गृहमन्त्री आज राज्य व्यवस्था समितिको बैठकमा उपस्थित हुँदै

काठमाडौं । प्रतिनिधि सभाको राज्य व्यवस्था तथा सुशासन समितिले गृह मन्त्रालयको काम कारबाहीबारे छलफल गर्ने भएको छ । समितिको आज (बुधबार) बस्ने बैठकमा गृहका काम कारबाहीबारे छलफल हुने भएको हो । समितिको बैठक बिहान ११ बजे बस्दै छ । समितिको सचिवालयका अनुसार सिंहदरबारस्थित समितिको सभाकक्षमा बस्ने बैठकमा गृह मन्त्रालयसँग सम्बन्धित समसामयिक विषयमा छलफल गर्ने कार्यसूची छ ।

बैठकमा छलफलका लागि उपप्रधान तथा गृहमन्त्री रवि लामिछानेलाई बोलाएको छ । समितिका सभापति रामहरि खतिवडाले पनि गृहमन्त्री लामिछाने बुधबारको बैठकमा सहभागी हुने बताउनुभयो । समितिको बैठकमा गृहसचिव, नेपाल प्रहरीका महानिरीक्षक र प्रहरीको केन्द्रीय अनुसन्धान ब्युरो (सिआइबी) प्रमुखलाई बोलाइएको खतिवडाले बताउनुभयो ।

समितिको बैठकमा सहभागी हुन पत्र प्राप्त भएको उपप्रधान तथा गृहमन्त्री लामिछानेको सचिवालयले जनाएको छ । समितिको कार्यक्षेत्रभित्र गृह मन्त्रालय पर्छ । सम्बन्धित मन्त्रालयको काम कारबाहीको विषयमा सम्बन्धित मन्त्री समेतको उपस्थितिमा छलफल गर्न लागिएको समिति सचिवालयले जनाएको छ ।

समितिले गृहसचिव एकनारायण अर्याल, प्रहरी महानिरीक्षक वसन्त कुँवर र नेपाल प्रहरीको केन्द्रीय अनुसन्धान ब्युरो (सिआइबी)का प्रमुख एआइजी श्याम ज्ञवालीलाई पनि छलफलका लागि बोलाएको छ ।

समितिमा सूर्यदर्शन सहकारी ठगी गर्नेविरुद्ध उजुरी परेको छ । ठगीमा गृहमन्त्री लामिछानेको पनि संलग्नता रहेको आरोप छ । गृहमन्त्री लामिछाने सहकारी ठगीमा संलग्न रहेकाले राजीनामा दिनुपर्ने माग नेपाली कांग्रेसले गरिरहेका बेला कांग्रेसकै नेतृत्वमा भएको समितिले मन्त्रीसहित प्रहरीका जिम्मेवार अधिकारीहरूलाई छलफलमा बोलाएको हो । सहकारी ठगी अभियोगमा पूर्वउपराष्ट्रपति तथा माओवादी केन्द्रका नेता नन्दबहादुर पुनका छोरा दिपेश पुनलाई पक्राउ गरिसकेको छ । तर, उस्तै कार्यमा संलग्न लामिछानेलाई छुटकारा दिएको भन्दै कांग्रेसले निरन्तर प्रश्न उठाउँदै आएको छ । राज्य व्यवस्था समितिका सदस्यसमेत रहिसक्नु भएका लामिछाने अहिले गृह मन्त्रालयको नेतृत्वमा हुनुहुन्छ ।

त्यसबाहेक सुशासनसँग सम्बन्धित केही ऐन संशोधन गर्न तयार भएका विधेयक पनि छलफल गरेर टुंगो लाउनुपर्ने अवस्थामा रहेका सचिवालयले जनाएको छ । संवैधानिक परिषद् ऐनमै संशोधन गर्ने भनेर छलफलकै चरणमा रहेको विधेयक सत्ता समीकरण फेरबदल भएपछि अड्किएको छ । दलहरूको अडान अब के हुने ? भन्ने पनि अस्पष्ट रहेको बुझिएको छ ।

समितिमै छ पीडितको उजुरी
सूर्यदर्शन बचत तथा ऋण सहकारी लिमिटेड ठगी प्रकरणमा १८ जनाविरुद्ध राज्य व्यवस्था तथा सुशासन समितिमा यसअघि नै उजुरी परेको छ । उपप्रधान तथा गृहमन्त्रीसमेत रहनुभएका रास्वपा सभापति लामिछानेसहित पूर्व–उपराष्ट्रपति पुनका छोरा दिपेशलगायत १८ जनाविरुद्धको मुद्दामा गत बिहीबार समितिमा उजुरी परेको थियो ।

रविसहित केही व्यक्ति र संस्थाले पोखरास्थित सूर्यदर्शन सहकारीबाट करिब १९ हजार मानिसको एक अर्ब ३५ करोडभन्दा बढी रुपैयाँ अपचलन गरेको उजुरीमा उल्लेख छ । रकम फिर्ता नपाएपछि कानुनी प्रक्रियामा गएको आठ महिना बितिसक्दा पनि सहकारीका सञ्चालक जितेन्द्रबाबु राई (जिबी राई) पक्राउ पर्न नसकेका भन्दै पीडितहरूले रकम अपचलनमा संलग्नलाई कारबाही गर्न माग गरेका हुन् ।

सहकारीको पैसा गोर्खा मिडिया कम्पनी अन्तर्गतको ग्यालेक्सी टेलिभिजनमा तिसौँ करोड रुपैयाँ लगानी भएको देखिए पनि यस विषयमा आर्थिक, नैतिक र व्यावहारिक जिम्मेवारी लिई जवाफ दिनुपर्ने व्यक्तिहरू मौन बनेको भन्दै उनीहरूले आफूहरूले न्याय पाउनुपर्ने बताएका छन् । पीडितहरूले १९ जनालाई किटानी जाहेरी दिएको भए पनि हालसम्म १४ जना पक्राउ पर्न सकेका छैनन् । ठगी आरोपमा सञ्चालक समितिका पाँचजना पक्राउ परिसकेका छन् भने अन्य १४ जना फरार छन् ।

गत माघ २२ गते पूरक जाहेरीमार्फत हालका उपप्रधान एवं गृहमन्त्री तथा तत्कालीन गोर्खा मिडिया नेटवर्क प्राइभेट लिमिटेडका प्रबन्ध निर्देशक लामिछानेविरुद्ध उजुरी गरिएको भए पनि छानविन नभएको उनीहरूको भनाइ छ । पीडितहरूको निवेदन बुझ्दै समितिका सभापति खतिवडाले राज्यले पीडितहरूको समस्या समाधान गर्नुपर्ने बताउनुभएको थियो । बैठकमा उक्त उजुरीबारे पनि छलफल हुने सम्भावना रहेको समितिका एक सदस्यले बताए ।

सहकारी फौजदारी कसुरअन्तर्गत कारबाही गर्ने मुद्दा हो, र यसमा प्रहरीलाई मात्रै अनुसन्धान गर्ने कानुनी अधिकार छ । तर, गृहमन्त्री आफैँ अनुसन्धानको दायरामा परेकाले उहाँ मातहतकै प्रहरीबाट निष्पक्ष अनुसन्धान हुनसक्ने आशंकामा कांग्रेसले संसदीय छानविन समितिको माग गरिरहेको छ ।

यसअघि प्रधानमन्त्री पुष्पकमल दाहाल ‘प्रचण्ड’ले सहकारी ठगी प्रकरणमा मुछिनुभएका उपप्रधान तथा गृहमन्त्री लामिछाने निर्दोष रहेको ठोकुवा गर्नुभएको थियो । सांसदहरूले उठाएका प्रश्नको गत मंगलबार प्रतिनिधि सभामा जवाफ दिँदै प्रधानमन्त्री प्रचण्डले बिनाप्रमाण ठाडो उजुरीका भरमा गृहमन्त्री लामिछानेलाई सहकारी ठगी गरेको भन्नु जायज नहुने बताउनुभएको थियो । यस्तै, सत्ता साझेदार सबैभन्दा ठूलो दल एमाले अध्यक्ष केपी शर्मा ओलीले पनि सहकारी ठगी प्रकरणमा मुछिएको भनेर लामिछानेलाई फसाउन र बदनाम गर्न खोजिएको दाबी गर्नुभएको थियो । गत मंगलबार धनगढीमा आयोजित पत्रकार सम्मेलनमा अध्यक्ष ओलीले उजुरी परेकै आधारमा गृहमन्त्री लामिछाने मन्त्रीबाट हट्नुपर्छ भन्ने नेपाली कांग्रेसको माग पनि जायज नभएको बताउनुभएको थियो ।