महेन्द्रनगर । कञ्चनपुरको महेन्द्रनगरमा सम्पन्न तेस्रो शुक्लाफाँटा-कञ्चनपुर टी-२० क्रिकेट प्रतियोगिताको उपाधि शुक्लाफाँटा नगरपालिकाले जितेको छ । फाइनल खेलमा दोधारा चाँदनी नगरपालिकाको टिमलाई सुपर ओभरमा पराजित गर्दै शुक्लाफाँटा नगरपालिकाले उपाधि जितेको हो । उपाधि विजेता टिमलाई समापन समारोहमा शुक्लाफाँटा नगरपालिकाका प्रमुख रणबहादुर महराले नगद एक लाख एक हजार रुपैयाँ, ट्रफी र प्रमाणपत्रसहित पुरस्कृत गर्नुभयो । त्यसैगरी उपविजेता दोधारा चादँनीको टिम ५१ हजार रुपैयाँ, ट्रफी र प्रमाणपत्रसहित पुरस्कृत भएको आयोजक कञ्चनपुर जिल्ला क्रिकेट संघका अध्यक्ष वीरेन्द्रबहादुर चन्दले जानकारी दिनुभयो ।
प्रतियोगिताको फाइनल खेलमा १९ दशमलब पाँच ओभरको समाप्तिमा शुक्लाफाँटाले सबै विकेट गुमाउँदै १२४ रनको लक्ष्य दोधारा चाँदनीसामु प्रस्तुत गरेको थियो । शुक्लाफाँटाका लागि विशाल ऐरले २४ बलमा २९ रन र कैलाश ऐरले २८ बलमा २८ रन बनाउनुभएको थियो भने टिमका लागि प्रकाश थापाले तीन विकट लिनुभएको थियो ।
१२४ रनको विजयी लक्ष्य पछ्याएको दोधारा चाँदनीले १९ दशमलब चार ओभरमा १२४ रन बनाएपछि खेल ड्र भएको थियो । त्यसपछिको सुपर ओभरमा शुक्लाफाँटाले जित निकालेको आयोजकले जानकारी दिएको छ ।
प्रतियोगिताको उत्कृष्ट खेलाडीमा भीमदत्त नगरपालिकाका मिलन बोहरा घोषित हुनुभएको छ । नौ पालिकामध्ये लालझाँडी र बेलौरी नगरपालिका भने प्रतियोगितामा सहभागी थिएनन् । प्रतियोगिताको समापन समारोहमा क्रिकेटमा योगदान पु¥याएका व्यक्तित्वहरूलाई सम्मानसमेत गरिएको छ ।
समापन समारोहमा शुक्लाफाँटा नगरपालिकाका नगरप्रमुख रणबहादुर महरा, सुदूरपश्चिम क्रिकेट संघका निवर्तमान अध्यक्ष हरि रेग्मी, कैलाली खेलकुद विकास समितिका अध्यक्ष ललित खत्री, कञ्चनपुर खेलकुद विकास समितिका कार्यालय प्रमुख गोपालदत्त भट्टलगायतको सहभागिता थियो ।
यस्तै, धनगढी क्रिकेट एकेडेमी (डिसिए)को आयोजनामा भएको दीपेन्द्र स्वाँर मेमोरियल डिसिए कपको उपाधि लिटिल फ्लावर स्कुलले जितेको छ । फाप्ला क्रिकेट मैदानमा सम्पन्न फाइनलमा थ्रीस्टार स्कुललाई ७ विकेटले पराजित गर्दै लिटिल फ्लावर च्याम्पियन बनेको हो ।
थ्रीस्टारले दिएको ६७ रनको लक्ष्य लिटिल फ्लावरले ११.१ ओभरमा ३ विकेट गुमाई भेट्टायो । खेलको म्यान अफ द म्याच लिटिल फ्लावरका रोशन रावलले ४ ओभरमा १ ओभर मेडन राख्दै १८ रन खर्चेर ४ विकेट लिनुभयो । विजेता लिटिल फ्लावरले ५० हजार नगद पाएको छ । यस्तै, उपविजेता थ्रीस्टार स्कुलले ३० हजारसहित खेलाडीहरूले डिसिएमा दुई महिनाको छात्रवृत्ति पाए ।
प्रतियोगिताको सर्वोत्कृष्ट खेलाडी स्टेपिङ स्टोन स्कुलका मनिष कुँवर घोषित हुनुभयो । उहाँले नगद पाँच हजारसहित दुई महिनाको छात्रवृत्ति पाउनुभयो । उत्कृष्ट ब्याटर स्टेपिङ स्टोनकै किरण धामी र उत्कृष्ट बलर लिटिल फ्लावरका रोशन रावल घोषित हुनुभयो । दुवैजनाले समान तीन हजार नगदसहित २ महिनाको छात्रवृत्ति पाउनुभयो । उदीयमान खेलाडी घोषित सुदर्शन पन्तले पनि एक हजार नगदसहित डिसिएमा दुई महिनाको छात्रवृत्ति पाउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच