पाल्पा । नेपाल भाषा साहित्यको विकास र नेवारी संस्कृति बारेमा पाल्पामा बहस सुरु भएको छ । जिल्लाको साहित्यिक क्षेत्रमा क्रियाशिल पाल्पा साहित्य समाजले नेपाल भाषा साहित्यको विकास तथा नेवारी संस्कृतिको संरक्षण गर्ने उद्देश्यले बहसको थालनी गरेको हो ।
पछिल्लो समय नेपाल भाषा साहित्य र स्थानीय भाषा लोप हुने अवस्थामा पुगेकाले समाजले त्यसको संरक्षण, प्रवर्द्धन गर्न तानसेनमा बहसको सुरुवात गरेको हो । समाजका संरक्षक राजेन्द्र गोपाल सिंह र अध्यक्ष पुष्करराज रेग्मीले लामो समयको खोज र अनुसन्धान गरी नेपाल भाषा साहित्यको विकास अवधारणा पत्र समेत तयार पारेका छन् । उक्त अवधारण पत्र तानसेनका नगर सरकार प्रमुख सन्तोषलाल श्रेष्ठसहित जिल्लाका सरोकारवाला निकाय, बुद्धिजिवीहरुमाझ छलफल र बहसमा ल्याइएको छ ।
अवधारणा पत्रमा समाजका अध्यक्ष रेग्मीले नेपाल भाषा साहित्यको शुरुवात, पाल्पामा नेवारहरुको आगमन, तानसेनमा नेवारहरुको भाषा, संस्कृति र साहित्यको विकास, पाल्पामा नेपाल भाषा साहित्यको बारेमा योगदान गर्ने व्यक्तिहरुको बारेमा उल्लेख गरिएको बताउनुभएको छ ।
कार्यक्रममा तानसेन नगरपालिकाका नगरप्रमुख सन्तोषलाल श्रेष्ठले समाजले नेपाल भाषा साहित्य र स्थानीय भाषाको संरक्षण र प्रवर्द्धनमा देखाएको चासो प्रशंसनिय रहेको बताउनुभयो । उहाँले तानसेन नेवारी कलासंस्कृति भेषभुषा, भाषाको धनी भएकाले नेपाल भाषालाई माथि उठाउन सबैको सहयोग आवश्यक रहेको उल्लेख गर्नुभयो । तानसेन नगरपालिकाको कार्यालयमा आगामी दिनमा सरकारी कामकाजीको रुपमा नेपालीसंगै, नेवारी र मगरी भाषालाई पनि मान्यता दिने गरी तयारीमा जुटेको नगर प्रमुख श्रेष्ठको भनाई छ । तानसेन र पाल्पाका आदिवासी को-को हुन् भनेर पहिचान गर्न पनि नगरपालिका लागेको पनि उहाँले बताउनुभयो ।
कार्यक्रममा तानसेन नगरपालिकाकी उपप्रमुख प्रतिक्षा गाहा सिंजालीले मानिसको मुख्य पहिचान भनेकै आफ्नो भाषा, कला संस्कृति भएकाले ठाउँ अनुसारका भाषाहरुलाई जोगाउन सबैपक्ष सक्रिय हुनुपर्नेमा जोड दिनुभयो । बौद्ध विद्वान छत्रराज शाक्यले नेपालको पहिचान भनेकै नेपाल भाषा भएकाले नेपालीसंगै नेपाल भाषालाई समानान्तर रुपमा लैजानुपर्नेमा जोड दिनुभयो । बरिष्ठ पत्रकार मेघराज शर्माले नेपाल भाषा लिपिवद्ध गर्नुपर्ने बताउनुभयो । कार्यक्रममा पासा खल पाल्पाका अध्यक्ष देवेन्द्रराज शाक्यले नेपाल भाषासंगै नेपाल संम्वतलाई राज्य तहबाट कार्यान्वयन हुनुपर्नेमा जोड दिनुभयो । विक्रम संवत भारतीय संम्वत भएकाले नेपाल संम्वतलाई प्रयोगमा ल्याउनुपर्ने उहाँले बताउनुभयो । पत्रकार माधव अर्यालले नेपाल भाषाको बारेमा पत्रकारहरुलाई प्रशिक्षण गरी आमजनमासमा लैजानुपर्ने धारणा व्यक्त गर्नुभयो । तानसेन नगरपालिका-६ का वडा अध्यक्ष सागरमान महर्जन, तानसेन भजन संरक्षण समितिका अध्यक्ष मंगलप्रसाद बज्राचार्य, साहित्यकार रोहित शर्मालगायतले तानसेनमा नेवारी कला संस्कृति, भेषभुषा र भाषाको अवस्था कमजोर हुँदै गएकाले स्थानीय सरकारसंगै अगुवाहरु क्रियाशिल भई जर्गेना गर्नुपर्नेमा जोड दिनुभयो ।
नेपाल भाषा साहित्य कला संस्कृतिमा काठमाडौं पछि दोस्रो मानिएको तानसेनमा नेवारी भाषा कला संस्कृति नै लोप हुने अवस्थामा पुगेपछि पाल्पा साहित्य समाजले अवधारणा पत्र प्रस्तुत गरेर सामाजिक अगुवा, स्थानीय सरकार, नेवारी अगुवाहरुलाई ब्युझाएको हो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच