्न टन्न ।।
७
रुँदा बुबा सन्तति दुख्छ भोलि
आमा दुखे क्रन्दन फुट्छ बोली
आमा बुबा प्राण दिने दुखेमा
सन्तान को हाँस्छ वसुन्धरामा ? ।।
८
-पदम दाहाल
मादी, संखुवासभा
हाल : लोकन्थली, भक्तपुर ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच