गीतसंगीतमा आफ्नोपन, मौलिकता र संस्कृति झल्कनुपर्छ : निमा शेर्पा, गायक

गायनमा आफूलाई अब्बल रूपमा प्रस्तुत गर्दै आइरहनुभएको छ निमा शेर्पाले । रामेछाप हुँदै दोलखाको जिरीका स्थायी बासिन्दा उहाँ काठमाडौंलाई कर्मथलो बनाएर आफ्ना क्रियशन श्रोता/दर्शकमाझ पस्किरहनुभएको छ । थाह भएदेखि नै गीतसंगीतमा आफूलाई पाएको बताउनुहुने उहाँले चार-पाँच वर्षको हुँदा आफ्ना बुबासँग गाउनुहुन्थ्यो । बुबाले टुङना बजाउँदा आफूले डम्फु बजाउँदै गीत गाउँदै गरेको उहाँ बताउनुहुन्छ । मोहम्मद रफी, किशोर कुमार, यशुदास, नारायण गोपाल, भक्तराज आचार्य, अरूणा लामादेखि रामकृष्ण ढकालसम्मका गीतहरू सुन्दै हुर्के बढ्नुभएको उहाँले स्थानीयस्तरमा हुने मेला महोत्सवमा आफ्नो उपस्थिति जनाउनुहुन्थ्यो र आफ्ना प्रस्तुतिमार्फत प्रशंसा बटुल्नुहुन्थ्यो । गीतसंगीतमा सक्रिय भइरहँदा बीचमा केही समय यो क्षेत्रबाट ओझेल पर्नुभएका निमा चार वर्षअघि ‘नेपाल स्टार’ नामक रियालिटी शो मार्फत पुनः संगीत क्षेत्रमा आफूलाई संलग्न गराउनुभयो । एक दर्जनभन्दा धेरै गीत श्रोत/दर्शकमाझ ल्याउनुभएका उहाँका ‘रेशमैको डोरी, न म आकाशको जून हुँ, मेरो जिन्दगीको यात्रा, भन आज, रमाइलो पल, माटोको माया’लगायत धेरै गीत औधि मनपराइएका छन् । गीतसंगीतमा हाम्रो आफ्नोपन, मौलिकता र संस्कृति झल्कनुपर्छ भन्ने मान्यता राख्नुहुने गायक निमा शेर्पासँग हिमालय टाइम्सका लागि गीता अधिकारीले गर्नुभएको संवादको संक्षिप्त अशंः-

यतिबेला केमा व्यस्त हुनुहुन्छ ?
गीतसंगीत क्षेत्रमै आफूलाई पूर्णरूपमा संलग्न गराउँदै आएको छु । केही समयअघि आफ्नै गाउँ जिरीमा आयोजित कार्यक्रममा आफ्नो प्रस्तुति दिएर आए । होली विशेष कार्यक्रम र केही महोत्सवको कुरा भइरहेको छ । रेकर्डिङ पनि छ । केही गीतको भिडियो निर्माणका विषयमा पनि कुराकानी भइरहेको छ ।

नेपाली गीतसंगीतको वर्तमान अवस्था हेर्दा सन्तोषजनक नै छ । जे-जति भइरहेछ, संख्यागत रूपमा राम्रो छ । सानो र थोरै श्रोता भएको देशमा पनि यत्तिको गीत सिर्जना हुनु अत्यन्त सुखद् पक्ष हो । हरेक क्षेत्रमा जस्तै गीतसंगीत क्षेत्रमा पनि चुनौती छन् । गीतसंगीत जगत्का राम्रा कुरालाई पारख गरेर विकृतिलाई परास्त गर्दै लानुपर्छ । चुनौतीका साथै हामीमा सम्भावना र राम्रा कुरा धेरै छन् । गीतसंगीतमा हाम्रो आफ्नोपन, मौलिकता, संस्कृति झल्कनुपर्छ भन्ने लाग्छ ।

नयाँ गीत आउँदै छ कि ?
अडियो तयार त थुप्रै छन् तैपनि नयाँ वर्षको छेउछाउमै एक/दुईवटा गीत भिडियोसहित आउने सम्भावना छ ।

यहाँको स्वरमा कति जति गीत श्रोता/दर्शकमाझ आए होलान् ?
एक दर्जनभन्दा धेरै गीत श्रोता/दर्शकमाझ आएका छन् ।

केही गीतको नाम लिनुपर्दा ?
‘रेशमैको डोरी, न म आकाशको जून हुँ, मेरो जिन्दगीको यात्रा, भन आज, रमाइलो पल, माटोको माया’लगायत छन् ।

यहाँको पहिलो गीत कुन हो ? पहिलो पटक गाउँदाको अनुभव ?
मैले सानैदेखि गीत गाउँथे । घरमा पनि गीत संगीतको वातावरण थियो । मलाई थाह भएदेखि म गीत गाउने गर्थे । बुबाले टुङना बजाउँदा मैले डम्फु बजाउँदै गीत गाउँथे । अनौपाचारिक रूपमा धेरै गीत गाए पनि औपचारिक रूपमा भने श्रवण श्रेष्ठको शब्द/संगीतमा २०६१ सालमा रेकर्ड गरिएको ‘कति रमाइला थिए ती पलहरू’ गीत मेरो पहिलो रेकर्डिङ गीत हो । यो गीत चाहिँ श्रोता/दर्शकमाझ आउन भने सकेन । सिएल शर्माको शब्द/संगीतमा गाएको ‘रेशमैको डोरी’ मेरो पहिलो रिलिज गीत हो । पहिलो पटक गाउँदाको अनुभव भने रमाइलो थियो । उत्साह थियो । एक खालको उमंग नै थियो, साथै कौतुहल्ता थियो ।

गीतसंगीतलाई कसरी लिनुहुन्छ ?
सायद यो संसारमा गीतसंगीत न गुनगुनाउने मान्छे छैन होला । सबैलाई प्रिय लाग्छ । आफ्नो परिवेश संस्कार, संस्कृतिनुसार यसलाई व्यक्त गर्ने लय, माध्यम आ-आफ्नै छन् । संगीत अन्तर्मनको भावना हो ।

यो क्षेत्रमा नयाँलाई पुरानाले कत्तिको सहयोग गर्छन् ?
म यो मामलामा अलि भाग्यमानी ठान्दछु आफूलाई । जहाँ काम मागेको छु, पाएकै छु । वरिष्ठतम् भुपेन्द्र रायमाझी सर, आलोक श्री सर, नागेन्द्र श्रेष्ठ सर हरूको संगीतमा गाइसकेको छु । यस्तै राजु सिंह सरसँग पनि सहकार्य हुने लगभग निश्चित छ । अग्रज श्रष्टाहरूको प्रेम र स्नेहले निथरुक्क छु म ।

यहाँका धेरै गीतले अवार्ड चुम्न सफल भएको पाइन्छ नि ?
संख्यात्मक हिसाबले कम रिलिज भए पनि गुणात्मक हिसाबले मेरा गीतहरू अब्बल छन् । श्रोता/दर्शक, शुभ चिन्तकहरूको माया अनि सम्माननीय जुरीहरूको आशीर्वादले गर्दा पाँचवटा अवार्ड मैले यो बीचमा चुम्न सफल भएको छु ।

यहाँले संगीत पनि सिक्नु भएको कि ?
सिके नि । यो आवश्यक छ । भानुभक्त ढकालज्यू र सुरेनचन्द ठकुरी ज्यूको शिष्य हुँ म ।

वर्तमान नेपाली गीतसंगीतको अवस्थालाई कसरी लिनुहुन्छ ?
मलाई के लाग्छ भने समय सधैं एकैनासको हुँदैन । यो परिवर्तनशील छ । परिवर्तन भइरहन्छ । त्यसैअनुसार हामीले आफूलाई अघि बढाउनुपर्छ । नेपाली गीतसंगीतको वर्तमान अवस्था हेर्दा सन्तोषजनक नै छ । जे-जति भइरहेछ, संख्यागत रूपमा राम्रो छ । सानो र थोरै श्रोता भएको देशमा पनि यत्तिको गीत सिर्जना हुनु अत्यन्त सुखद् पक्ष हो । यस क्षेत्रमा केही विकृति आएको देखिन्छ । त्यसलाई सचेत वर्गले सच्याउँदै लानुपर्छ । फेरि त्यो क्षणिक हुन्छ । पछिसम्म रहने त राम्रा मात्रै हो । हरेक क्षेत्रमा जस्तै गीतसंगीत क्षेत्रमा चुनौती छन् । गीतसंगीत जगत्का राम्रा कुरालाई पारख गरेर विकृतिलाई परास्त गर्दै लानुपर्छ । चुनौतीका साथै हामीमा सम्भावना र राम्रा कुरा धेरै छन् । गीतसंगीतमा हाम्रो आफ्नोपन, मौलिकता, संस्कृति झल्कनुपर्छ भन्ने लाग्छ ।