काठमाडौं । एसिसी वुमन्स प्रिमियर कपअन्तर्गत नेपालले पहिलो खेलमा हङकङलाई आठ विकेटले पराजित गरेको छ । जितका लागि पाएको ९४ रनको लक्ष्य नेपालले १४ दशमलब एक ओभरमा दुई विकेट गुमाएर पूरा गरेको हो । नेपालका लागि कप्तान इन्दु बर्माले सर्वाधिक ४० रनको योगदान दिनुभयो । उहाँले ३३ बल खेल्ने क्रममा एक छक्का र तीन चौका प्रहार गर्नुभयो । यस्तै, सीता रानामगरले अविजित ३६ रन बनाउनुभयो । उहाँले ३८ बल खेल्दै एक छक्का र एक चौका प्रहार गर्नुभयो । कविता कुँवरले चार रन जोड्नुभयो । बलिङतर्फ हङकङकी इक्रा सहर र चान का यिङ क्यारीले एक-एक विकेट लिनुभयो ।
मलेसियाको सेलांगुर टर्फ क्लबमा नेपाली टोलीकी कप्तान इन्दु बर्माले टस जितेर पहिला फिल्डिङ गर्ने निर्णय लिनुभयो । हङकङले निर्धारित २० ओभरको खेलमा आठ विकेट गुमाएर ९३ रन बनायो । हङकङका लागि कप्तान चान का यिङ क्यारीले सर्वाधिक २१ रन बनाउनुभयो । उहाँले ३१ बल खेल्ने क्रममा तीन चौका प्रहार गर्नुभयो । यस्तै, मर्यम बिबीले १९, यास्मिन दस्वानीले १५ तथा नताशा माइल्सले ११ रन बनाउनुभयो ।
बलिङतर्फ नेपालकी पूजा महतो र रुविना क्षेत्रीले दुई-दुई तथा कविता जोशी र सीता रानामगरले एक-एक विकेट लिनुभयो । नेपाली टोलीमा इन्दु बर्मा (कप्तान), अप्सरी बेगम, डली भट्ट, कविता जोशी, कविता कुँवर, काजोल श्रेष्ठ, रुविना क्षेत्री, सीता रानामगर, सम्झना खड्का, पुजा महतो र रोमा थापा रहनुभएको छ ।
पहिलो खेल नामिबियासँग
नेपालले त्रिकोणात्मक टी-ट्वान्टी सिरिजको पहिलो खेल नामिबियासँग खेल्ने भएको छ । उक्त खेल कीर्तिपुरस्थित त्रिवि क्रिकेट मैदानमा आगामी फागुन १५ गते हुनेछ । नेपाल क्रिकेट संघ (क्यान)ले सिरिजको खेल तालिका सार्वजनिक गरेको हो । डबल राउण्ड रोबिनका आधारमा हुने उक्त सिरिजमा नेपालले दोस्रो खेल फागुन १६ गते नेदरल्याण्ड्ससँग खेल्नेछ ।
यसैगरी नेपालले लिग चरणको तेस्रो खेल फागुन १८ गते नामिबियासँग तथा लिग चरणको अन्तिम खेल फागुन १९ गते नेदरल्याण्ड्ससँग खेल्ने तय भएको क्यानले जनाएको छ । फागुन २२ गते सिरिजको फाइनल खेल हुनेछ ।
नेपालमा यसै सातादेखि सुरु हुने आइसिसी क्रिकेट विश्वकप लिग-२ खेल्न नामिबिया र नेदरल्याण्ड्सको क्रिकेट टोली नेपाल आउँदैछ । आइसिसी टी-२० विश्वकप, २०२४ का लागि छनोट भएको नेपालले प्रतियोगिताको तयारीका लागि लगातार दुईवटा सिरिज खेल्न लागेको हो । नेपालले अहिले क्यानडासँग तीन खेलको एकदिवसीय अन्तर्राष्ट्रिय सिरिज खेलिरहेको छ ।
क्यानडासँगको तीन खेलको एकदिवसीय अन्तर्राष्ट्रिय सिरिजलगत्तै नेपालले विश्वकप लिग-२ अन्तर्गत त्रिकोणात्मक सिरिज खेल्नेछ । उक्त सिरिज आगामी फागुन ३ देखि १३ गतेसम्म चल्नेछ । लिग-२ त्रिकोणात्मक सिरिजका लागि नेपाली टोलीको घोषणा यसअघि नै भइसकेको छ । उक्त टोलीको कप्तानमा रोहितकुमार पौडेल तथा अन्य खेलाडीमा आसिफ शेख, कुशल भुर्तेल, कुशल मल्ल, आरिफ शेख, पवन सर्राफ, भीम सार्की, अर्जुन साउद, दीपेन्द्रसिंह ऐरी, गुलशन झा, सोमपाल कामी, करण केसी, ललित राजवंशी, सूर्य तामाङ र रिजन ढकाल तथा वैकल्पिक खेलाडीमा प्रतिश जिसी, देव खनाल, अनिल शाह र विवेक यादव रहनुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच