काठमाडौं । गैरआवासीय नेपाली संघ(एनआरएनए)को तेस्रो अन्तर्राष्ट्रिय कार्यकारी सचिवालयको बैठक संघका अध्यक्ष डा. बद्री केसीको अध्यक्षतामा शनिबार भर्चुल माध्यमबाट सम्पन्न भएको छ । बैठकमा संघको केन्द्रीय सचिवालयमा कार्यरत सहायक निर्देशक बन्दना शर्माले संघका प्रमुख कार्यकारी अधिकृतलाई सम्बोधन गरी पठाउनुभएको इमेलमार्फत् संस्थागत तथा व्यक्तिगत लाञ्छना लगाउने गरी विभिन्न सञ्चारमाध्यम र सामाजिक सञ्जालमा सार्वजनिक भएका विषयमा गम्भीररूपमा छलफल भएको एनआरएनएले जनाएको छ ।
शर्माले वर्तमान संस्थागत तरलताको फाइदा उठाउने मनसायले सचिवालयको इमेल प्रयोग गरी पदीय जिम्मेवारी र मर्यादा बाहिर गई संस्थाको गोपनीयतासमेत ख्याल नगरेको बैठकले ठहर गरेको छ । साथै शर्माले सार्वजनिक गर्नुभएका विषय संस्थाको मर्यादाविपरीत सुनियोजित र कपोलकल्पित भएको पनि एनआरएनएको जिकिर छ । केन्द्रीय सचिवालयका प्रशासनिक कर्मचारीले सोही मुताबिक अन्तर्राष्ट्रिय कार्यकारी सचिवालयबाट निर्देशित काम गर्नुपर्ने भएकाले प्रमुख कार्यकारी अधिकृतलाई सहायक निर्देशकले लगाएको नीतिगत सैद्धान्तिक मतभेदको आरोप पनि असान्दर्भिक रहेको र बैठकले एनआरएनएको केन्द्रीय कार्यालयमा कार्यरत अन्य कर्मचारीलाई उच्च मनोबलसहित कर्मचारी नियमावली, आर्थिक नियमावली र प्रचलित कानुनको अधिनमा रही कार्यसम्पादन गर्नसमेत निर्देशन दिएको छ ।
विश्वभर हुने विभिन्न सानाठूला राष्ट्रिय तथा अन्तर्राष्ट्रिय सम्मेलनमा ककटेल डिनर आयोजना गर्ने प्रचलनअनुरूप एनआरएनएले समेत स्थापनाकालदेखि विश्व सम्मेलनमा डिनर आयोजना गर्दै आएको भन्दै डिनरमा संस्थाको पैसा खर्च नगरी कार्यक्रम प्रायोजकको खर्चमा आयोजना गरिने गरिएको एनआरएनएको दाबी छ । त्यसैले शर्माले इमेलमार्फत् लगाउनुभएको आरोपमा सत्यता नरहेको पनि उसको भनाइ छ । शर्माले इमेलमार्फत् भूकम्पपीडितका लागि राहत वितरण गर्न जाजरकोट र रुकुम पश्चिम जाँदा संस्थाको रकम खर्च भएको भन्ने भ्रामक सन्देश दिएर संस्थाको साख गिराउने काम गरेको पनि एनआरएनएद्वारा जारी प्रेस विज्ञप्तिमा उल्लेख छ ।
एनआरएनएको गत अक्टोबरमा सम्पन्न ११औँ महाधिवेशन तथा विश्व सम्मेलनमा एनआरएनएले पाँच करोड २९ लाख २१ हजार तीन सय ७७ रुपैयाँ ५६ पैसा उम्मेद्वार दर्ता शुल्क, सहभागी दर्ता शुल्क, स्पोन्सरको सहयोगमा सम्पूर्ण खर्च कटाएर दुई करोड ६६ लाख २४ हजार छ सय ८३ रुपैयाँ ९० पैसा आम्दानी गरेको जनाएको छ । एनआरएनएकोे जनवरी २१-२२ मा काठमाडौंको चन्द्रागिरिमा सम्पन्न बैठकलाई मितव्ययी बनाउन पदाधिकारीले आफंै दर्ता शुल्क तिर्नुभएको र अपुग रकम व्यक्तिगत तथा संस्थागत प्रयोजनमार्फत् भुक्तानी गरिएको पनि एनआरएनएका प्रवक्ता फणिन्द्र पन्तद्वारा जारी प्रेस विज्ञप्तिमा उल्लेख छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच