प्रचण्डको अभिव्यक्तिले कांग्रेसमा संशय

प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ले हालै दिएको एक अभिव्यक्तिले अहिले राजनीतिक माहौल पुनः गर्माएको छ । त्यसमा पनि सत्ता साझेदार दल नेपाली कांग्रेसले त महासमिति बैठकमै उक्त अभिव्यक्तिको छलफल गर्ने तयारी गरेको छ । सन्दर्भ हो प्रधानमन्त्री प्रचण्डले वर्तमान गठबन्धनप्रति व्यक्त गर्नुभएको असन्तुष्टि र मित्र शक्तिप्रतिको आक्षेप ।

भनिरहनै पर्दैन हाल गठबन्धनको सरकार छ । यसका नेपाली कांग्रेस, नेकपा माओवादी केन्द्र, नेकपा एकीकृत समाजवादी लगायतका दलहरू संलग्न छन् । निश्चय पनि एकभन्दा बढी व्यक्ति संस्था पार्टी संलग्न भएका ठाउँमा केही मतमतान्तर हुन्छन् नै । वादविवाद पनि हुनसक्छ । त्यसले अरू बढी झांगिने मौका पायो भने झगडासमेत हुनसक्छ तर त्यसलाई व्यवस्थापन गर्न सक्नुपर्छ । वर्तमान प्रधानमन्त्री प्रचण्डले गठबन्धनप्रति असन्तुष्टि व्यक्त गर्नुभएको छ । त्यसमा पनि नेपाली कांग्रेससँगको सम्बन्ध सहज र फलदायी नभएको बताउनुभएको छ । उहाँको उक्त अभिव्यक्तिले नेपाली कांग्रेसलाई पनि केही स्पर्श त गरेकै होला । यसलाई गहन विश्लेषणको विषय बनाइनै पर्छ ।

नेपाली कांग्रेस सरकारमा सबैभन्दा ठूलो पार्टीका रूपमा रहेको छ । माओवादीबाट प्रचण्ड प्रधानमन्त्री बन्नु भए पनि त्यो परिस्थितिको परिणाम थियो भनेर उहाँले पनि बुझ्नुभएकै छ । नत्र संसद्मा उहाँको पार्टीले प्राप्त गरेको भन्दा तीनगुणा सिट पाएको नेपाली कांग्रेसले उहाँलाई प्रधानमन्त्री स्वीकार गर्ने नै थिएन । प्रतिनिधिसभामा जम्मा ३२ स्थान पाएको माओवादी केन्द्रले यसरी हालीमुहाली गर्न पाउने नै थिएन ।

प्रधानमन्त्री प्रचण्डले यति कुरा नबुझ्नु भएको निश्चिय होइन । जानी जानी बुझपचाएर यस प्रकारको अभिव्यक्ति दिनुभएको हो भन्न अप्ठ्यारो मान्नुपर्दैन । व्यक्ति हत्याको कहाली लाग्दो पृष्ठभूमिबाट आउनुभएका उहाँले बेलाबखत जनतासामु उभिएर म भावुक स्वभावको मान्छे भनेर छिनमै आँसु झार्ने र छिनमै सशस्त्र विद्रोहका काला दिनहरूलाई आधिकारिक रूपमै स्वीकार्य बनाउने प्रयास गरेको जनताले देखेकै छन् ।

नेपाली कांग्रेसको पिठ्युमा उभिएर उहाँ हाल सरकारको प्रधानमन्त्री बनिरहनुभएको छ तर उहाँहरूको विद्रोहका बेलाको नारा पिठ्युमा चढेर टाउकामा हान्ने भन्ने सिद्धान्तलाई अहिले प्रयोग गर्न खोजिरहनुभएको छ । सरकारमा रहेको आफ्नै मित्रशक्ति नेपाली कांग्रेसलाई दोष दिएर व्यक्त गरेको उहाँको विचार यसको उदाहरण हो । नेपाली कांग्रेस पार्टीभित्र पनि उहाँको यस्तो अभिव्यक्तिले तरंग त उब्जाएकै छ । सामुमा कांग्रेसको महासमिति बैठक आइरहेको छ । यसका लागि तयारी पूरा भएको बताइएको छ । नेपाली कांग्रेस पार्टीले यस बैठकमा पेस गर्न ५६ पृष्ठको नीति प्रस्ताव तयार गरिसकेको छ । यस्ता विषयमा छलफल गरी संगठनको सबलीकरणका लागि पार्टीले प्रयास गर्ला नै ।

यसका साथै प्रधानमन्त्री प्रचण्डले कांग्रेस पार्टीप्रति लक्षित गरी दिएको अभिव्यक्तिबारे पनि छलफल गर्ने तयारी गरेको छ । यो आवश्यकीय एजेण्डा पनि हो किनभने जसको सहयोगमा उहाँ आपूm उच्चासनमा पुग्नुभएको छ उसकै विरुद्धमा सार्वजनिक रूपमै आलोचनाको आगो ओकल्नु उपयुक्त हुनै सक्दैन । यस्ता केही मतमतान्त थिए भने तिनलाई आपसी छलफलबाट व्यवस्थापन गर्न सकिन्थ्यो । त्यसो नगरी उहाँले सार्वजनिक रूपमै कांग्रेसविरुद्धमा अभिव्यक्ति दिनुभयो । इतिहास पल्टाएर हेर्ने हो भने राजनीतिक विचार र सिद्धान्त नमिल्दानमिल्दै पनि पटक-पटक नेपाली कांग्रेसले नेकपा माओवादी केन्द्रलाई साथ सहयोग दिँदै आएको छ । विद्रोहबाट सत्ता हत्याउने सपना तुहिएपछि माओवादीले सुरक्षित अवतरणको बाटो खोजिरहेका बेला सुरक्षित रूपमा शान्ति प्रक्रियामा नेपाली कांग्रेस पार्टीले नै ल्याएको थियो ।

त्यसपछि पनि उहाँहरूलाई नेपाली कांग्रेसले साथ दिइरहेकै छ । सधैं खरा कुरा गर्दै आएको तर व्यवहार भने जहिल्यै पनि फितलो गर्ने माओवादी पार्टीलाई नेपालका स्थायी शक्ति नेपाली कांग्रेस र नेकपा एमालेले साथ छोडिदिने हो भने उक्त पार्टीको अस्तित्व समाप्त हुने कुरा कल्पनाको विषय होइन । त्यसले गर्दा आपूmलाई सहयोग गरिरहेको शक्तिलाई लाच्छित गर्ने प्रधानमन्त्रीको अभिव्यक्तिमाथि नेपाली कांग्रेस पार्टीले एजेन्डा बनाएर महासमिति बैठकमा छलफल गर्नैपर्छ । आवश्यक परेका खण्डमा राष्ट्रलाई अप्ठयारो नपर्ने गरी माओवादीसँगको सहकार्य छोड्नसमेत नेपाली कांग्रेस तयार भयो भने अरू राजनीतिक शक्तिहरूले साथ दिने छन् । नत्र नेपाली कांग्रेसको गौरवमय इतिहाससमेत धुमिल बन्दैजाने निश्चित छ ।