धनगढी । कैलालीको धनगढीमा जारी लिटल फ्लावर प्रिमियर लिग (एलपिएल) को आठौँ संस्करणअन्तर्गत पाँचौँ दिन बिहीबार सम्पन्न दुई खेलमा युथ अफ टिकापुर र सत्यवती एकेडेमी विजयी भएका छन् । युथ अफ टिकापुरले शारदा सेकेण्डरी स्कुललाई तथा सत्यवती एकेडेमीले जेएस स्पोर्ट्स-११ सुपर स्टार्सलाई पराजित गर्यो । पहिलो खेलमा युथ अफ टिकापुरले विजयी सुरुवात गर्ने क्रममा शारदा सेकेण्डरी स्कुललाई ९४ रनले पराजित गर्यो । युथ अफ टिकापुरले दिएको १९० रनको लक्ष्य पछ्याएको शारदाले २० ओभर ब्याटिङ गर्दै ६ विकेट गुमाएर ९५ रनमात्र बनायो ।
शारदाको ब्याटिङमा सुशान्त खत्रीले सर्वाधिक ३७ तथा सुवास सिंहले १६ रन योगदान दिनुभयो । युथ अफ टिकापुरका प्रकाश जैसीले तीन विकेट लिनुभयो भने मोहम्मद हुसेन, प्रेम शाह र सुमित महर्जनले एक-एक विकेट लिनुभयो ।
यसअघि टस जितेर ब्याटिङ गरेको युथ अफ टिकापुरले १७.५ ओभरमा सबै विकेट गुमाएर १८९ रन बनाएको थियो । युथ अफ टिकापुरका कप्तान प्रेम शाहले सर्वाधिक ४८ रन बनाउनुभयो । प्लेयर अफ द म्याच घोषित शाहले ३७ बलमा सात चौका प्रहार गर्नुभयो । यस्तै, सुमित महर्जनले ३४, हरि चौहानले २५, प्रदिप ऐरीले २४ तथा मोहम्मद हुसेनले २३ रन बनाउनुभयो ।
शारदाको बलिङमा विश्वास पन्त एक्लैले ६ विकेट लिनुभयो । जुन क्रममा उहाँले ३.५ ओभरमा ३१ रन खर्चिनुभयो । अभिषेक मल्लले दुई तथा सुशान्त कार्कीले एक विकेट लिनुभयो ।
दोस्र्रो खेलमा सत्यवती एकेडेमीले विजयी सुरुवात गर्ने क्रममा जेएस स्पोर्ट्स-११ लाई तीन विकेटले पराजित गर्यो । जेएस स्पोर्ट्स–११ ले दिएको ९९ रनको लक्ष्य सत्यवतीले १२.५ ओभरमा सात विकेट गुमाएर पूरा गर्यो । सत्यवतीका लागि ओपनर इमरान शेखले सर्वाधिक ३४ रन योगदान दिनुभयो । जुन क्रममा उहाँले २४ बलमा पाँच चौका र एक छक्का प्रहार गर्नुभयो । समिर कार्कीले १३ तथा खगेन्द्र जोशीले ११ रन बनाउनुभयो ।
जेएस स्पोर्ट्स-११ का बलर राज बमले तीन विकेट, नितिश न्यौपानेले दुई तथा साजन बिटालुले एक विकेट लिनुभयो । यसअघि टस जितेर ब्याटिङ गरेको जेएस स्पोर्ट्स-११ सुपर स्टार्सले २० ओभरमा नौ विकेट गुमाएर ९८ रन बनायो ।
जेएस स्पोर्ट्स-११ का लागि राजेश साउदले सर्वाधिक १९ तथा सुनिल चन्दले १७, रोयल बमले ११ तथा साजन बिटालुले ११ रन बनाउनुभयो ।
सत्यवती एकेडेमीको बलिङमा अभिषेक कोइरालाले तीन विकेट लिनुभयो भने फिर्दोश अन्सारी, रञ्जित कुमार र सन्तोष कार्कीले समान दुई-दुई विकेट लिनुभयो । प्लेयर अफ द म्याच घोषित हुनुभएका अभिषेकले चार ओभरमा १५ रन खर्चिनुभयो ।
प्रतियोगिताअन्तर्गत छैटौँ दिन शुक्रबार दुई खेल हुनेछन् । पहिलो खेल बिहान ९ बजे युथ अफ टिकापुर र धनगढी क्रिकेट एकेडेमीबीच तथा दोस्रो खेल दिउँसो १ बजे धनगढी स्पोर्ट्स क्लब र शुक्लाफाँटा ब्ल्याकबक्सबीच हुनेछ ।
लिटल फ्लावर स्पोर्ट्स क्लबको आयोजनामा सुरु भएको प्रतियोगिताको यो आठौँ संस्करण हो । प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउनेछन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच