काठमाडौं । त्रिभुवन विश्वविद्यालय (टियु) ले प्रथम विश्वविद्यालय खेलकुद प्रतियोगिताको एथलेटिक्समा पाँच स्वर्ण जितेको छ । पहिलो दिन ६ स्वर्णका लागि प्रतिस्पर्धा भएकोमा बाँकी एक स्वर्ण सुदूरपश्चिम विश्वविद्यालयले हात पार्यो ।
राष्ट्रिय खेलकुद परिषद् (राखेप) द्वारा आयोजित प्रतियोगिताको पुरुष एक हजार पाँच सय मिटर दौडमा टियुका शेरबहादुर अधिकारी पहिलो हुनुभयो । उहाँले निर्धारित दूरी ४ मिनेट ३०.१ सेकेण्डमा पूरा गर्नुभयो । टियुकै विकेश घिमिरे दोस्रो तथा सुदूरपश्चिमका खेमराज जोशी तेस्रो हुनुभयो । सोही स्पर्धाको महिलामा टियुकी राज्यलक्ष्मी रावलले निर्धारित दूरी ५ मिनेट २५.५ सेकेण्डमा तय गर्दै पहिलो हुनुभयो । काठमाडौं विश्वविद्यालयका आल्शा रेग्मी दोस्रो तथा लुनिया त्वायना तेस्रो बन्नुभयो ।
त्रिपुरेश्वरस्थित दशरथ रंगशालामा भएको पुरुष चार सय मिटर दौडमा सुदूरपश्चिमका मुकेश विष्ट पहिलो हुनुभयो । उहाँले निर्धारित दूरी तय गर्न ५६.३५ सेकेण्ड समय खर्चनुभयो । टियुका दिवस रेग्मीले रजत तथा गण्डकी विश्वविद्यालयका सुजल केसीले कांस्य जित्नुभयो । उक्त स्पर्धाको महिलामा टियुकी अनामिका देवकोटा १ मिनेट १५.३५ सेकेण्ड समय निकाल्दै शीर्ष स्थानमा रहनुभयो । सुदूरपश्चिमकी भावना पाण्डे दोस्रो तथा गण्डकीकी कृति गिरी तेस्रो स्थानमा रहनुभयो ।
पुरुष लङजम्पमा टियुका दिवस रेग्मी पहिलो हुनुभयो । उहाँले ६.२७ मिटर जम्प गर्नुभयो । सुदूरपश्चिमाञ्चलका मुकेश विष्ट दोस्रो तथा लुम्बिनी विश्वविद्यालयका अभिषेक गुप्ता तेस्रो हुनुभयो । त्यसै स्पर्धाको महिलामा टियुकी सञ्चिता घिमिरेले स्वर्ण चुम्नुभयो । सञ्चिताले ४.२४ मिटर जम्प गर्नुभयो । लुम्बिनीकी रमिता रावत दोस्रो तथा सुदूरपश्चिमकी भावना पाण्डे तेस्रो हुनुभयो ।
टेबलटेनिसको पुरुष डबल्समा टियुका रजोजमान ढकु र आदित्य धौनियाको जोडीले पुरुष डबल्समा स्वर्ण जित्नुभयो । उक्त जोडीले फाइनलमा नेपाल संस्कृत विश्वविद्यालयका गनञ्जय दाहाल र विदुर खनालको जोडीलाई ३-० को सोझो सेटमा पराजित गर्नुभयो । पोखराका विवेक ढकाल र देवबहादुर भुजेल तथा गण्डकीका अनुष कुँवर र दिपेश रानाभाटको जोडी संयुक्तरूपमा तेस्रो हुनुभयो ।
पुरुष सिंगल्समा नेपाल संस्कृत विश्वविद्यालयका गनञ्जय दाहालले टियुका आदित्य धौनियालाई ३-० तथा टियुका रजोजमान ढकुले काठमाडौंका प्राञ्जयप्रकरण श्रेष्ठलाई ३-० ले पाखा लगाउँदै फाइनलमा स्थान सुरक्षित गर्नुभयो । लैनचौरस्थित राष्ट्रिय टेबलटेनिस प्रशिक्षण केन्द्रमा भएको महिला सिंगल्समा टियुकी लस्ता महर्जनले सुदूरपश्चिमकी रेखा विष्टलाई ३-० तथा पोखरा विश्वविद्यालयकी मनिषा श्रेष्ठले टियुकी गीताञ्जली गुरुङलाई ३-२ ले पन्छ्याउँदै फाइनलमा स्थान बनाउनुभयो ।
यस्तै, जावलाखेलस्थित राष्ट्रिय खेलकुद प्रशिक्षण केन्द्रमा जारी भलिबलको सेमिफाइनल समीकरण पूरा भएको छ । कृषि तथा वन विश्वविद्यालयले टियु तथा पोखराले मध्यपश्चिम विश्वविद्यालयसँग सेमिफाइनलमा प्रतिस्पर्धा गर्नेछन् । भलिबलमा पुरुषतर्फ मात्र प्रतिस्पर्धा भइरहेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच